Փաստ ինֆո

Էջմիածնի «Քիմիկների» զորամասի՝ 44-օրյա պատերազմում անհետ կորած զինծառայողների ծնողները Կառավարության շենքի մոտ նստացույց կիրականացնեն։

Նշենք, որ այսօր վաղ առավոտից անհետ կորած զինծառայողների ծնողները Կառավարության շենքի մոտ էին՝ հանդիպում պահանջելով Նիկոլ Փաշինյանի հետ, ապա, անժամկետ նստացույց հայտարարեցին։

«Լափամաններդ թողեք, հելեք մեր երեխեքով զբաղվեք։ 40 երեխու տարաք կորցրեցիք, մեկը չի, տասը չի, քսանը չի, ոչ ոքի չի հետաքրքրում մեր երեխեքի ճակատագիրը, ասա ինչ արեցիք մեր երեխեքին, չէ՞ որ նրանք փոքր երեխեք ունեն, ով պետք է պահի։ Հելեք պատասխան տվեք։ Երեք տարի է արդեն։ Որ դուռը գնում ենք, արդեն զզվում են մեզնից, չեն ուզում մեզ տեսնեն։ Ասում են՝ լռեք, լռեք, լավ կլինի։ Ինչքան կարող ենք լռել, արդեն երրորդ օրն է, մենք այդքան առողջություն ունե՞նք»,- ասաց նա՝ նշելով, որ օրերս ԱԱԾ-ի մոտ է եղել. «Ասում են՝ անում ենք, զբաղվում ենք։ Ինչ եք արել, բարձր աշխատավարձ եք ստանում, ամեն մեկիդ հսկայական շարասյուն ունեք, մեր հարազատ հողում վախենում եք, շարասյունով եք շարժվում, բա մեր երեխեքին ինչու՞ տարաք»։

Ծնողներից Մանավազյան Կարինեն ասաց. «Աննա Հակոբյա՛ն, երկու խելապակաս ծնող վերցրեցիր տարար Մարտի 8 արեցիր, ցույց տվեցիր, թե ինչպես են ծնողները ձեռքերը վեր բարձրացնում պարում: Բա ինչո՞ւ չես գալիս տեսնես մյուս ծնողների վիճակը, ինչո՞ւ չես գալիս տեսնում, որ անկողնում ծնողը մի րոպե հետո մեռնելու է, ինչո՞ւ դա չես նկարում: Աննա Հակոբյան, ծնողի պարելը նկարում ես, տառապելը՝ ո՞չ»:

Աղբյուր` Փաստինֆո