Փաստ ինֆո

Արցախը եւ արցախիցները երբեք չեն լինելու Ադրբեջանի կազմում։ Այսօր լրագրողների հետ զրույցում նման հայտարարությամբ է հանդես եկել ՀՀ նախկին գլխավոր դատախազ Արթուր Դավթյանը, ով մասնակցում է ի պաշտպանության Արցախի կազմակերպված ակցիային։

«Ես այստեղ եմ որպես ՀՀ պարզ քաղաքացի աջակցելու Արցախի հերոսական ժողովրդին, որոնք շուրջ 7 ամիս եւ ավել պայքարում են շրջափակման մեջ։ Ուզում եմ՝ Հայաստանից ակնհայտ օգնություն լինի Արցախի մեր քույրերին եւ եղբայրներին, որ իրենք իմանան՝ մենակ չեն, իրենց հետ ենք եւ պաշտպանում ենք իրենց բոլոր պահանջները որպես մեկ ազգի ներկայացուցիչ»,- ասել է նա։

Դառնալով ստեղծված վիճակի պատճառներին՝ նա ասել է, որ դրանք շատ են, բայց այսօր դրանք չպետք է վերլուծվեն, այլ համազգային դիրքորոշումը արտահայտվի։

«Դիրքորոշում 1, որը Հայաստանում ու Արցախում ապրող բնակչությունը մեկ ազգ են եւ լինելու են կողք-կողքի։ Դիրքորոշում 2, որ Արցախը երբեք չի լինելու Ադրբեջանի կազմում։ Իմ հորդորն է կենտրոնանալ մեր անելիքների վրա»,- ասել է նա։

Նախկին գլխավոր դատախազի կարծիքով՝ հիմա ոչ թե պետք է մեղավորներ փնտրել, միմյանց քննադատել, այլ միավորվել եւ իրավիճակից ելք գտնել։

«Մենք երեք տարի ազգովի փնտրում ենք մեղավորների, սեւեր եւ սպիտակներ, բայց դա մեր խնդիրը լուծե՞լ է»,- ասաց Արթուր Դավթյանը։

Նրա խոսքով՝ ստեղծված իրավիճակում կա նաեւ ռուսական կողմի մեղավորությունը, որովհետեւ նրանք չեն պահպանել նոյեմբերի 9-ի համաձայնագրի կետերը։

«Միաժամանակ մենք մեր երախտիքը չենք կարող չունենալ ռուս խաղաղապահին, որ մեր արցախցիներն ապրում են անվտանգ։ Եվ որքան որ այսօր բարձր լինի մեր ձայնը, այնքան մենք կտեսնենք մեր ռազմավական գործընկերոջ գործողությունները»,- ասաց Դավթյանը։

Հարցին, թե պաշտոնավարման տարիներին արե՞լ է իրենից կախվածը իրավիճակը կանխելու համար, Դավթյանը պատասխանեց․ «Որպես դատախազ արել եմ ամենը, որ օբյեկտիվ լինեն իրավական գործընթացները»։

Աղբյուր` Փաստինֆո