Փաստ ինֆո

«Այսքան սուտ խոսելուց հետո, այս մի սուտն ի՞նչ է, որ չասեն։ Ասեմ ավելին՝ իրենք շարունակելու են սուտ խոսելու իրենց արատավոր սովորությունը»,- «Փաստինֆո» լրատվականի հետ զրույցում քիչ առաջ ասել է ՀՀ Զինված ուժերի գլխավոր շտաբի նախկին առաջին տեղակալ Տիրան Խաչատրյանը՝ անդրադառնալով ՀՀ վարչապետի գրասենյակի այսօր տարածած հակադարձմանը։

ՀՀ վարչապետի աշխատակազմից այսօր արձագանքել են Զինված ուժերի գլխավոր շտաբի նախկին առաջին տեղակալ Տիրան Խաչատրյանի՝ շուրջ 2 շաբաթ առաջ հնչեցրած հայտարարություններին։ «Փաստինֆո»-ն դեռեւս հունիսի 27-ին հրապարակել Տիրան Խաչատրյանի հետ հարցազրույցը, որտեղ նա արձանագրել էր, որ իր պաշտոնավարման ժամանակաընթացքում եղել են դեպքեր, երբ բանակը Կառավարությունից հիմնավորված ծրագրերով նախատեսված գումարներ է խնդրել, սակայն Կառավարությունը մերժել է. «Խաչատրյանի կեղծ ձևակերպումները, թե իբրև բանակի կարիքները հոգալու ու առաջնահերթ ձեռքբերումներն իրականացնելու համար Կառավարությունը գումար չի հատկացրել, աղերս չունեն իրականության հետ: Զինված ուժերի Գլխավոր շտաբի պետի նախկին տեղակալ Տիրան Խաչատրյանը ժամանակ առ ժամանակ լրատվամիջոցներով ներկայացնում է պնդումներ, որոնք ոչ միայն հիմնազուրկ են, այլև հասարկությանը մոլորեցնելու առերևույթ նպատակ են հետապնդում»,- 14 օր անց որպես արձագանք ասել է կառավարության ներկայացուցիչը։

Լրագրողի նկատառմանը՝ ինչո՞ւ է, ավելի քան կես ամիս անց, ՀՀ Կառավարությունը որոշել անդրադառնալ վերջինիս հայտնած տեսակետներին, Տիրան Խաչատրյանը պատասխանում է՝ երևի բարձրաձայնված դառը ճշմարտությունը, որ, հերթական անգամ բացահայտել է իրենց իրական դեմքը, ծանրացել է նրանց վրա, սակայն, նույնիսկ դրան, նրանք պատասխանել են իրենց հերթական ստով. «Իսկ այդ աշխատակազմում, որտեղից «հակադարձել» են ինձ կամ, հենց, հակադարձվողն ինքը, այդ ժամանակահատվածում, որևէ ձևով առնչվե՞լ է վերոհիշհալ հարցերի հետ, իրազե՞կ է եղել հարցերի այն շրջանակներին, որոնք քննարկվել են փակ նիստերում։ Այդ պատասխանողը քանի՞ անվտանգության նիստի է մասնակցել, քանի՞ փակ քննարկման է ներկա գտնվել…Ուրեմն, ուզում եմ հասկանամ՝ ինչպե՞ս կարող էր հերքել կամ հաստատել մի բան, որից ինքը տեղյակ չէ և չէր էլ կարող տեղյակ լինել»,- ասում է ռազմական գործիչը։

Պարոն Խաչատրյանը հավելում է՝ բայց չէ՞ որ ՀՀ ԶՈւ նախկին Շտաբի պետ Օնիկ Գասպարյանն իր արած վերջին հայտարարության մեջ, նույնպես, անդրադարձ էր կատարել այս խնդրին և, նույնիսկ, հստակ թվեր է նշել և բարձրաձայնել.«Ստացվում է, որ բոլորս սուտ ենք խոսում, բայցի իրենցից»,- կիսահեգնական տոնով նկատում է Խաչատրյանը։

ՀՀ Զինված ուժերի գլխավոր շտաբի նախկին առաջին տեղակալ Տիրան Խաչատրյանն ասում է՝ թեև ինքն իրավասու չէ համապատասխան փաստաթղթեր և ձայնագրություններ հրապարակել, սակայն, մեկ անգամ ևս պնդում և հաստատում է՝ իր կողմից վկայակոչված իրողությունը իրականություն է. «Ասեմ ավելին՝ բանակի կարիքների համար Կառավարությունից ակնկալվող գումարների հիմնավորման ուղղությամբ մեր կողմից չափազանց երկար և խիստ մանրակրկիտ աշխատանք է կատարվել, սակայն, դրանք չեն բավարարվել, բանակին այդ գումարները ՀՀ Կառավարության կողմից չեն տրամադրվել»։

Բանակի կողմից առաջ քաշված հիմնավորումներից որևէ մեկին որևէ տեսակի լուծում չի տրվել Փաշինյանի կողմից, ինչի՞ մասին է նա խոսում.Տիրան Խաչատրյան

Աղբյուր` Փաստինֆո