Փաստ ինֆո

Բերձորի միջանցքում ադրբեջանական գործողություններն, իրենց էությամբ, պատերազմական հանցագործություն են՝ եթե մենք համարում ենք, որ ռազմական իրավիճակը շարունակվում է։ Բլոկադան արդեն իսկ պատերազմի գործիք է համարվում։ Եթե այսպես շարունակվի, ապա միջազգային կազմակերպություններին այլ բան չի մնում, քան հայտարարել, որ Ադրբեջանը խախտում է ՄԱԿ-ի և Եվրոպայի խորհրդի կանոնադրությունները։ «Փաստինֆո»-ի հետ զրույցում այս մասին ասաց Միջազգային իրավունքի մասնագետ Արա Ղազարյանը՝ անդրադառնալով Ադրբեջանի կողմից ԿԽՄԿ տեղաշարժը Բերձորի միջանցքի տարածքում արգելելու փաստին։

Հիշեցնենք, որ Ադրբեջանը ԿԽՄԿ-ին մեղադրել է մաքսանենգության մեջ, իբր, հիվանդներին տեղափոխելիս կազմակերպության մեքենայում հայտնաբերել են ծխախոտ, հեռախոս ու վառելիք։

«Եվրոպայի խորհրդում դա կարող է հանգեցնել Ադրբեջանի պատվիրակների մանդատների ժամանակավոր սառեցման՝ ինչպես դա արվեց Ռուսաստանի նկատմամբ։ Իսկ ՄԱԿ-ի շրջանակներում դա կարող է հանգեցնել ԱԽ կողմից արդեն բանաձևի ընդունման, որը պարտադիր կատարման փաստաթուղթ է»,- ասաց նա։

Ըստ փորձագետի՝ Բերձորի միջանցքում իրականացվող գործողություններով Ադրբեջանը, փաստացի, միջամտում է հումանիտար չեզոք օգնություն տրամադրող Կարմիր խաչի կազմակերպության աշխատակիցների տեղաշարժման իրավունքին, ինչը կազմակերպությունն ստացել է Ժնևյան կոնվենցիայով, որը որևէ դեպքում ենթակա չէ խախտման։ Որպես հավելում, Ղազարյանը հիշեցրեց, որ ԿԽՄԿ-ի լեգիտիմությունը, այդ նույն Ժնևյան կոնվենցիայով, ճանաչվել է նաև Ադրբեջանի կողմից։

Թեև այժմ ռազմական ակտիվ գործողություններ չեն ընթանում՝ Արցախում առկա է քաղաքացիների շրջափակված լինելու խնդիրը։ Այս պարագայում, ըստ նրա, Կարմիր խաչի մասնակցությամբ նմանատիպ՝ ոչ այնքան նշանակալի միջադեպը պետք է շատ արագ լուծում ստանա՝ հաշվի առնելով, որ հայտնաբերվածը ոչ թե թմրաշրջանառություն կամ հանցավոր այլ գործողություն է, այլ ընդամենը որոշ ապրանքների տեղափոխում։ Միջազգային իրավունքի մասնագետի խոսքով՝ մյուս տեսանկյունից, Ադրբեջանը վարչարարության անվան տակ, արգելելով ԿԽՄԿ տեղաշարժը, խախտում է հումանիտար բոլոր օրենքները։

«Այս ամենը հայկական կողմի օգտին կարելի է շրջել առաջին հերթին իրավական ճանապարհով։ Երկրորդ՝ պետք է ձևավորել հանրային կարծիք, որ Ադրբեջանը միջազգային կամ տարածաշրջանի խաղաղությանն սպառնացող պետություն է։ Պետք է ցույց տալ, որ այդ պետության գործողությունները լեգիտիմ չեն, որպեսզի Ադրբեջանն փոփոխի իր վարքագիծը՝ միջազգային արենայում։ Այսօր արդեն իսկ հայտարարություն եղել է, որ Ադրբեջանը պարտավորություններ ունի Ղարաբաղի հայության նկատմամբ՝ նրանց անվտանգությունն ապահովելու առումով, մինչդեռ այդ երկիրը շրջափակում է Արցախը»,- ասաց նա։

Այդուհանդերձ, այս առումով, Ղազարյանը կոչ է անում ԿԽՄԿ ներկայացուցիչների կողմից արձանագրված դեպքերի մասին բարձրաձայնելու հույս չունենալ։ Նրա խոսքով՝ դա տեղի չի ունենա, քանի որ այդ կազմակերպությունը կաշկանդված է իր իսկ ընդունած սկզբունքներով։

«Չեզոքություն ու անաչառություն։ Աշխարհի տարբեր անկյուններում հակամարտող կողմերը մեղադրում են ԿԽՄԿ-ին՝ այդ նույն չեզոքությունը խախտելու մեջ։ Կարմիր խաչը կաշկանդված է ամեն ինչի մասին բարձրաձայնելու հարցում։ Օրինակ՝ իրենք տեսնում են խախտումներ, բայց չեն բարձրաձայնում, որովհետև դա նշանակում է հարաբերություններ փչացնել մի կողմի հետ։ Դա էլ իր հերթին նշանակում է, որ այդպիսով վնասվում է իր առաքելության արդյունավետությունը։ Դրա համար, այո՛, Կարմիր խաչը կարող է շատ ինֆորմացիա ունենալ կամ շատ բան տեսնել, բայց լուրջ կաշկանդվածութուն ունենալ՝ բարձրաձայնելու»,- ասաց նա։

Աղբյուր` Փաստինֆո