Փաստ ինֆո

Երևանի ընդհանուր իրավասության դատարանի դատավոր Դավիթ Հարությունյանի լիազորությունները դադարեցնելուց հետո նրա փոխարեն դատավոր կնշանակվի ԲԴԽ նախագահի խորհրդական Գագիկ Հարությունյանը։ Այս մասին «Փաստինֆո»-ն տեղեկանում է ԲԴԽ կայքում առկա որոշումից։

ԲԴԽ-ն հուլիսի 10-ին դռնփակ նիստում որոշում է կայացրել՝ Գագիկ Արայի Հարությունյանի թեկնածությունը՝ Երևան քաղաքի առաջին ատյանի ընդհանուր իրավասության քրեական դատարանի դատավորի պաշտոնի թափուր տեղում նշանակելու համար ՀՀ նախագահին ներկայացնելու մասին։

Գագիկ Հարությունյանը, որը ԲԴԽ նախագահի խորհրդականն է, դատավորների թեկնածուների ցանկում հայտնվել էր բոլորովին վերջերս՝ հունիսի 22-ին՝ ևս 11 թեկնածուի հետ միասին։ Ցուցակում գտնվող մյուս թեկնածուների վերաբերյալ առաջարկությունը ԲԴԽ-ն ավելի վաղ արդեն ներկայացրել էր նախագահին՝ մարզերում դատավորներ նշանակելու համար, իսկ Հարությունյանի թեկնածությունը ներկայացվեց միայն երեկ՝ Երևան քաղաքի առաջին ատյանի ընդհանուր իրավասության քրեական դատարանի դատավորի թափուր տեղի համար, որն առաջացել էր ԲԴԽ-ի կողմից դատավոր Դավիթ Հարությունյանի լիազորությունները դադարեցնելուց հետո։

Նշենք, որ մինչ ԲԴԽ տեղափոխվելը Գագիկ Հարությունյանը եղել է Կարեն Անդրեասյանի խորհրդականը՝ ՀՀ արդարադատության նախարարի պաշտոնում և մասնակցում էր ԲԴԽ-ում դատավորներին կարգապահական պատասխանատվության ենթարկելու միջնորդությունների քննությանը։

Հիշեցնենք, որ դատավոր Դավիթ Հարությունյանի լիազորությունները ԲԴԽ-ն դադարեցրել է հուլիսի 3-ին՝ փակ դռների հետևում, իսկ գործի ողջ քննությունն անցել է կոպտագույն խախտումներով։ Ավելին, որոշման հրապարակման օրը ԲԴԽ-ն խոչընդոտել է ԶԼՄ-ների աշխատանքը, իսկ պարզաբանումներ ստանձնելու տեղը մամուլի քարտուղարի և դեպարտամենտի նղեկավարի փոխարեն ստանձնել էր Անդրեասյանի խորհրդականը, որին խոստացել էին դատավոր նշանակել և, ինչպես կանխատեսվում էր, նշանակեցին հենց Դավիթ Հարությունյանի փոխարեն՝ Երևանի դատարանում։ Հատկանշական է, որ, սովորաբար նորանշանակ, հատկապես՝ երիտասարդ դատավորներին որպես դատավոր նշանակում են մարզերի դատարաններում, հետագայում արդեն նրանք տեղափոխվում են Երևան։

Հեղինակ՝ Իզաբել Սահակյան

Աղբյուր` Փաստինֆո