Փաստ ինֆո

Իրավապահները թակարդում են հայտնվել՝ Տիգրան Ավինյանի՝ միաժամանակ երկու պաշտոնում պաշտոնավարելու վերաբերյալ հարուցված վարույթով։ Ոչ կարողանում են մեղադրանք առաջադրել ՔՊ-ի՝ քաղաքապետի թեկնածու Տիգրան Ավինյանին, ոչ էլ՝ կարող են աչք փակել առերեւույթ կոռուպցիոն դրսեւորումների վրա։

Հիշեցնենք, որ դեռևս 2022թ. նոյեմբերի 28-ին «Փաստինֆո»-ն արձանագրել էր, որ Երևանի փոխքաղաքապետի պաշտոնում սեպտեմբերի 23-ին նշանակվելուց հետո Ավինյանը շարունակում է զբաղեցնել Հայաստանի պետական հետաքրքրությունների ֆոնդի (ԱՆԻՖ-խմբ) , տնօրենների խորհրդի նախագահի պաշտոնը՝ այդպիսով միևնույն ժամանակ պաշտոնավարելով երկու անհամատեղելի պաշտոններում։ Երևան քաղաքում տեղական ինքնակառավարման մասին ՀՀ օրենքի 48-րդ հոդվածի 8-րդ կետի համաձայն՝ քաղաքապետի տեղակալները չեն կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առևտրային կազմակերպություններում, կատարել այլ վճարովի աշխատանք, բացի գիտական, մանկավարժական և ստեղծագործական աշխատանքից, մինչդեռ, ինչպես հայտնի է՝ «Հայաստանի պետական հետաքրքրությունների ֆոնդ» ՓԲԸ-ն ՀՀ կառավարության ներքո գործող առեւտրային կազմակերպություն է, որի գործունեությունը միտված է խոշորագույն ներդրողների և գործընկերների հետ համատեղ լայնածավալ նախագծերի իրականացմանը։ Ֆոնդը ստեղծվել է 2019թ՝ կառավարության որոշմամբ, իսկ Տիգրան Ավինյանը հանդիսանում է նշված ՓԲԸ-ի տնօրենների խորհրդի նախագահ, ինչի մասին փաստում է «Հայաստանի պետական հետաքրքրությունների ֆոնդ»-ի պաշտոնական կայքէջը։ Ավելին՝ նա օժտված է ղեկավարման գործառույթներով, ինչի մասին եւս փաստում է «Հայաստանի պետական հետաքրքրությունների ֆոնդ»-ի կայքը, որի հրապարակած տեղեկատվության համաձայն՝ հենց տնօրենների խորհուրդն է ղեկավարում ԱՆԻՖ-ը։ Փաստացի՝ գործ ունենք ոչ միայն ապօրինի պաշտոնավարման, այլև՝ կոռուպցիոն ռիսկերի հետ, քանի որ երկու պաշտոններում առկա է շահերի բախում։

«Փաստինֆո»-ն նախ բանավոր, ապա նաեւ գրավոր մի շարք հարցումներ էր իրականացրել ինչպես ԱՆԻՖ, քաղաքապետարան, այնպես էլ՝ Կառավարություն, Էկոնոմիկայի նախարարություն, ի վերջո հաջողվել է ստանալ ԱՆԻՖ-ի կանոնադրությունը, որով հաստատվեցին կոռուպցիոն ռիսկերի մեր կասկածները. Տիգրան Ավինյանը, լինելով փոխքաղաքապետ, ղեկավարում է առեւտրային կազմակերպություն. Նա է պատասխանատու խորհրդի աշխատանքների կազմակերպման համար, նա է վարում խորհրդի նիստերը, նախագահում ընդհանուր ժողովն ու ստորագրում թե ընդհանուր ժողովի, թե խորհրդի որոշումները, դրանցով հաստատված փաստաթղթերը։ Համենայն դեպս, կանոնադրության 16.2-րդ կետը հենց այս պարտականություններն է ամրագրել խորհրդի նախագահի համար։ Թե փոխքաղաքապետի աշխատաժամանակի քանի տոկոսն է Ավինյանը նվիրում ներդրումների համար պատասխանատու կառույցի աշխատանքների կազմակերպմանը ու ստանում՝ առերեւույթ ապօրինի վարձատրություն, հարցի մյուս կողմն է։ Իսկ եթե ինքը քաղաքապետարանում իր աշխատանքային ժամերին չի աշխատում ԱՆԻՖ-ի համար, ապա հարց է առաջանում, թե ոնց է ղեկավարում այն։

Մեր հրապարակումներից հետո տեղեկացանք, որ Կոռուպցիայի կանխարգելման հանձնաժողովում ուսումնասիրություն է իրականացվել եւ համապատասխան փաստաթղթերն ուղարկվել դատախազություն, որն էլ դրանք վերահասցեագրել էր Հակակոռուպցիոն կոմիտե, որտեղ ապրիլի 22-ին նախաձեռնվել է քրեական վարույթ ՀՀ քրեական օրենսգրքի 277-րդ հոդվածի 1-ին մասի հատկանիշներով, այն է՝ մասնավոր ոլորտում ծառայողական լիազորությունները կամ դրանցով պայմանավորված ազդեցությունը չարաշահելը։ Հարուցված քրեական գործը ՀԿԿ-ից փոխանցվել է ՔԿ, որտեղ արդեն ավելի քան երեք ամիս քննություն է իրականացվում, սակայն որևէ անձի, այդ թվում, Տիգրան Ավինյանի նկատմամբ քրեական հետապնդում դեռևս չի հարուցվել։ ՀՀ ՔԿ-ից «Փաստինֆո»-ի հետ զրույցում հայտնեցին, որ Քրեական օրենսգրքի 277-րդ հոդվածի 1-ին մասի հատկանիշներով նախաձեռնված վարույթով նախաքննությունը դեռ շարունակվում է։ Ասել է թե՝ իրավապահները եւս գիտակցում են հարցի լրջությունը, հակառակ պարագայում արդեն վաղուց կարճած կլինեին վարույթը։

Իհարկե, տեսականորեն բացառված չէ, որ այս վարույթը կարող է նաեւ որպես մահակ օգտագործվել Ավինյանին լիարժեք վերահսկողության տակ պահելու եւ ըստ անհրաժեշտության այն կիրառելու համար, ինչպես, օրինակ, տեղի ունեցավ «Քովիդի»-ի գործի հետ։ Առերեւույթ չարաշահումները Հաշվեքննիչ պալատի կողմից հայտնաբերվել էին տարիներ առաջ, բայց միայն այս տարի քննչական մարմինները սկսեցին դրանով ակտիվ քննություն արել։ Արձանագրենք, որ դրանք վերաբերում են Ավինյանի՝ ՀՀ պարետ աշխատելու ժամանակահատվածին, իսկ առողջապահության նախարարը Արսեն Թորոսյանն էր։

Հեղինակ՝ Իզաբել Սահակյան

Աղբյուր` Փաստինֆո