Փաստ ինֆո

Հոգեբանական աջակցության ծառայության մասնագետ Եկատերինա Իգոնինան «Իզվեստիային» պատմել է, թե ինչ կետեր պետք է հաշվի առնել արձակուրդը պլանավորելիս, որպեսզի այն հագեցած լինի և մարդը դրանից վերադառնա հնարավորինս հանգստացած։ Նա նաև պատմել է, թե ինչ սխալներից պետք է խուսափել:

Մասնագետի խոսքով՝ լինում են դեպքեր, որ մարդն արձակուրդից էլ ավելի հոգնած է վերադառնում և դրանից խուսափելու համար առաջարկել է հաշվի առնել մի շարք կետեր։

Ըստ հոգեբանի, եթե ընտանիքը մեկնում է ճամփորդության, նախընտրելի է նախապես քննարկել բոլորի ցանկությունները։ Ժամանակին փոխզիջման գալը կօգնի ամեն ինչ կազմակերպել այնպես, որ բոլորը կարողանան դրական լիցքեր ստանալ:

Հնարավորինս շատ տեսարժան վայրեր այցելելու ձգտումը կարող է վերածվել մրցավազքի, ինչը լրացուցիչ հոգնածության պատճառ կարող է դառնալ՝ զգուշացնում է մասնագետը։

«Արձակուրդի հիմնական առավելություններից մեկը ազատությունն է, այնպես որ աշխատեք ձեզ կոշտ շրջանակի մեջ չդնել»,-խորհուրդ է տալիս Իգոնինան:

Միևնույն ժամանակ հոգեբանը նշում է, որ հանգստի վայրի և տևողության ընտրության ժամանակ անհրաժեշտ է ուշադրություն դարձնել կեցության պայմաններին և բժշկական օգնության առկայությանը։

Մասնագետը նաև խորհուրդ է տվել գրագետ ձևով կասեցնել աշխատանքային գործընթացը՝ ավարտին հասցնելով առաջադրանքներն այնպես, որ հանգստի ժամանակ կարիք չլինի կազմակերպել կիսատ մնացած աշխատանքը։ Ավելին՝ Իգոնինան առաջարկում է աշխատանքային կոնտակտներով հեռախոսը թողնել տանը։

Մեկ այլ կարևոր կետ, որը նշում է Իգոնինան՝ արձակուրդների ժամանակ կոնֆլիկտային շփումներից խուսափելն է։

«Եղեք ճկուն և հնազանդ ձեր սիրելիների հետ: Նույնիսկ փոքր խայթոցները կարող են փչացնել ամեն ինչ: Փորձեք լինել ընկերասեր և բաց երկխոսության համար։ Հրաժարվեք «իդեալական» արձակուրդ հաշվարկելուց. բոլոր ֆորսմաժորները և դժվարությունները կանխատեսելու փորձը կարող է ավելորդ անհանգստություն առաջացնել»։

Հոգեբանը նաև կարևոր է համարում նախապես մտածելը, թե ինչ պետք է տանել ձեզ հետ արձակուրդի ժամանակ։

«Ընտրեք հարմարավետ հագուստ և աքսեսուարներ։ Անկախ նրանից, թե արձակուրդի որ տեսակն է նախընտրելի, մի հրաժարվեք զգեստապահարանի այն իրերից, որոնք ձեզ դուր են գալիս»,- նշել է Իգոնինան ու միաժամանակ խորհուրդ տվել շատ հագուստ չվերցնել։ Փորախենը նա առաջարկում է մի քանի իր պարտադիր ունենալ՝ արևապաշտպան քսուք, անձրևանոց, միջատների խայթոցի դեմ միջոցներ։

«Ավելորդ չի լինի նաև ձեզ հետ կանխիկ գումար ունենալը»,- ամփոփել է մասնագետը։

Աղբյուր` Փաստինֆո