Փաստ ինֆո

Հարցն այն չէ՝ Հայաստանը դո՞ւրս է գալիս կամ դուրս կգա՞ ՀԱՊԿ-ից, թե՝ չէ, իրականում հարցն այն է՝ ՀԱՊԿ-ը Հայաստանից դո՞ւրս է գալիս, թե՞ ոչ։ Ֆրանս-պրեսին տված հարցազրույցում այս մասին ասել է  Նիկոլ Փաշինյանը՝ անդրադառնալով այդ կառույցի աշխատանքի վերաբերյալ հնչեցրած դժգոհությունների վերաբերյալ հարցին։ Նրա խոսքով՝ փորձագետների մի շրջանակ վստահ է, որ ինչպես ՀԱՊԿ-ը, այնպես էլ Ռուսաստանը պատրաստվում են դուրս գալ տարածաշրջանից։ Ճիշտ է, ըստ նրա, դա թվում է ֆանտաստիկայի ժանրից, բայց նաեւ հավելել է, որ հայ ժողովուրդն այդպիսի պատմության ականատես է դարձել է ավելի քան 100 տարի առաջ։

«1915, 1917, 1918 թվականներ՝ անկայունություն Ռուսաստանում, Ռուսաստանի ստիպված հետքաշումը՝ դուրս գալ տարածաշրջանից և հայ ժողովրդի ցեղասպանության ենթարկվելը: Բայց հիմա ամբողջ խնդիրն այն է, որ 1915-ին հայ ժողովուրդը պետականություն չուներ, պետություն չուներ, որն ուներ պարտավորություն՝ ապահովելու սեփական ժողովրդի անվտանգությունը: Հիմա ունի պետություն և պետության քաղաքականությունը պիտի կառուցվի այս տրամաբանության մեջ, որովհետև հավանականությունը, որ մի օր մենք կտեսնենք, որ Իրանը կամ Թուրքիան այստեղից գնացել են, զրո է, չկա այդպիսի հավանականություն, բայց հավանականությունը, որ ցանկացած աշխարհաքաղաքական կենտրոն, որ այստեղ այս պահին ներկա է, առավոտյան արթնանանք ու տեսնենք այստեղ չէ, այդպիսի հավանականությունը բարձր է զրոյից»,- նշել է նա։

Ինչ վերաբերում է Արևմուտքի կողմից ՌԴ դեմ գործարկվող պատժամիջոցներն այդ երկրի կողմից Հայաստանի միջոցով շրջանցելու հնարավոր սցենարին, ապա Փաշինյանի փոխանցմամբ՝  ՀՀ-ն այս հարցում թափանցիկ քաղաքականություն է վարում, սակայն հաշվի առնելով, որ ՀՀ-ն Եվրասիական տնտեսական միության անդամ է, բնականաբար, Ռուսաստանը մեր երկրից որոշոկի ակնկալիքներ է ունենալու։ Միևնույն ժամանակ, Փաշինյանը մատնանշել է Հայաստանի ու Ռուսաստանի շուկաների ծավալային տարբերությունը։

«Մենք մեր ռուսաստանցի գործընկերների հետ խոսելիս ասել ենք հետևյալը՝ մենք հասկանում ենք ձեր ակնկալիքը և պատրաստ ենք հասցեագրել ձեր ակնկալիքը, բայց մինչև այն կետը, երբ Հայաստանի համար կառաջանա սանկցիաների տակ հայտնվելու վտանգ, որովհետև եթե Ռուսաստանի նման անծայրածիր պետությունը կարող է իրեն թույլ տալ սանկցիայի տակ հայտնվել, Հայաստանն, առավել ևս այս ռազմաքաղաքական միջավայրում, չի կարող իրեն նման բան թույլ տալ: Եվ մենք այս նույն տեքստն ասել են նաև Արևմուտքին»,- ասել է նա։

Աղբյուր` Փաստինֆո