Փաստ ինֆո

Ադրբեջանական ԶՈւ-երը լիարժեքորեն պարալիզացրել են սահմանապահ Երասխ բնակավայրի տարածքում, միջազգային ներդրմամբ կառուցվող գործարանի աշխատանքը։ «Փաստինֆո»-ի հետ զրույցում այս մասին ասաց նույն գյուղի բնակիչներից մեկը՝ հայտնելով, որ արդեն մի քանի օր է՝ որևէ մեկը չի մոտենում գործարանի տարածքին։

«Ինչպե՞ս կարող ես գնալ ու աշխատել այդ պայմաններում։ Կրակում են...բա երեխաները... վայ... չէ...։ Ավելի լավ է գնամ, փողոցն ավլեմ, քան գնամ կրակի դեմ կանգնեմ։ Բա երեխաներիս վիզը ծո՞ւռ մնա։ Ո՞վ իմանա՝ նորից սկսեն կրակել, հանկարծ որևէ մեկին կպնի կրակը։ Խուսափում ենք գործարանի տարածք գնալ։ Երեկ ամուսնուս հետ խոսում էինք՝ ասաց, որ էլ չի գնալու»,- ասաց նա։

Մեր զրուցակցի խոսքով՝ ադրբեջանական ագրեսիվ գործողությունների հետևանքով գյուղացիների մոտ վախի զգացում է առաջացել։ Ասում են՝ ամեն կերպ խուսափում են գործարանի կողմ թեքվել։

«Օրեր առաջ էլ փորձեցին մի քանի հոգով աշխատանք իրականացնել այնտեղ։ Սկսեցին նորից հանկարծակի կրակել։ Բոլորը հազիվ են կարողացել խուսափել կրակից ու փախչեն դաշտերը։ Մամայենքս մեր դիմաց են ապրում։ Դաշտից հետ գալիս են եղել, փամփուշտը մեքենայի վերևով է անցել, դե պատկերացրեք։ Թուրքի գործողությունները կարո՞ղ ես կանխատեսել»,- ասաց մեր զրուցակիցը։

Սահմանապահ գյուղի բնակչի խոսքով՝ ադրբեջանական կողմը չի հանգստանում։ Ամեն բան անում է՝ հնարավորինս բարդացնելու համար սահմանային բնակչի կյանքը, զրկելով ապրուստի տարրական միջոցներից ու պայմաններից։

«Ահավոր վիճակ է, գործ չկա։ Գործարանի բացվելիս մտածում էինք՝ աշխատանք կլինի, գումար կմտնի տուն, բայց ո՞ւր է, ոչ մի բան էլ չկա»,- ասաց նա։

Երասխում առկա իրավիճակի մասին ավելի վաղ արտահերթ զեկույց էր հրապարակել նաև ՀՀ Մարդու իրավունքների պաշտպանը՝ հնչեցնելով ադրբեջանական զինված ուժերի գնդակոծությունների հետևանքով մարդու իրավունքների շարունակական խախտումների մասին ահազանգը։

Աղբյուր` Փաստինֆո