Փաստ ինֆո

Իրականությունը PR-ով փոխարինելը չարագործություն է, իսկ եթե դրանով զբաղվում է բարձր պաշտոնյան, նա է դառնում չարիք։ Այս մասին լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ անդրադառնալով Մադրիդյան սկզբունքներին, իշխանությունների կողմից իր հասցեին հնչեցված մեղադրանքներին։

«Սեփական կաշին փրկելու նպատակով ուրիշներին զրպարտելն անբարոյականություն է, իսկ այնտեղ զրպարտանքի շատ մեծ չափաբաժին է։ Հոգեբաններն ասում են, որ ստախոսները հասնում են մի հանգրվանի, որ ստախոսներն իրենք են սկսում հավատալ իրենց ստերին, բայց կա մի հուսադրող հանգամանք. նրանք նաև ասում են, որ դա ստախոսության վերջին փուլն է: Հույս ունեմ, որ գտնվում ենք վերջին փուլում»,- ասաց նա։

Երրորդ նախագահը վստահեցրեց, որ Հայաստանում ներքին գործընթացներ սպասվում են, չեն կարող այդպիսի գործընթացներ չլինել. «Իսկ լրջորեն պատասխանել մի մարդու, ով հրապարակավ խոստովանում է, որ զինվորականները 10-ից ավելի անգամ իրեն խաբել են 44-օրյա պատերազմի ժամանակ: Դուք պատկերացնո՞ւմ եք, մարդ, ում 10 անգամ կարող են խաբել և ինքը դա չզգա: Այսինքն կառավարման ի՞նչ ունակություն պետք է ունենա այդպիսի մարդը, կամ ինչ գիտելիք պետք է ունեն այդպիսի մարդը: Մեր ամբողջ ողբերգությունը դրանում է, ուրիշ ոչ մի բանում»։

Անդրադառնալով վարչապետ Նիկոլ Փաշինյանի հայտարարությանը, թե իր մոտ կասկածներ են առաջացել, թե պատերազմ է լինելու, դրա համար են թողել, որ ինքը գա իշխանության՝ Սերժ Սարգսյանը նշեց. «Ինքը իշխանության գալուց հետո է իմացե՞լ: Բա եթե դրանից հետո է իմացել, ինչի են իրենք հղում անելու 2016-ի, 2017-ի իմ ասածների վրա: Բա եթե իմացել են, որ այդպես է, ինչի՞ էին իրենց ճղում իշխանության գալու համար: Ես եմ ասե՞լ, որ «կամ ես եմ լինելու վարչապետ, կամ Հայաստանը վարչապետ չպետք է ունենա»: Այդ մարդկանց բոլոր ասածները իմ նախորդ ասածների մեջ տեղավորվում են»։

Աղբյուր` Փաստինֆո