Փաստ ինֆո

Հուլիսի 19-ին հրավիրված Դատավորների ընդհանուր ժողովին ԲԴԽ անդամի ընտրությունը տեղի կունենա։ Վարչական դատարանը՝ դատավոր Դանիել Դանիելյանի նախագահությամբ, թեև վարույթ է ընդունել Երևանի քրեական դատարանի դատավոր Դավիթ Բալայանի ներկայացրած հայցն՝ ընդդեմ Դատական դեպարտամենտի ղեկավարի, սակայն մերժել է հայցի ապահովման միջոց կիրառելու մասին միջնորդությունը։ Միևնույն ժամանակ որոշել է գործով Վճռաբեկ դատարանի նախագահ Լիլիթ Թադևոսյանին ներգրավել որպես երրորդ անձ։

Հիշեցնենք, որ Մեսրոպ Մակյանի՝ ԲԴԽ անդամի լիազորությունները հունիսի 16-ին դադարեցվել են՝ սեփական դիմումի համաձայն և, ըստ այդմ, ԲԴԽ-ում առաջացել է դատավոր անդամի թափուր տեղ, որի ընտրության օրակարգով Վճռաբեկ դատարանի նախագահի հրամանով 2023թ հուլիսի 19-ին՝ ժամը 16.00-ին դատավորների ընդհանուր ժողով է հրավիրվել։ Ինչպես պարզվեց՝ ծանուցումներ չեն ստանա Երևանի քրեական դատարանի դատավորները, ինչն առաջին անգամ չէ։ Ապրիլի 7-ին հրավիրված Դատավորների ընդհանուր ժողովին ևս Դատական դեպարտամենտը ծանուցագրեր ուղարկել էր միայն Սնանկության դատարանի դատավորներին՝ պատճառաբանելով, որ անհրաժեշտ է ԲԴԽ-ում ապահովել նաև Սնանկության դատարանի դատավորների մասնակցությունը։ Ինչպես նախորդ, այնպես էլ՝ այս անգամ ԲԴԽ-ից ստացված պարզաբանման համաձայն՝ անհարժեշտ է ԲԴԽ-ում ապահովել մարզերից դատավորների մասնակցությունը, մինչդեռ ակնհայտ է, որ ԲԴԽ-ն խուսափում է Երևանի ընդհանուր իրավասության քրեական դատարանի դատավորների մասնակցությունից, քանի որ Երևանում կան դատավորներ, որոնք գործում են անկախ իշխանություններին չի հաջողվում նրանց կառավարել եւ նրանց՝ ԲԴԽ-ում հայտնվելը, մեղմ ասած, խնդրահարույց կլինի Կարեն Անդրեասյանի և իշխանությունների համար։ Ըստ այդմ, որոշել են մարզերից հեշտ ենթարկվող դատավոր ներառել ԲԴԽ կազմում։

Երևանի ընդհանուր իրավասության դատարանի դատավոր Դավիթ Բալայանը պնդում է՝ խախտվել է իր՝ ԲԴԽ անդամ ընտրվելու իրավունքը և հուլիսի 6-ին հայցադիմում է ներկայացրել Վարչական դատարան՝ ընդդեմ Դատական դեպարտամենտի ղեկավարի՝ պահանջելով ՀՀ դատական դեպարտամենտի ղեկավարի՝ ԲԴԽ անդամի ընտրության համար քվեաթերթիկում ներառելու ծանուցումը միայն մարզերի առաջին ատյանի ընդհանուր իրավասության դատարանների դատավորներին ուղարկելու գործողությունը ոչ իրավաչափ ճանաչել և որպես հետևանք՝ ԲԴԽ անդամի ընտրության համար քվեաթերթիկում ներառելու ծանուցում ուղարկել առաջին ատյանի դատարանների բոլոր այն դատավորներին, ովքեր բավարարում են ԲԴԽ դատավոր անդամի թեկնածուի համար սահմանված պահանջներին։

Վարչական դատարանը՝ դատավոր Դանիել Դանիելյանի նախագահությամբ, թեև վարույթ է ընդունել դատավորի հայցը, սակայն մերժել է հայցի ապահովման միջոց կիրառելու միջնորդությունը, որով դատավոր Բալայանը միջնորդել էր արգելել դատավարության մասնակից, երրորդ անձ Դատավորների ընդհանուր ժողովին 19.07.2023թ. նիստով Բարձրագույն դատական խորհրդի անդամի ընտրությունը կամ ժամանակավորապես բավարարել հայցվորի պահանջը: Դատավորն արձանագրել էր, որ հայցի ապահովման միջոց չկիրառելու և Դատավորների ընդհանուր ժողովի կողմից միայն մարզային դատարանների դատավորներից ԲԴԽ անդամ ընտրելու դեպքում անհնարին կդառնա սույն գործով հայցը բավարերելու մասին հնարավոր դատական ակտի կատարումը, քանի որ այն ինքնին կդառնա առարկայազուրկ: Բացի այդ, հայցի ապահովում չկիրառելու և հայցի բավարարման դեպքում խնդրահարույց կլինի Բարձրագույն դատական խորհրդի լեգիտիմության հարցը, քանի որ եթե ՀՀ դատական դեպարտամենտի ղեկավարի գործողությունը ճանաչվի ոչ իրավաչափ, ապա կասկածի տակ կդրվեն Բարձրագույն դատական խորհրդի նոր անդամի կողմից ստորագրված Բարձրագույն դատական խորհրդի բոլոր որոշումները:

Դատարանը, այդուհանդերձ, մերժել է հայցի ապահովում կիրառելու մասին միջնորդությունը։ Միևնույն ժամանակ, Վարչական դատարանը սեփական նախաձեռնությամբ որոշում է կայացրել Վճռաբեկ դատարանի նախագահ Լիլիթ Թադևոսյանին որպես երրորդ անձ ներգրավելու մասին։

Նախնախական դատական նիստը նշանակվել է սեպտեմբերի 26-ին, թե տվյալ պայմաններում որքանով արդարադատությունն ուշացված չի լինի՝ ցույց կտա ժամանակը, այդուհանդերձ, ԲԴԽ անդամի ընտրության հարցը չհետաձգվեց, ըստ այդմ, հարցն արդեն դատավորների դաշտում է։

Հեղինակ՝ Իզաբել Սահակյան

Աղբյուր` Փաստինֆո