Փաստ ինֆո

Վերաքննիչ քրեական դատարանի դատավոր Վազգեն Ռշտունին մտահոգիչ է համարում, որ ԲԴԽ անդամի ընտրության համար քվեաթերթիկում ներառելու ծանուցումն ուղարկվել է միայն մարզերի առաջին ատյանի ընդհանուր իրավասության դատարանների դատավորներին։ Լրագրողների հետ զրույցում Վազգեն Ռշտունին նշեց, որ իր գնահատմամբ՝ առնվազն գոնե Երևան քաղաքի դատավորները պետք է ծանուցվեին այդ մասին։

Անդրադառնալով դատավորների նկատմամբ ճնշումներին՝ Ռշտունին նշեց, որ իր վրա ուղիղ ճնշումներ չկան, բայց նկատեց՝  Եթե 1 օրվա մեջ 4 դատավորի լիազորություն են դադարեցնում, ապա պետք է մտավոր հետամնաց լինես, որ մտահոգություն չունենաս։

«Նման մոտեցում չկա որևէ այլ պետական մարմնում լինի, օրինակ՝ Հարկայինում 4 տեսուչ նույն օրն ազատվեն աշխատանքից: Այն դեպքում, որ դատավորները ի տարբերություն մյուսների պետք է լինեն ավելի պաշտպանված, նրանց իրավունքները լինեն ավելի երաշխավորված: Ունենք ԲԴԽ անդամներ, որոնք նույնպես ունեն այն նույն խնդիրները,  ինչի համար  դադարեցվեց այլ դատավորների լիազորություններ,  մասնավորապես, ՄԻԵԴ-ի որոշումների հետ կապված, դատական ակտերը ուշ տրամադրելու հետ կապված»,- ասաց դատավորը:

Դատավորի դիտարկմամբ՝ տենդենց է նկատվում, որ փորձում են ցույց տալ, որ ԲԴԽ-ի մասին քննադատություն անել չի կարելի, այդ դեպքում հարց է առաջանում՝ եթե գովալ կարելի է, քննադատել ինչո՞ւ չի կարելի։

Նրա խոսքով՝ ԲԴԽ-ն կոչված է իրենց  իրավունքներն ապահովելու, ինչպես մյուս դատարանները՝ քաղաքացիների։

«ԲԴԽ-ն սրբավայր չէ, այնտեղ աշխատողներն էլ սրբեր չեն, գուցե կան սուրբ մարդիկ, բայց մենք իրենց ընկալում ենք որպես ԲԴԽ անդամներ։ Իսկ ո՞վ է գնահատական տալու ԲԴԽ-ի գործունեությանը։ Եթե մենք ընտրում ենք անդամների, ում են իրենք հաշվետու։ Ինչպես ԱԺ-ն հաշվետու է ժողովրդին, այնպես էլ ԲԴԽ-ն հաշվետու է դատավորներին։ Եթե մենք ունենք դժգոհություններ, թերացումներ, ո՞ւմ հայտնենք դրանք»,- ասաց Ռշտունին:

Աղբյուր` Փաստինֆո