Փաստ ինֆո

Քաղաքական ընդդիմադիր ուժերի մի շարք ներկայացուցիչներ ևս այսօր Վերածննդի հրապարակում էին։ Այնտեղ հնչեցված թեզեր-ահանզանգերը, միանշանակ, ճիշտ էին։ Մտահոգիչ էր, սակայն, այն, որ Արցախում ստեղծված իրավիճակի գլխավոր պատասխանատուին՝ ՀՀ վարչապետին, հասցեական պահանջ չի հնչեցվել Ստեփանակերտից։ Այդ մասին «Փաստինֆո»-ի հետ զրույցում ասաց Արցախի «Արդարություն» խմբակցության ղեկավար Դավիթ Գալստյանը։

«ՀՀ ներկա իշխանությանը կոնկրետ որևէ խոսք չուղղելու պատճառը, ենթադրում եմ, այն է, որ կա՛մ դրանից որևէ ակնկալիք չունեն, կա՛մ էլ՝ Երևանից եղել է նման հրահանգ՝ որևէ կերպ իրենց անունները չշոշափել։ Եթե երկրորդ տարբերակը լինի իրական պատճառը, նշանակում է, որ շատ վտանգավոր գործընթաց է ընթանում, բայց ես ուզում եմ հավատալ, որ, այնուամենայնիվ, մտածել են, որ որևէ արդյունք չի տալու Փաշինյանին պահանջ ներկայացնելը, քանի որ բազմիցս համոզվել ենք, որ նա ձեռքերը լիովին լվացել է Արցախից ու ականջալուր չի լինում Ստեփանակերտից եկող կոչերին, զգուշացումներին։ Թեկուզ և այդպես, այս իրավիճակի թիվ մեկ մեղավորին շրջանցելը սխալ է, անթույլատրելի։ Ըստ էության՝ նույնն անում է Փաշինյանը, երբ բոլորին մեղադրում է՝ բացի իրենից։ Եթե Արցախի իշխանությունները հասկանում են, որ Փաշինյանը հակահայ ծրագիր է կյանքի կոչում և միացել են դրան, ապա շատ ավելի վտանգավոր իրավիճակի մեջ կարող ենք հայտնվել»,-նշեց Գալստյանը։

Ի տարբերություն պաշարման անցած յոթ ամիսների ընթացքում մի քանի անգամ Արցախում անցկացված համաժողովրդական հանրահավաքների, այս անգամ Արցախի ընդդիմադիր քաղաքական ուժերի հետ օրակարգի որևէ հարց չի քննարկվել։ Գալստյանի հավաստմամբ՝ ամեն ինչ բացառապես իշխանությունն է կազմակերպել, իսկ իրենք միացել են երկու պատճառով՝ 1․ իրապես իրավիճակը աղետալի է և ձեռքերը ծալած նստելն անկարելի է, եռակողմ համաձայնագրի բոլոր կողմերին պետք է պարտադրել կատարել ստանձնած պատավորությունները, և երկրորդ՝ որտեղ ժողովուրդը՝ այնտեղ իրենք։

«Բոլոր քայլերը, նախաձեռնություները, որոնք ուղղված են այն իրավիճակից դուրս գալուն, ողջունելի են, բայց կարևոր է, որ դրանք չլինեն ուղղակի քող, չարվեն այլ նպատակներով կամ հրահանգներով։ Համենայնդեպս, մինչև հիմա ԱԺ-ից ինչքան հայտարարություններ ենք հնչեցրել, փորձել ենք հասցեական պահանջներ ներկայացնել։

Այս անգամ , կրկնում եմ, թիվ մեկ մեղավորի անունը չշոշափելն անգամ լուրջ մտավախություններ է առաջացնում։ Եթե իշխանությունը մեկնաբանի, թե ինչն է ՀՀ ղեկավարին հասցեական պահանջ չներկայացնելու իրական պատճառը, շատ բան պարզ կդառնա և, եթե հաստատվի, որ ուղղակի անօգուտ են համարել, շարժումը հաջողություն կունենա»,-ասաց Արցախի ԱԺ պատգամավորը և հավելեց, որ Հայաստանի հասարակությանն ու Սփյուռքին ուղղված կոչերն ու պահանջները շատ տեղին էին․ անտարբեր լինել ազգակիցների զրկանքների նկատմամբ ու չարձագանքել նրանց՝ Մայր Հայաստանին միանալու ճիգերին, անթույլատրելի է։

Աղբյուր` Փաստինֆո