Փաստ ինֆո

Անգլիայում գործող  «Հայեր ջան» ֆոնդի կողմից Արցախի Հանրապետության Մարտունու շրջանի Մյուրիշեն, Ավդուռ, Հաղորտի, Պառավաթումբ, Վարանդա, Ասկերանի շրջանի Սառնաղբյուր, Ծաղկաշատ և Խաչմաչ համայնքերում բնակվող որոշ սոցիալական խմբերի ցուցաբերվել է հումանիտար օգնություն՝ անասնագլխաքանակի տեսքով: Այս մասին «Արցախպրես»-ին տեղեկացրել է ԱՀ նախագահի Սփյուռքի հարցերով խորհրդական Ազատուհի Սիմոնյանը:

«Դեռևս 2021 թվականի ամռանը «Բառնաբաս» միջազգային հիմնադրամի հովանավորությամբ, Մայր Աթոռ Սուրբ Էջմիածնի հովանու ներքո, Ամենայն Հայոց Կաթողիկոսի օրհնությամբ և ՀԱԵ երկու՝ Մեծ Բրիտանիայի Վերլանդիայի թագավորության և Արցախի թեմերի գործուն աջակցությամբ, Սրբազան Հայր Հովակիմ եպիսկոպոս Մանուկյանի և Վրթանես եպիսկոպոս Ապրահամյանի գործուն մասնակցությամբ մենք Արցախի Շուշիի, Ասկերանի և Մարտունու շրջանների յոթ համայքներին տրամադրեցինք հումանիտար օգնություն՝ անասնագլխաքանակի` գոճիների և մայր ոչխարների,  և մեղվափեթակների  տեսքով: Ծրագիրն ունեցավ բավականին բարեհաջող ընթացք և ավարտ, ունեցավ բազմակողմանի արդյունավետություն։ Հովանավոր «Բառնաբաս» միջազգային հիմնադրամը բավականին գոհ էր արդյուքններից, մեր քաղաքացիներն էլ կարողացան ճիշտ օգտագործել ստեղծված հնարավորությունը՝ բազմապատկելով ստացած աջակցությունը։ Համայքներում  նկատվեց  նաև տնտեսական ակտիվություն։ Այլ համայքներ ևս ծրագրում ընդգրկվելու ցանկություն հայտնեցին։ Հաշվի առնելով այս ամենը` նորից դիմեցի հիմնադրամին և վերջերս, երբ գործուղվել էի Մեծ Բրիտանիայի Վիրլանդիայի թագավորություն, առիթ ունեցա հանդիպելու  «Բառնաբաս» հիմնադրամի տնօրենների խորհրդի ղեկավարին ու աշխատակազմին: Հիմնադրամի ղեկավար Քոլ եպիսկոպոս Պատրիք Սուրխուդուն տեղում տվեց իր համաձայնությունը, և մենք մեկնարկեցինք այս անգամ ավելի մեծամասշտաբ` 14 համայնքներից 425 շահառու ընտանիք ներառող հումանիտար ծրագրի երկրորդ փուլը: Ծրագիրն իրականացնող կողմը հանդիսանում է «Գոյ» մարդասիրական հիմնադրամը, որը կազմակերպում է այս ամենը: Այժմ ընթացքի մեջ է անասնագլխաքանակի(ոչխարների տեսքով) տրամադրման գործընթացը»,-մանրամասնել է Ա. Սիմոնյանը:

Նրա խոսքով՝ ծրագիրն իրականացնելիս հաշվի է  առնվել, որ շրջափակման հետևանքով Արցախում կա ինքնաբավություն ապահովելու կարևոր խնդիր, և համայնքներում ապրող ընտանիքները պետք է ունենան սեփական արտադրության  մսամթերք և կաթնամթերք: 

«<<Բառնաբաս>> միջազգային հիմնադրամը, որ գործում է աշխարհի տարբեր երկրներում, ունի  գործունեության  հումանիտար ուղղվածություն: Կառույցը հատկապես  պատերազմական գոտիներում և հատկապես քրիստոնյա ժողովուրդներին աջակցություն ցուցաբերող հիմնադրամ է: Այն  ակտիվորեն համագործակցում է  Մայր Աթոռ Սուրբ Էջմիածնի հետ: Նախաձեռնությունը չէր կարող իրականություն դառնալ առանց Մայր Աթոռ Սուրբ Էջմիածնի և, հատկապես, Վեհափառ  Հայրապետի ջանքերի։  Սա  հերթական  արդյունավետ համագործակցությունն է։ Ծրագիրը համակարգվում է  իմ կողմից»,-ընդհանրացրել է մեր զրուցակիցը:

Աղբյուր` Փաստինֆո