Փաստ ինֆո

Կարծում եմ՝ ԲԴԽ-ն կամայական որոշում է կայացրել՝ ինձ Վերաքննիչ դատարաններում դատավոր նշանակելու համար առաջխաղացման ենթակա դատավորների թեկնածուների քրեական մասնագիտացման բաժնի ցուցակից հանելով։ Այս մասին լրագրողների հետ զրույցում ասաց Երևանի քրեական դատարանի դատավոր Արման Հովհաննիսյանը։

Նրա դիտարկմամբ՝ իրեն այդ նույն կազմով առաջխաղացման ցուցակում ընդգրկելուց հետո որևէ բան չի փոխվել, հակառակը, միայն դրականն է եղել։ Մասնավորապես, ստացվել է ԿԿՀ եզրակացությունը, որով դատավորի բարեվարքությունը դրական է գնահատվել, աշխատանքները գնահատվել է 100/100, իսկ թե հետագայում ինչ պատճառով է հանվել դատավորի անունը ցուցակից՝ նրան հայտնի չէ։ Ավելին, ԲԴԽ-ից՝ որպես վարչական մարմին, ստացել է ակտը, ինչը, իր տպավորությամբ, որոշման քաղվածքի էր նման։

Անդրադառնալով Դատական դեպարտամենտի կողմից ԲԴԽ անդամի ընտրության քվեաթերթիկում ներառելու միայն մարզերի դատավորներին ծանուցելու մասին որոշմանը՝ Հովհաննիսյանն արձանագրեց. «Ես էլ եմ կարծում, որ Դատական դեպարտամենտը սխալ է ուղարկել ծանուցումը, որ միայն մարզերին է ծանուցել: Մենք չունենք այն հիմնավորումները, թե ինչու պետք է միայն մարզերը ծանուցվեն, և ինչու պետք է Երևանը չմասնակցի: Մենք կփորձենք հասկանալ՝ հնարավո՞ր է այս ընտրությունը հետաձգել, տեսնենք՝ Վարչական դատարանն ինչ է ասում պարոն Բալայանի հայցի հետ կապված, հետո տեղի ունենա ընտրությունը»:

Հարցին՝ ինքը վախենո՞ւմ է լրագրողներին հարցազրույց տալուց, և արդյո՞ք մտահոգություն չունի, որ իր նկատմամբ նույնպես կարող է կարգապահական վարույթ նախաձեռնվել, Հովհաննիսյանը պատասխանեց՝ նշելով, որ ինքն ընդհանրապես չի վախենում, պետք է մի փոքր տարանջատել վախենալը և խելամիտ լինելը:

« Ես կարող եմ խոսել այն ամենի մասին ինչ մտածում եմ, բայց չի լինի խելամտություն, հասկանալով, թե ինչեր տեղի ունեցան, երբ որոշ դատավորներ փորձեցին իրենց կարծիքը արտահայտել: Ես չեմ ուզում այդ հնարավարությունը որևիցե մեկին տալ, որ այդ գործընթացը սկսվի, ինչքան էլ ցանկություն ունենամ որոշ հանգամանքներին ճիշտ գնահատական տալ»,- ասաց նա:

Անդրադառնալով դատական համակարգում առկա մի շարք խնդիրներին՝ դատավորը մտահոգիչ համարեց մեծ թվով կարգապահական վարույթների հարուցումը. «Ո՞նց կարելի է մեկ օրում 4 դատավորի լիազորություն դադարեցնել: Եթե նայենք, թե կարգապահական վարույթներ ինչու են հարուցվում և որ դատավորների նկատմամբ, ապա ես ողջամտորեն կասկած ունեմ ճնշումների մասով: Օրինակ՝ դատական ակտերն ուշ ենք ուղարկում կողմերին՝ ծանրաբեռնվածությունից ելնելով, բայց եթե եզրակացություն է կազմվում մեկ դատավորի մասով, և նրա լիազորությունները դադարեցվում են, բայց կան այդպիսի բազմաթիվ դատավորներ, և նրանց հետ կապված որևէ կարգապահական վարույթներ տեղի չեն ունենում, ապա դա արդեն մտահոգիչ է»:

Հարցին՝ ԲԴԽ-ն լռեցնո՞ւմ է դատավորներին, դատավորն ասաց. «Իրենց կարծիքով՝ դատավորը մամուլում չպետք է խոսի, բայց դատավորը չի խոսում քաղաքականությունից կամ այլ բաներից, այլ խոսում է իր համակարգում առկա խնդիրներից: Եթե դատավորը խոսում է իր հանակարգի խնդիրներից, ապա դա շատ ողջունելի է, որովհետև եթե մենք չխոսենք մեզ մտահոգող խնդիրներից, բա ո՞վ խոսի»:

Ինչ վերաբերում է ԱՆ նախարար Գրիգոր Մինասյանի այն դիտարկմանը, թե դատավորը չի կարող քննադատել մեկ այլ դատավորի կողմից կայացված դատական ակտը, Հովհաննիսյանը համաձայնեց, միևնույն ժամանակ ընդգծեց՝ Դավիթ Հարությունյանը դատական ակտ չի քննադատել, նա քննադատել էր այն օրենքը, որի արդյունքում դատավորների լիազորությունները դադարեցվեցին.«Այլ բան է, որ ԲԴԽ-ն որը որպես դատարան է հանդես գալիս, նրա որոշումները չպետք է քննադատել»:

Անդրադառնալով մամուլում շրջանառվող այն լուրին, թե Կարեն Անդրեասյանը ԲԴԽ է կանչել Վերաքննիչ քրեական դատարանի մի խումբ դատավորների և առաջարկել է քվեարկություն անել, դատարանի ստվերային նախագահ ընտրել, քանի որ Վերաքննիչ քրեական դատարանի նախագահ Մխիթար Պապոյանի հետ ինքը չի կարողանում աշխատել, Արման Հովհաննիսյանն ասաց. «Ինձ համար մտահոգիչ են այդ իրադարձությունները, նույն այդ ստվերային դատարանի նախագահի մասով անկեղծ ասած՝ երբ լսեցի դա, չէի հավատում, որ նման բան կարող է տեղի ունենալ, որովհետև դա մեր համակարագի հեղինակության հարցն է: Եթե մի քաղաքացի մեզ ասի՝ դուք ինչպե՞ս եք կարողանում կայացնել դատական ակտ, եթե ձեր համակարգում նման բաներ են տեղի ունենում, ես չգիտեմ՝ դրա պատասխանը ոնց եմ տալու»:

Աղբյուր` Փաստինֆո