Փաստ ինֆո

Քաղաքապետի առաջիկա ընտրություններում ընդդիմության մասնակցությունը իմաստալից կլինի միայն ընդդիմադիր ուժերի լայն կոնսոլիդացիայի պարագայում։ «Փաստինֆո»-ի հետ զրույցում նման կարծիք է հայտնել քաղաքագետ, «Դեմոկրատական այլընտրանք» կուսակցության նախագահ Սուրեն Սուրենյանցը։

Նկատենք, որ քաղաքական դաշտում նկատվում է որոշակի ակտիվություն՝ Երեւանի ավագանու ընտրություններին մասնակցելու քննարկումների շուրջ։ Սակայն առկա է մի օրինչափություն՝ ընտրություններին մասնակցելու հստակ հայտ ներկայացրել է ՔՊ-ն եւ առանձնապես վարկանիշ չունեցող մի քանի խորհրդարանական ուժ, գործիչ, որոնց թվում մեծ տոկոս են կազմում Նիկոլ Փաշինյանի հետ ճանապարհ անցածները։

Նրանց թվում է Նիկոլ Փաշինյանի կառավարության նախին անդամ Մանե Թանդիլյանը, որը, ըստ մամուլի հրապարակումների, օրերս հանդիպում է ունեցել ՔՊ-ի կողմից առաջադրված նախկին քաղաքապետ Հայկ Մարությանի հետ՝ քննարկելու հետընտրական դաշինքի հարցը։ Ի վերջինս էլ, ինչպես գրվել է մամուլում, ծրագրում է նախընտրական դաշինք կազմել Նիկոլ Փաշինյանի՝ արտախորհրդարանական ուժերի աշխատանքային խմբի անդամ Դավիթ Սանասարյանի հետ։

«Փաստինֆո»-ի հետ զրույցում Սուրենյանցը ձեռնպահ մնաց նկատվող զարգացումների մեկնաբանություններից՝ նկատի ունենալով, որ կողմերը որեւէ հայտարարությամբ հանդես չեն եկել՝ ոչ հերքել են, ոչ հաստատել, եւ հանդիպումների բովանդակության մասին, եթե դրանք տեղի են ունեցել, պաշտոնական տեղեկատվություն չի հրապարակվել։

Պատասխանելով մեկ այլ հարցի՝ ինչպե՞ս կարելի է մեկնաբանել Հայկ Մարությանի և արտախորհրդարանական ձևաչափում օրվա իշխանությունների և, մասնավորապես, Փաշինյանի հետ ակտիվ համագործակցող Դավիթ Սանասարյանի հանդիման մասին լուրը, քաղաքագետ Սուրեն Սուրենյանցը նախ նկատում է, եթե նույնիսկ Հայկ Մարությանը ժամանակին եղել է իշխանության թիմից, այնուամենայնիվ, չմոռանանք, որ նա՝ նույն ՔՊ-ի կողմից էլ պաշտոնանկ արված նախկին քաղաքապետ է։ Այդուհանդերձ, ըստ նրա, եթե քաղաքապետի ընտրություններում որևէ մեկն առաջադրվի Դավիթ Սանասարյանի կուսակցության ներքո, անկախ նրանից այդ մեկն ով է՝ Հայկ Մարությանը, թե այլ մեկը, միանշանակ, նրան հնարավոր չի լինի ընդունել որպես ընդդիմադիր դիրքերից հանդես եկող թեկնածու։ Ի դեպ, փաստենք, որ այս հանդիպման եղելության վերաբերյալ, նույնպես, պաշտոնական որևէ հերքում կամ հաստատում ոչ մի կողմից՝ մինչ այս պահը, դեռևս, չի եղել»։

Իսկ ընդհանրապես, քաղաքագետի դիտարկմամբ, քաղաքապետի առաջիկա ընտրություններում ընդդիմության մասնակցությունը միայն մեկ դեպքում իմաստալից կլինի, եթե լինի ընդդիմադիր ուժերի լայն կոնսոլիդացիա.«Մինչև չլինի ընդդիմադիր լայն կոնսոլիդացիա, որը հասարակության լայն շերտերի մոտ հավատ կներշնչի առ այն, որ այդ ճանապարհով հնարավոր է հասնել իշխանափոխության, իշխանությանը հաղթելու մնացյալ տարբերակներին ինքս քիչ եմ հավատում»,- ասել է Սուրենյանցը՝ ընդգծելով, որ առաջիկայում նախատեսվող քաղաքապետի ընտրություններն իր կամ իր կողմից ներկայացվող կուսակցության համար իմաստալից են, բացառապես, միայն եթե հանգեցնելու են իշխանափոխության գործընթացի արագացմանը։ Մնացյալ բոլոր տեսակի հայտերն ու մասնակցություններն, ըստ քաղաքագետի, խիստ հարաբերական են։

Աղբյուր` Փաստինֆո