Փաստ ինֆո

ԱԱԾ աշխատակիցները երեկ խուզարկել են Արցախի հերոս, գեներալ Վիտալի Բալասանյանի տունը՝ առանց դատարանի որոշման, ինչին ընդդիմացել է Բալասանյանը՝ պահանջելով ներկայացնել համապատասխան փաստաթղթերը, արդյունքում՝ անհամաչափ ուժի կիրառմամբ բերման ենթարկվել ԱԱԾ-ի կողմից։

Հիշեցնենք, որ Արցախում տիրող լարված իրավիճակի պայմաններում երեկ ԱԱԾ-ն իր իսկ տանից ձերբակալել է Վիտալի Բալասանյանին, նրա որդուն, եղբորը, քեռորդուն։ Արցախի դատախազությունն առ այս պահը որևէ անդրադարձ չի կատարել նրանց ձերբակալությանը, իսկ Բալասանյանի ձերբակալության վերաբերյալ մամուլում ոչ պաշտոնական և խիստ հակասական լուրեր շրջանառվեցին, որոշ ԶԼՄ-ներ Բալասանյանի ձերբակալությունը փորձեցին կապել ենթադրյալ կոռուպցիոն բնույթի գործի հետ՝ նշելով, թե Բալասանյանն իբրև մեղադրվում է փողերի լվացման մեջ, մինչդեռ, ինչպես պարզվեց՝ Վիտալի Բալասանյանի ձերբակալությունը որևէ առնչություն չունի պաշտոնեաան պարտականությունների կատարման հետ։

Քրեական գործը, որի շրջանակներում երեկ խուզարկություն էր իրականացվել, վերաբերում է Բալասանյանի որդու կողմից վարկն իբրև ոչ նպատակային օգտագործելու հետ։ Մասնավորապես, Արցախի դատախազությունը երեկ հաղորդագրություն էր տարածել, ըստ որի՝ ԱՀ գյուղի և գյուղատնտեսության աջակցության հիմնադրամի հոգաբարձուների խորհրդի 14.06.2021թ. որոշմամբ Ասկերան քաղաքի բնակիչ Ա. Բ.-ին նպատակային փոխառության պայմանագրով տրամադրվել է 74.500.000 ՀՀ դրամ փոխառություն՝ մեղվաընտանիքներ ձեռք բերելու նպատակով, սակայն փոխառու Արթուր Բալասանյանի կողմից նպատակային փոխառության պայմանագրով տրամադրված գումարը օգտագործվել է ոչ նպատակային, դրանք չեն ուղղվել պայմանագրի պարտադիր պայման հանդիսացող մեղվաընտանիքների ձեռք բերմանը, ինչի հետևանքով պետությանը պատճառվել է խոշոր վնաս: Ընդ որում, քրեական գործը հարուցվել է նախօրեին՝ 2023թ. հուլիսի 12-ին, սակայն Բալասանյանի որդու և մյուսների ձերբակալությունը ևս այս գործի շրջանակներում չէ։
Երեկ ԱԱԾ-ն խուզարկություն է իրականացրել Վիտալի Բալասանյանի տանը՝ առանց դատարանի համապատասխան որոշման։ Փաստաբան Ռաֆայել Մարտիրոսյանը «Փաստինֆո»-ի հետ զրույցում հայտնեց, որ Վիտալի Բալասանյանին մեղադրանք առաջադրված չէ, նա կասկածվում է ԱՀ Քրեական օրենսգրքի 337-րդ հոդվածի 1-ին մասով՝ իշխանության ներկայացուցչի նկատմամբ բռնության սպառնալիքի հատկանիշներով։

«Միջադեպ, որպես այդպիսին, չենք կարող համարել այն, որ Բալասանյանը ԱԱԾ աշխատողի առջև իրավական ռեժիմի բացահայտման պահանջ է ներկայացրել, մասնավորապես, խուզարկություն կատարելու թույլտվության վերաբերյալ, բայց որևէ փաստաթուղթ չի ներկայացվել։ Վիտալի Բալասանյանը նշել է, որ դա սեփականության իրավունքով իրեն պատկանող բնակելի տունն է, հետևապես, խուզարկություն կատարելու անցկացման հիմքերի և պայմանների մասին, որոնվող իրերի մասին պետք է տեղեկություն հաղորդվի։ Այսինքն՝ առաջադրված պահանջները դատավարությամբ պահանջվող պայմանների համահունչ է եղել, բայց որևէ փաստաթուղթ չի ներկայացվել, չի բացատրվել՝ դատարանի կողմից թույլտվություն կա, թե ոչ։ Եթե անգամ դատարանի թույլտվություն չկա, նման դեպքերում գործում է Հետախուզության մասին օրենքով սահմանված իրավական ռեժիմի պայմանները»,- ասաց փաստաբանը։

Փաստաբանը բողոքարկել է Վիտալի Բալասանյանի ձերբակալման որոշման դեմ։

Հարցին՝ ինչով է պայմանավորված, որ հենց այս փուլում են հետապնդումներ իրականացվում Վիտալի Բալասանյանի, նրա որդու նկատմամբ՝ փաստաբանը պատասխանեց՝ նշելով, որ դա առաջին դեպքը չէ. այս գործընթացը շարունակվում է դեռևս մայիսի 5-ից, երբ Վիտալի Բալասանյանն ազատվել է պաշտոնից։ Մասնավորապես, դատախազությունը մայիսի 5-ին որոշում է կայացրել Բալասանյանի պաշտոնավարումը դադարեցնելու վերաբերյալ, որը բողոքարկվել է առաջին ատյանի դատարան և բավարարվել, սակայն Վերաքննիչ դատարանը, բավարարելով դատախազի բողոքը, բեկանել է առաջին ատյանի դատարանի որոշումը։

Հեղինակ՝ Իզաբել Սահակյան

Աղբյուր` Փաստինֆո