Փաստ ինֆո

«Ես չէի էլ կասկածում, որ Արա Խզմալյանին են խցկելու որպես Մատենադարանի տնօրեն։ Մատենադարանը հայկական մշակույթի ստրատեգիական կենտրոնն է, բայց քանի որ սրանք Մատենադարանը ոչնչացնելու ծրագիր ունեն, ահա, այնտեղ նշանակում են մի մարդու, ով առանց աչքը թարթելու, վերջին 3 -4 տարիներին՝ ԿԳՄՍ փոխնախարարի պաշտոնում ոչնչացրել է մեր մշակույթը, իսկ ոչնչացնելով Մատենադարանը, մեր ժողովրդին զրկելու են իր պատմական ինքնասիրությունից»,- «Փաստինֆո» լրատվականի հետ զրույցում ասել է գրականագետ Սերժ Սրապիոնյանը։

Հիշեցնենք՝ «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ հիմնադրամի հոգաբարձուների խորհուրդն այսօր ՀՀ ԿԳՄՍ նախարարի տեղակալ Արա Խզմալյանին միաձայն ընտրել է Մատենադարանի տնօրեն։

Տնօրենի թափուր տեղի համար հայտ էին նեկայացրել Մատենադարանի տնօրենի ԺՊ Կարեն Մաթևոսյանը, ԿԳՄՍ փոխնախարար Արա Խզմալյանը և պատմական ու բանասիրական գիտությունների դոկտոր, Մատենադարանի գիտաշխատող Արծրունի Սահակյանը։

Արծրունին Սահակյանը ինքնաբացարկ է հայտնել։ Պայքարը գնացել է Կարեն Մաթևոսյանի և Արա Խզմալյանի միջև։

Սերժ Սրապիոնյանը նկատում է՝ շատ կցանկանար Մատենադարանի նոր տնօրենի պաշտոնում տեսնել հենց Արծրուն Սահակյանին և հարցադրում կատարում՝ ինչո՞ւ օրվա իշխանությունները փոխեցին «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ հիմնադրամի տնօրենի ընտրության կարգը ու ինքն էլ պատասխանում՝ որպեսզի հիմքերից քանդեն հայ ինքնության ողնաշար հանդիսացող գիտահետազոտական այդ հեղինակավոր կենտրոնը։ «Դուք լսեցի՞ք, որ նույն Մատենադարանի կոլեկտիվը կամ այնտեղի երկարամյա աշխատակիցներից որևէ մեկն այս օրերին բողոքի մի խոսք ասի կամ ընդդիմություն ցուցաբերի Մատենադրանին բաժին հասած այս ճակատագրի վերաբերյալ…Ես չլսեցի։ Ավելին, համոզված եմ և սա իմ ողջամիտ կասկածն է, որ Մատենադարանի գիտաշխատողներն ու աշխատակիցները համոզված են, որ հեսա իրենց սիրելի ժպտերես Արա Խզմալյանը կվերադառնա և իրենց համար ավելի լավ կլինի։ Մեր ժողովուրդը մի խոսք ունի՝ «Մի տարվա ապրուստը տվեց մի փոր հացի», ճիշտ այս իրավիճակի առաջ է հայտնվելու Մատենադարանը։ Իրենց մի փոր հացի համար հաշտվելու են, որ Արա Խզմալյանը հիմքերից քանդի Մատենադարանը։ Հազար անգամ ափսոսում են, որ տնօրենի պաշտոնում չընտրվեց ուղնուծուծով գիտնական, կրկնակի դոկտոր Արծրուն Սահակյանը, ում գիտական աշխարհայացքը ձևավորվել էր Մատենադարանում և նա, հենց, այն անհատականությունն էր, որ կարող էր լավագույնս պաշտպանել Մատենդարանի շահերն, անգամ օրվա այսպիսի իշխանությունների գոյության պայմաններում։ Հազար անգամ ափսոսում և ցավում եմ»,- ասում է պարոն Սրապիոնյանը։

Արա Խզմալյանը պարզ պատեհապաշտ մեկն է, որին կյանքի աստիճաններով բարձրացրեց Մատենադարանի լուսահոգի նախկին տնօրեն Հրաչյա Թամրազյանը, վստահելով նրան՝ իբրև երիտասարդ կադրի, փոխարենն՝ ի պատասխան, ստանալով իր բոլոր տեսակի սկզբունքներին դավաճանած մի պատեհապաշտի, ասում է գրականագետը և հավելում.«Մատենադարանը երբեք այսքան չպաշտպանված չի եղել, ինչպես որ մեր երկիրն ու դրա սահմաններն են այսօր։ Պատեհապաշտների մի ամբողջ բանակ այսօր հարձակվել է հայ ժողովրդի գոյատևման լծակների վրա և սոված մորեխի պես խժռում է մեր ինքնությունն ամուր պահող սյուներն ու դրանց արմատները»,- ասում է Սերժ Սրապիոնյանը։

Ամփոփելով թեման՝ գրականագետը ահազանգ է հնչեցնում՝ սպասենք, որ առաջիկայում, հայտնի և անհայտ պատճառներով, Մատենադարանից խիստ կարևոր մի շարք արժեքներ, հանկարծ, կանհետանան, Մատենադարանը կհայտարարվի դժբախտ և դժգույն մի կառույց, որ պետբյուջեյից ավելորդ աշխատավարձ է խլում, ինչպես բուհերն, այնպես էլ՝ Մատենադարանը կօպտիմալիզացնեն ու կտանեն Աշտարակի կամ մեկ այլ մարզի գերեզմանոցների կողքին գտնվող մի կիսավեր գոմ կվերածեն շենքի, Մատենադարանից մնացած եղած – չեղածը կլցնեն դրա մեջ, մի պահակ կդնեն ու կասեն՝ սա է հիմա ձեր Մատենադարանը, բավարարվեք այսքանով»։

Աղբյուր` Փաստինֆո