Փաստ ինֆո

Մենք չենք կարող տարանջատել այն խնդիրները, որոնք այսօր տեղի են ունենում աշխարհում և անմիջականորեն ազդում Հայաստանի և Արցախի զարգացումների վրա։ Այս ամենը խիստ փոխկապակցված են իրար հետ՝ ռուս – թուրքական, ռուս – ադրբեջանական, ինչպես նաև՝ Արևմուտք – Ռուսաստան հարաբերությունները։ Ինչ վերաբերում է Արցախում տեղի ունեցածին՝ մենք պետք է հասկանանք, որ Նիկոլ Փաշինյանը 2022 թ. հոկտեմբերի 6-ին՝ Պրահայի եռակողմ հանդիպման ընթացքում, Արցախը ճանաչել է Ադրբեջանի կազմում։ Նույնը հետագայում հաստատվել է նաև Բրյուսելում, ինչպես նաև՝ Քիշինևում։ «Փաստինֆո» լրատվականի հետ զրույցում ասել է քաղաքագետ Անդրանիկ Հովհաննիսյանը՝ արձանագրելով, որ Փաշինյանը Հայաստանի նորագույն պատմության առաջին ղեկավարն է, որը բանավոր Արցախը ճանաչել է Ադրբեջանի կազմում։

Արցախի հետ կապված բոլոր սուր խնդիրները, ըստ քաղաքագետի, սկսել են այն Ադրբեջանի կազմում ճանաչելու պահից անմիջապես հետո.«Ե՛վ ճանապարհի փակումը, և՛այնտեղ անհասկանալի և անօրինական անցակետի տեղադրում, ընդուպ մինչև՝ այս պահը տեղի ունեցող բոլոր զարգացումները մեկ պատճառահետևանքային կապ ունեն, որ անմիջապես առնչվում է 2022 թ. հոկտեմբերի 6-ի հետ։ Ավելի քան հստակ է, որ գոյություն ունի պայմանավորվածությունների մի մեծ շղթա, որին մասնակցում են ԵՄ-ն, ԱՄՆ-ն, որոնց առաջնային նպատակն է՝ Հարավային Կովկասից, մասնավորապես, Հայաստանից և Արցախից դուրս մղել ՌԴ-ին։ Սա իրենց բնական և աշխարհաքաղաքական շահն է, որին էլ ձգտում են այս կենտրոնները։ Այս պայմանավորվածության մեջ մասնակցում են նաև Թուրքիան և Ադրբեջանը՝ առաջ տանելով, բնականաբար, սեփական շահերը, այն է՝ ամբողջությամբ կուլ տալ Արցախը»։

Այս ողջ պայմանավորվածության շղթայի մեջ է նաև Հայաստանի Հանրապետությունը, ասում է քաղաքագետը և հավելում. «Հարց է առաջանում՝ ինչո՞ւ է ՀՀ-ն մասնակից դառնում իր համար կործանարար և անընդունելի հակահայ այս պայմանավորվածությանը։ Պատասխանը շատ պարզ է՝ այն ուժերը, որոնք պետական հեղաշրջման արդյունքում, նպաստել են, որպեսզի 2018 թ. Նիկոլ Փաշինյանն ու իր կուսակցությունը գան իշխանության և ֆինասավորել են, այսպես կոչված, թավշյա հեղափոխությունը, դրանք էլ այսօր կառավարում են Հայաստանի Հանրապետության օրվա իշխանությանը։ Խոսքն արտաքին ուժերի մասին է՝ ԱՄՆ, ԵՄ, ինչպես նաև՝ սրանց զուգահետ՝ թուրք – ադրբեջանական տանդեմը։ Այս ուժերը փորձում են ամբողջովին օկուպացնել Արցախը և հնարավորինս, կառավարելի դարձնել Հայաստանը, այսինքն՝ ՀՀ տարածքով, այսպես կոչված, Զանգեզուրի միջանցքի անցկացումը, Ցեղասպանսւթյան հարցի չեղարկումը և այլն»։

Հարցին՝ ի՞նչ է, ուրեմն, նշանակում այս ամենի ֆոնին, Արցախի նախագահ Արայիկ Հարությունյանի վարքը՝ նստել վրանների տակ, Անդրանիկ Հովհաննիսյանը պատասխանում է՝ Արայիկ Հարությունյանն, ըստ էության, այլ ելք չունի, որովհետև անքակտելի կերպով մաս է կազմում Նիկոլ Փաշինյանի վարած քաղաքականությանը, սա էլ իր հերթին՝ թուրք – ադրբեջանկան տանդեմի հլու գործակալն է։ Ըստ քաղաքագետի՝ ստացվում է, որ Արայիկ Հարությունյանը, նույնպես, այս արատավոր շղթայի անբաժան մի մասն է և Արցախում՝ վրանների տակ նստած, ըստ էության, ծառայում և նպաստում է նույն տանդեմի հանցավոր պլանների իրականացմանը։ Այս շղթան, ըստ քաղաքագետ Անդրանիկ Հովհաննիսյանի, պետք է օր առաջ քանդվի, եթե մենք չենք ցանկանում կորցնել Արցախը, մասամբ նաև՝ Հայաստանը։

Աղբյուր` Փաստինֆո