Փաստ ինֆո

ՀՀ երկրորդ նախագահ Ռոբերտ Քոչարյանը, նրա կինը՝ Բելա Քոչարյանը, որդիները՝ Լևոն և Սեդրակ Քոչարյանները, նրանց կանայք՝ Սիրանուշ Քոչարյանը (Սիրուշո), Զարուհի Բադալյանը, դուստրը՝ Գայանե Քոչարյանը, նրա ամուսինը՝ Վիգեն Չատինյանը հրավիրվել են ՀՀ գլխավոր դատախազության ապօրինի գույքի ծագման բռնագանձման վարչություն։ Այս մասին «Փաստինֆո»-ն տեղեկանում է«Ազդարար» հարթակից։

Ըստ հայտարարության՝ Ռոբերտ Քոչարյանը և նրա ընտանիքի անդամները հրավիրվել են դատախազություն՝ օգոստոսի 1-ին։
Նշենք, որ դատախազությունում այժմ ուսումնասիրություններ են իրականացվում Ռոբերտ Քոչարյանին և նրա որդուն՝ Սեդրակ Քոչարյանին, պատկանող գույքի առնչությամբ։

Դատախազությունից ավելի վաղ հայտնել են, որ ապօրինի գույքի բռնագանձման վարույթի շրջանակներում դատարանի որոշմամբ արգելանք է դրվել նրանց գույքի նկատմամբ։ Դատախազության փոխանցմամբ՝ ուսումնասիրության նախնական արդյունքներով ապօրինի են դիտվել և ենթակա են բռնագանձման՝ 20 միավոր անշարժ գույք՝ առավելապես Երևան քաղաքի Կենտրոն վարչական շրջանում գտնվող շենքերում. 2 տրանսպորտային միջոց, մասնակցություն՝ հայաստանյան և արտասահմանյան 18 իրավաբանական անձերում, ավելի քան 1.5 միլիոն ԱՄՆ դոլարի ավանդներ և արժեթղթեր, շուրջ 10 միլիարդ դրամի ֆիզիկական և իրավաբանական անձանց տրամադրված փոխառություններ, շուրջ 22 միլիարդ դրամ, որն իրենից ներկայացնում է ապօրինի ծագում ունեցող դրամական միջոցների մնացորդի, բարեխիղճ երրորդ անձանց փոխանցված միջոցների և այլ ծախսված միջոցների հանրագումար, որը չի նույնականացվել:

Աղբյուր` Փաստինֆո