Փաստ ինֆո

Մարգարիտան ու Հերմինեն առավոտյան ժամը 8-ից ՄԱԿ-ի հայաստանյան գրասենյակի դիմաց են։ Լինելով հայ կին ու միաժամանակ մայր՝ երկուսն էլ միանգամից միացել են երեկվանից մեկնարկած նստացույց-հացադուլին՝ այդպես իրենց զորակցությունը հայտնելով հումանիտար աղետի մեջ հայտնված Արցախի մեր հայրենակիցներին։ Թե՛ Մարգարիտան, թե՛ Հերմինեն անչափահաս երեխաների մայր են։

Հերմինեն գրող է, ծնվել, ապրել ու ստեղծագործել է Արցախում։ Շրջափակումը կիսել է նաև իր ընտանիքը։ Մայրն ու բազմաթիվ հարազատներ Արցախում են, ինքը՝ իր փոքրիկ ընտանիքի հետ՝ Երևանում։

«Ես չգիտեմ՝ ինչպես կարող է հայ մայրն իր երեխային կերակրել շատ հանգիստ խճղով, եթե միևնույն ժամանակ Արցախում իր երեխաների պես 30 հազար երեխա արդեն քանի ամիս է՝ թերսնվում է, հղիները նույնպես նորմալ չեն սնվում, ու հաշված օրերից սով է լինելու այնտեղ։ Գոնե ներքին պարտքի զգացում պետք է ունենա ամեն մեկն իր հայրենակցի նկատմամբ։ Եթե դա լինի, ապա այստեղ, թե բողոքի այլ գործողության միանալով հաստատ դա կարտահայտվի»,-«Փաստինֆո»-ի հետ զրույցում ասում է Հերմինեն ու ցավով ավելացնում՝ առավոտից մինչև կեսօր գրեթե մարդ չի մոտեցել, որ գոնե մտահոգություն հայտնի պաշարման մեջ գտնվող հայրենակիցների վիճակի հետ կապված։

Մարգարիտան 1 տարեկան փոքրիկ ունի, կերակրող մայր է, բայց դա չի խանգարել նրան մեկ օրով՝ ի զորակցություն Արցախի փոքրիկների, հղիների ու պաշարման մեջ գտնվող մեր մյուս հայրենակիցների, հացադուլ անել։

«Տարբեր ակցիաներ կան ի աջակցություն Արցախի, բայց այսօր այս նախաձեռնությանը միացա, որպեսզի գոնե չնչին չափով անցնեմ այն զրկանքների միջով, ինչի միջով արդեն տևական ժամանակ անցնում են Արցախի մեր հայրենակիցները։ Այսպես՝ մեր մաշկի վրա զգալով, գուցե ավելի լավ հասկանանք, թե ինչ են զգում, ապրում մեր քույրերն ու եղբայրներն այնտեղ։ Սա նաև մեղքերը քավելու մի փոքր հնարավորություն է, քանի որ մենք բոլորս ենք մեղավոր այս վիճակի համար»,-ասում է Մարգարիտան։
Նշենք, որ ՄԱԿ-ի հայաստանյան գրասենյակի մոտ այս ակցիան մեկնարկել է երեկ՝ բանաստեղծ Հասմիկ Սիմոնյանի և գրականագետ Անուշ Սեդրակյանի նախաձեռնությամբ։

Հիմնական նպատակը միջազգային կազմակերպությանը դրդելն է, որ պարեն հասցնի Արցախ՝ գոնե երեխաների ու հղիների համար։
Նախաձեռնությունը մեկնարկել են մտավորականները, բայց ամենևին պարտադիր չէ, որ շարունակեն միայն նրանք․ տարբեր ոլորտներում աշխատող կանայք, մայրեր, ովքեր ցանկանում են միանալ, այդպես հայտնել Արցախի մեր հայրենակիցներին իրենց զորակցությունը, ազատ են միանալու։

Ի դեպ, թե՛ Հերմինեն, թե՛ Մարգարիտան, նախաձեռնության մասին տեղեկացել են ֆեյսբուքյան գրառումներից։
Նրանք համոզված են՝ եթե ՄԱԿ-ի աշխատակիցները տեսնեն, որ գրասենյակի դիմաց մարդկանց հոսքը չի դադարում, եթե զգան, որ Արցախի պաշարված 120 հազար մարդու համար Երևանում պայքարում են ոչ թե 5 կամ վեց հոգի, այլ մի քանի հազար մարդ, ապա անկասկած շատ արագ հումանիտար օգնություն է հասցվելու Արցախ, քանի որ ՄԱԿ-ն ունի նման լիազորություն։

Աղբյուր` Փաստինֆո