Փաստ ինֆո

«Լուսավոր Հայաստան» կուսակցության ղեկավար, հատուկ հանձնարարություններով ՀՀ դեսպան Էդմոն Մարուքյանը թվիթերյան գրառմամբ մեղադրում է միջազգային հանրությանը՝ պասիվության եւ ըստ այդմ՝ Արցախի հայության սովի մատնվելու, սպանությունների և էթնիկ զտումների հարցում մեղսակից լինելու մեջ, իսկ «Լուսավոր Հայաստան» կուսակցության ներկայացուցիչը «բոլորովին այլ դերակատարում է ստանձնել, պատրաստվում է Երևանի ավագանու առաջիկա ընտրություններին»։

Երևանի ավագանու «Լույս» խմբակցության ղեկավար Դավիթ Խաժակյանը «Փաստինֆո»-ի հետ զրույցում հրաժարվեց մեկնաբանել, թե արդյո՞ք Արցախում ստեղծված իրավիճակն ու Ադրբեջանի կողմից «վերաինտեգրման» մասին հայտարարությունները ՀՀ ներկա իշխանությունների կողմից Արցախն Ադրբեջանի տարածք ճանաչելու հետևանքը չէ։ Հորդորեց այդ հարցն ուղղել Էդմոն Մարուքյանին։
«Ես, ճիշտն ասած, հիմա բոլորովին այլ դերակատարում եմ ստանձնել, դա Երևանի քաղաքային ընտրությունների մասնակցությունն է։ Ես «Լուսավոր Հայաստանի» հայտարարված թեկնածուն եմ, ես նախընտրում եմ խոսել քաղաքային խնդիրներից, դա չի նշանակում, որ ես առհասարակ պատրաստ չեմ մեկնաբանել։ Պարզապես այս պահին ունեմ այլ գործառույթ՝ կուսակցության ներսում»,- հակիրճ պատասխանեց Խաժակյանը։

Ինչ վերաբերում է Մարուքյանի մեկնաբանությանը՝ հատկանշական է, որ իր գրառման մեջ նա որևէ տողով չի մատնանշել Արցախում առկա ծայրահեղ ճգնաժամային իրավիճակի առաջացման գործում ՀՀ իշխանությունների ունեցած «ներդրման» ու պատասխանատվության մասին։

Ընդ որում, Մարուքյանը մոռացել է, որ հենց ինքն է առաջ տանում այն իշխանության արտաքին քաղաքականությունը, որը ստորադասել է ինքնորոշման իրավունքը, Արցախը ճանաչել է Ադրբեջանի մաս, ու պարտադրել է Արցախին՝ ինտեգրվել Ադրբեջանի հետ, թեև Արցախը երբևէ չի եղել անկախ Ադրբեջանի մաս։

Աղբյուր` Փաստինֆո