Փաստ ինֆո

Երևանի կենտրոնում այսօր տեղի է ունեցել «Դեմոկրատիայի իրական դեմքը» խորագրով ֆոտո-նկարների ցուցադրությունը, որը նախաձեռնել էր ՀՀ ԱԺ նախկին պատգամավոր, «Անվտանգություն և ժողովրդավարություն» ՀԿ-ի հիմնադիր Նաիրա Զոհրաբյանը:

Ցուցադրությանը ներկայացվել են Նիկոլ Փաշինյանի իշխանության դեմոկրատիայից տուժած գործիչների, դատավորների լուսանկարները։ Նրանց թվում են՝ պրոդյուսեր, դատարանի դահլիճում մահացած Արմեն Գրիգորյանը, երկարատեւ կալանքի տակ գտնվելու հետեւանքով առողջական լուրջ խնդիրների պատճառով մահացած գեներալ Մանվել Գրիգորյանը, Նիկոլ Փաշինյանին ուղեկցող ավտոշարասյան կողմից սպանված հղի Սոնա Մնացականյանը, Վայոց Ձորում մարզի պաշտոնատար անձանց հետ փոխկապակցված անձանց կողմից դաժան ծեծի հետևանքով մինչ օրս կոմայի մեջ գտնվող Արա Մխիթարյանը, ՀՀԿ փոխնախագահ Արմեն Աշոտյանը, Վանաձորի ընտրված քաղաքապետ Մամիկոն Ասլանյանը, Բանակային 3-րդ կորպուսի նախկին հրամանատար Գրիգորի Խաչատուրովը, դատավոր Բորիս Բախշիյանը:

Ակցիայի ընթացքում Նաիրա Զոհրաբյանը նշել է՝ ընտրել է ռեժիմի զոհերի լուսանկարները, հակառակ դեպքում՝ ամբողջ Երևանը պետք է լցված լիներ լուսանկարներով։

«Եթե մինչև հոկտեմբերի 19-ը 44-օրյա պատերազմում զոհված զինծառայողների մահվան հանգամանքները պետք է քննի նոր իշխանության նոր արդարադատությունը, որովհետև Հայկական Նյուրենբերգ լինելու է, ապա հոկտեմբերի 19-ից հետո թափված ամեն մի կաթիլ արյան պատասխանատուն մեկ մարդ է, որը կարող էր կանգնեցնել պատերազմը, բայց չկանգնեցրեց»,- ասաց նա՝ հավելելով, որ այդտեղ պետք է լինեին առնվազն հոկտեմբերի 19-ից հետո զոհված տղաների անունները։

Աղբյուր` Փաստինֆո