Փաստ ինֆո

Արցախում իրավիճակը ճգնաժամային է և պետք է գոնե սնունդ հասցնելու հարցն արագ լուծել։ Դա կարելի է անել խաղաղապահների միջոցով, ՄԱԿ-ի կառույցների օգնությամբ կամ մեկ այլ կերպ։ Բայց այստեղ կարևորագույն խնդիրն այն է, որ ՀՀ իշխանությունն այդ ուղղությամբ որևէ քայլ չի ձեռնարկում, իսկ անհատների մակարդակով այդ խնդիրը լուծելու հնարավորություն գրեթե չկա․ ում դիմում ես, ասում են՝ նման հայցով ՀՀ կառավարությունը մեզ չի դիմել։ Այդ մասին «Փաստինֆո»-ի հետ զրույցում ասաց ադրբեջանագետ, պատմական գիտությունների թեկնածու Տաթևիկ Հայրապետյանը։

«Ռուս խաղաղապահների համար ուղղաթիռով սնունդ տարվում է։ Իհարկե, նրանք փորձում են ներկայացնել, թե այդ խնդրով չեն զբաղվում իրենք, բայց հաշվի առնելով իրավիճակի ճգնաժամային լինելը՝ պետք է փորձել նաև այդ տարբերակը։ Ամեն դեպքում պետությունը պիտի աշխատի։ Մյուս կողմից, ՀՀ-ն խնդիրը պետք է անհապաղ բարձրացնի ՄԱԿ-ի անվտանգության խորհրդում։ Մշտական անդամների հետ ամենօրյա աշխատանք պետք է տարվի արդյունքի հասնելու համար։ Հրատապ պետք է օրակարգ բերել օդային միջանցք բացելու հարցը։ Դրանից Ադրբեջանը լրջորեն անհանգստացած է։ Այնտեղ շատ լավ գիտեն, որ եթե միջազգային ավիափոխադրողները Ստեփանակերտ մտնեն, լուրջ խնդիրներ կունենան։ Հասկանում են, որ չեն կարող խփել մարդասիրական բեռներով բեռնված, Արցախ միջազգային օգնություն հասցնող միջազգայիններին ու ստիպված զիջումների են գնալու»,- շեշտեց ադրբեջանագետը։

Հայրապետյանի դիտարկմամբ՝ Արցախում ստեղծված վիճակը մեղմել չի ստացվում նաև ՀՀ ղեկավարության սխալ խոսույթի պատճառով։

«Ամեն անգամ շեշտվում է, որ խնդիրը հումանիտար է։ Այո, հումանիտար լուրջ խնդիր է՝ չկա սնունդ, դեղորայք, առաջին անհրաժեշտության ապրանքներ, բայց ավելի խորքային է, քան ներկայացվում է դրսում։ Հումանիտարի հետ մեկտեղ այն նաև քաղաքական, քաղաքակրթական ու պատմական է։ Եթե միայն սննդի հարցն ես բարձրացնում, Ադրբեջանն ասում է՝ ես պատրաստ եմ տրամադրել։ Պետք է հստակ մերժել Ադրբեջանի առաջարկը և հիմնավորել , թե ինչու ես մերժում՝ ցույց տալով, որ այդ երկրում պետության առաջին դեմքի մակարդակով հայատյացություն է քարոզվում ու նրա՝ Արցախ մտնելու նպատակը պետական ինստիտուտները ոչնչացնելը, Արցախը նախիջևանացնելը, այն հայերից ազատելն է, ուրիշ ոչինչ։ Այդ նարատիվն է, որ պետք է առաջ տանել»,-ընդգծում է ադրբեջանագետը՝ նկատելով, որ իրավիճակն ավելի է ծանրացել ԵՄ խորհրդի նախագհ Շառլ Միշելի հայտարարությունից հետո, որում տեղ էր գտել օկուպացված Ակնայով Արցախ հումանիտար օգնություն ուղարկելու թեզը։

Հայրապետյանը նշում է՝ ՀՀ վարչապետը, ում ներկայությամբ տեղի է ունեցել նման քննարկում, պետք է թույլ չտար, որ հայտարարության մեջ նման միտք տեղ գտներ։

«Ինչպե՞ս կարող էր Միշելի հայտարարության մեջ նման դրույթ լինել՝ այն դեպքում, երբ քննարկմանը ներկա էր Նիկոլ Փաշինյանը։ Նա պարտավոր էր անմիջապես վետո դնել այդ տարբերակի վրա։ ժամանակին գերմանացիները հրեաներին համակենտրոնացման ճամբարներում սնունդ ու ջուր էին տալիս, ու, ոնց որ ասես՝ հրեաները պետք է ներեին նրանց, նրանց քայլերը, քանի ր իրենց ջուր են տվել կամ ուտելու ինչ-որ բան․․․ Հիմա նմանատիպ իրավիճակ է․ Ադրբեջանը ճանապարհը փակել է, իրենց հայրենիքում ապրող 120 հազար մարդկանց հոգեբանական ու հումանիտար տեռորի է ենթարկում, ուզում են հիմա նրա որպես կառուցողական կողմ ներկայացնել՝ մինչդեռ միակ բանը, որ պետք է անեն, ստիպելն է, որ այդ ագրեսոր երկիրը բացի ճանապարհը։ Պետք է պարտադրել բացել միջանցքը, քանի որ այս ամբողջ ճգնաժամը դրա հետևանքով է ստեղծվել, իսկ մնացած հարցերը պետք է քննարկել դրանից հետո»,-համոզմունք է հայտնում Տաթիկ Հայրապետյանն ու ավելացնում՝ այս ամենը գալիս է նրանից, որ ՀՀ վարչապետը մի կողմից հայտարարում է, թե Արցախում էթնիկ զտման է պատրաստվում Ադրբեջանը, մյուս կողմից էլ ասում, թե պատրաստ է Արցախը ճանաչել Ադրբեջանի մաս։

Աղբյուր` Փաստինֆո