Փաստ ինֆո

Արցախի շրջափակումը հասել է օրհասական կետի․ լրջագույնս վտանգված է 120 հազար մարդու՝ այդ թվւմ 30 հազար երեխաների, 20 հազար տարեցների կյանքը։ Գտնվելով շրջափակման մեջ և հունիսի 15-ից ամբողջությամբ կտրվելով հումանիտար հասանելիությունից՝ մեր ժողովուրդը կանգնել է թերսնուցման, սովի, Ադրբեջանի կողմից անթաքույց իրականացվող էթնիկ զտման, բռնի հպատակեցման և ցեղասպանության իրական սպառնալիքի ներքո։ Այդ մասին Ստեփանակերտի Վերածննդի հրապարակում մեկնարկած անժամկետ ժողովրդական շարժմանը հայտարարեց Արցախի ՄԻՊ Գեղամ Ստեփանյանը։

«Իրավիճակի ամսին երկար չեմ խոսի, որովհետև խոսել եմ յոթ ամիս շարունակ, ահազանգել եմ բոլորին, խոսել եմ շատերի հետ՝ ամեն հանդիպման ժամանակ զրուցակիցներիցս ակնկալելով հարգանք մեր ժողովրդի նկատմամբ, հարգանք մեր ժողովրդի կյանքի և սեփական հայրենիքում խաղաղ ապրելու իրավունքի նկատմամբ, ակնկալել եմ կարեկցանք, ըմբռնում այն ամենի, ինչ կատարվում է մեզ հետ, խոսել եմ խնդրանքով, ցասումով։ Այսօր արդեն ահազանգի կոչնակը հնչեցնելու հերթական պահն է, որն այսօր այստեղ հավաքվելով միասին պետք է անենք։ Դիմում եմ միջազգային հանրության բոլոր դերակատարներին․ ասում եք մարդու իրավունքնե՞ր․․․

Ես ինչպե՞ս նայեմ այս ժողովրդի աչքերին և ասեմ, որ իրենք էլ ունեն իրավունքներ, ես ինչպե՞ս նայեմ թերսնուցման մեջ գտնվող հղի կնոջ աչքերին, որի երեխան կարող է արատներով ծնվել, ինչպե՞ս նայեմ այն մայրերի աչքերին, որոնց ամենամեծ երազանքն իրենց երեխաների համար մի բուռ միրգ կամ քաղցրավենիք հայթայթելն է, ինչպե՞ս նայեմ հերթերում կանգնած այն մարդկանց աչքերին, որոնք ժամերով հերթ են կանգնում, որ շաքարավազ կամ ձեթ ստանան։ Եվ վերջապես, ես ինչպե՞ս նայեմ այս հողակտորի համար իր ամենաթանկը տված զոհված մոր աչքերին, որն ահաբեկչված հայացքով նայում է ինձ՝ վախենալով, որ կկորցնի իրեն մնացած վերջին սրբությունը՝ զավակի գերեզմանը։ Պատասխանեք ինձ, ես ուզում եմ, որ դուք պատասխանեք նրանց, որովհետև ես այլևս պատասխաններ չեմ գտնում։ Գեղեցիկ ու շքեղ դահլիճներում մարդու իրավունքներից խոսելը մի բան է, այդ իրավունքների պաշտպանությունը գործնական քայլերով ապացուցելը՝ մեկ այլ բան»,-շեշտեց Արցախի ՄԻՊ-ը։

Դիմելով միջազգային դերակատաներին ու ռուս խաղաղապահներին՝ Գեղամ Ստեփանյանը պահանջեց մերկապարանոց՝ «կոչ ենք անում, մտահոգված ենք․․․» բնույթի հայտարարություններից ու հրադադարի խախտումների արձանագրումներից դուրս գալ ու դիմել գործնական քայլերի՝ Արցախի ժողովրդի գլխին կախված գոյաբանական վտանգը չեզոքացնելու համար։

Աղբյուր` Փաստինֆո