Փաստ ինֆո

Շաբաթ օրը՝ հուլիսի 15-ին, Բրյուսելում նախատեսված է իմ հանդիպումը Եվրամիության խորհրդի նախագահի և Ադրբեջանի նախագահի հետ։ Ես հաստատել եմ իմ մասնակցությունն այդ հանդիպմանը։ Հույս ունեմ հանդիպման ընթացքում առաջընթաց արձանագրել խաղաղության պայմանագրի շուրջ բանակցություններում։ Այդ մասին Կառավարության նիստի աշխատանքներից առաջ ունեցած իր ելույթում ասաց Նիկոլ Փաշինյանը։

Անդադառնալով Ադրբեջանի կողմից ամբողջությամբ արգելափակված Լաչինի միջանցքն ապաշրջափակելու միջազգային դատարանի երկու որոշումներին, վարչապետը նշեց․

«Արդարադատության միջզգաին դատարանի փետրվարի 22-ի և հուլիսի 6-ի նույնաբովանդակ որոշումների միջև որոշակի նյուանսային տարբերություններ կան։ Եթե փետրվարին Ադրբեջանի կառավարությունն ասում էր, թե «բնապահպանական ակցիան» ինքը չի կազմակերպել, այլ քաղաքացիական հասարակության գործողություն է, հիմա նման բան ասելու հնարավորություն չունի, քանի որ Լաչինի միջանցքը ներկայումս արգելափակված է բացառապես Ադրբեջանի պետական կառույցների գործողությունների պատճառով։ Հետևաբար արդարադատության միջազգային դատարանի որոշմամբ է՛լ ավելի է ամրապնդվում Ադրբեջանի կառավարության պատասխանատվությունը ԼՂ-ում խորացող հումանիտար ճգնաժամի համար»։

Նրա խոսքով՝ Արդարադատության միջազգաին դատարանի պարտադիր իրավական ուժ ունեցող որոշումը հնարավորություն է տալիս խնդրի շուրջ ավելի մեծ միջազգային կոնսոլիդացիա ապահովել՝ Ադրբեջանի կոմղից ԼՂ-ում վարվող էթնիկ զտմանը հակազդելու համար։
Փաշինյանը նաև շեշտեց, որ, այնուամենայնիվ, Ադրբեջանի «բնապահպանական» ակտիվությունը շարունակվում է․ հիմա էլ փորձում է ՀՀ-ին բնապահպանական մեղադրանքներ ներկայացնել պաշտոնական և ոչ պաշտոնական մակարդակով։

«Սրա համար Ադրբեջանը ՀՀ-ին վերագրում է հանքավայրեր, որոնք գոյություն չունեն, հիշատակում է կոնվենցիաներ, որոնք վերաբերելի չեն։ ՀՀ պետական և մասնավոր հատվածի կազմակերպությունները հատ առ հատ ի ցույց են դնում և կշարունակեն ի ցույց դնել Ադրբեջանի մեղադրանքների մտացածին լինելը»,-ասաց Փաշինյանը և հավելեց, որ աշխարհի հեղինակավոր համալսարաններից մեկի հրապարակած զեկույցի համաձայն՝ էկոլոգիապես ամենամաքուր երկրների վարկանիշային աղյուսակում 2022թ․ ցուցանիշներով Հայաստանը 56-րդ տեղում է, իսկ Ադրբեջանը՝ 104-րդ։

Աղբյուր` Փաստինֆո