Փաստ ինֆո

Փաստաբան Տիգրան Աթանեսյանը և դատավոր Մեսրոպ Մակյանն այլևս չեն շփվում։ Փաստաբան Տիգրան Աթանեսյանը հրավիրված մամուլի ասուլիսին ասաց, որ Հակակոռուպցիոն դատարանում ընկեր ունի, որն իր երեխայի քավորն է, բայց իրար հետ այլևս չեն շփվում, կապը խզվել է։ Թեև փաստաբանն անուն չտվեց, բայց խոսքն, ըստ էության, Վերաքննիչ հակակոռուպցիոն դատարանի նախագահի պաշտոնակատար Մեսրոպ Մակյանի մասին է, որը Տիգրան Աթանեսյանի կրտսեր որդու՝ Աշոտ Աթանեսյանի, կնքահայրն է, իսկ Տիգրան Աթանեսյանը Մեսրոպ Մակյանի եղբորորդու հարսանիքի քավորը։

Հակակոռուպցիոն դատարանների ստեղծման առնչությամբ փաստաբանը դրական մոտեցում չունի, նշում է՝ Հակակոռուպցիոն դատարանների բուրգը «ստալինյան տռոյկաներ» են, դրանք Նիկոլին սպասարկելու դատարաններ են։

«Նիկոլի, նրա ընտանիքի անդամների, մտերիմների ցանկությունները կռահելու և դրանք սպասարկելու դատարաններ են դրանք։ Այսպիսի անպատիվ դեր են վերցրել բոլոր այդ մարդիկ, որոնք աշխատում են այդ բուրգում։ Դա տարածված երևույթ է՝ նորություն չէ, ստեղծել են, վայելում են։ Մի նրբություն էլ ասեմ․ մեր օրենսդրությունը պարզապես արգելում է Հակակոռուպցիոն դատարանին քննել կալանքի գործեր։ Իմ որոշ դատավոր ընկերների հետ մասնավոր զրույցներում հարցնում եմ, թե ոնց են անում, իրավունք չունեն։ Իրենք էլ ասում են՝ իրավունք չունեն, բայց ոնց որ «ադաթ» են սարքել։ Կարեն Անդրեասյանը Նոր տարուց հետո որոշեց, որ Հակակոռուպցիոն դատարանը կարող է քննել կալանքներ, հիմար որոշում կայացվեց և այդ դատավորներն իրավունք չունենալով քննել այդ ամենը, մարդ են կալանավորում։ Տխուր է այն հասարակության ճակատագիրը, որը ծնում է նման մարդկանց։ Դու դատավոր ես, գիտես, որ դրա իրավունքը չունես, դու ինչի՞ ես մարդուն ազատությունից զրկում, ո՞վ ես դու։ Հասկացանք, որ Նիկոլի դուրը գալիս ես, որ մեկ սրիկայության դիմաց քո 50 ապօրինությունների վրա աչք կփակեն, «կդզվես», բայց մի՞թե դա է կյանքի իմաստը։ Եթե այո՛, ապա շատ նորմալ է, որ Նիկոլ վարչապետ ունենք»,- ասաց նա։

Տիգրան Աթանեսյանը նշում է, որ ունի ընկերներ, որոնց հետ այլևս չի շփվում, քանի որ պաշտոններ են ստացել Նիկոլ Փաշինյանից։ Նրա խոսքով՝ Հակակոռուպցիոն դատարում ընկեր ունի, ով իր երեխայի քավորն է, բայց իրար հետ այլևս չեն շփվում, կապը խզվել է։
«Ես ունեմ ընկեր, որ ՍԴ դատավոր է, ես հավերժ ջնջել եմ այդ մարդուն իմ կյանքից։ Ես ունեմ ընկեր, ով Գլխավոր դատախազի տեղակալ էր, նրան բարև չեմ տալիս, որովհետև նա Նիկոլից պաշտոն է ստացել։ Սա է պայքարը, ես զրկվել եմ բազմաթիվ ընկերներից։ Մի ծիծաղելի բան էլ ասեմ. երբ կյանքի բերումով պաշտպանում էի Նիկոլին, շատ մարդիկ կային, որոնք ինձ չէին բարևում, հիմա, երբ Նիկոլն եկավ իշխանության, քննադատում եմ, այդ նույն մարդիկ, ինձ բարև չեն տալիս՝ այդ նույն պատճառով։ Երջանիկ հայեր են այդ մարդիկ։ Դե, ինչպես ասում են՝ որոճացեք ձեզ բաժին հասած խոտը, մինչև կգա առավոտը», - հայտարարեց նա։

Աղբյուր` Փաստինֆո