Փաստ ինֆո

ՀՀ-ում հանրային գործիչների գաղտնալսումներն իրականացվում են իշխանությունների թողտվությամբ կամ նախաձեռնությամբ։

Հիշեցնենք, որ Amnesty International իրավապաշտպան միջազգային կազմակերպությունը 2023թ. մայիսի 25-ին հայտնել էր, որ հայաստանցի առնվազն 13 գործիչ, այդ թվում՝ լրագրողներ և իրավապաշտպաններ, հայտնվել են Pegasus լրտեսող ծրագրերի թիրախում։ Այդ անձանց ցուցակում եղել են մի շարք հասարակական-քաղաքական գործիչներ, այդ թվում՝ ԱԳՆ նախկին խոսնակ Աննա Նաղդալյանը։

Գաղտնալսումների հերթական ալիքի մասին հայտնի դառնալուց հետո «Փաստինֆո»-ն դեռևս մայիսի 30-ին գրավոր հարցում է ուղարկել ՀՀ գլխավոր դատախազություն՝ պարզելու, թե արդյո՞ք ուսումնասիրություն իրականացվում է՝ առնվազն 13 գործի գաղտնալսման դեպքերի վերաբերյալ հրապարակումների առթիվ, արդյոք քրեական վարույթ նախաձեռնվել է, քննություն իրականացվու՞մ է պարզելու, թե որ երկրի կողմից է իրականացվում գաղտնալսումը և արդյո՞ք դիտարկվում է Ադրբեջանի իշխանությունների կողմից «Պեգասուսը» Հայաստանում որպես կիբեռզենք օգտագործելու վարկածը, արդյո՞ք ՀՀ իշխանությունները ձեռք բերել են այդ ծրագիրը, թե ոչ։ Դատախազությունը, սակայն, որևէ պատասխան չի ներկայացրել՝ ասելով, թե հարցումը վերահասցեագրել են ԱԱԾ-ին, այսինքն՝ գնդակն ուղարկելով ԱԱԾ դաշտ։

«Ձեր կողմից ՀՀ գլխավոր դատախազին հասցեագրված 30.05.2023թ հարցումը ստուգման նպատակով ուղարկվել է ՀՀ ԱԱԾ։ Արդյունքների մասին կտեղեկացվեք լրացուցիչ»,- հունիսի 2-ին հայտնել էին դատախազությունից՝ կարծես ձեռքերը լվալով գուցե ցավոտ հարցից։ Այսօր արդեն հուլիսի 13-ն է ու ոչ մի պատասխան չենք ստացել։

ԱԱԾ մամուլի ծառայությունից մեկ անգամ պատասխանել են հեռախոսազանգին, ինչը վերջին շրջանում ԱԱԾ-ի կողմից տեղեկատվական խայտառակ քաղաքականության ֆոնին հազվադեպ հանդիպող բավականին դրական երևույթ է, սակայն, ինչպես պարզվեց՝ ԱԱԾ-ն տեղյակ չէր նման բովանդակությամբ գրությունից, ստիպված՝ իրազեկեցինք, իսկ իրազեկելուց հետո՝ ԱԱԾ-ի հետ կապ հաստատել չի հաջողվել. հեռախոսազանգերին միանում է հեռախոսային ավտոմատ «ինքնապատասխանիչը», իսկ ձայնային հաղորդագրությունները մնում են անպատասխան։ Այսօր կրկին դիմեցինք դատախազություն՝ փորձելով հասկանալ, ի վերջո, որևէ անձի նկատմամբ քրեական հետապնդում հարուցվել է դատախազության կողմից, սակայն կրկին առաջարկեցին գրավոր հարցում իրականացնել, թեև նախորդ հարցման պատասխանն այդպես էլ չի ստացվել։

Ասել է թե՝ Աբազյանը՝ Վարդապետյանի հետ ձեռք-ձեռքի տված, խախտում է ՀՀ Սահմանադրությունն ու «Տեղեկատվության ազատության մասին» օրենքը եւ հենց այդ քայլով հիմքեր ստեղծելով՝ հիմնավոր կարծելու, որ մարդու հիմնարար իրավունքները սահմանափակվել են, այսինքն՝ գաղտնալսումներն իրականացվել են ՀՀ ԱԱԾ-ի կողմից կամ թողտվությամբ։

Աղբյուր` Փաստինֆո