Փաստ ինֆո

ՀՀ կրթության, գիտության, մշակույթի և սպորտի նախարարությանը 2023 թվականի պետական բյուջեով հատկացված միջոցներից կկատարվի վերաբաշխում 313 մլն դրամի չափով․ այդ գումարը կուղղվի Լոռու և Շիրակի մարզերում կրթահամալիրների ստեղծման համար անհրաժեշտ նախագծանախահաշվային փաստաթղթերի ձեռքբերմանը: Որոշումն ընդունվել է Գործադիրի այսօրվա նիստում։

Կրթահամալիրների ստեղծմամբ, ինչպես նշված է նախագծի հիմնավորման մեջ, նախատեսվում է իրագործել ՀՀ կառավարության ծրագրով ամրագրված հետևյալ նպատակները.

• բարձրացնել նախադպրոցական կրթության մատչելիության եւ հասանելիության աստիճանը բոլոր համայնքներում,

• ներդնել դպրոցական կառավարման բարելավված համակարգ,

• ներդնել փոքրաթիվ աշակերտական համակազմ ունեցող դպրոցների կրթության կազմակերպման արդյունավետ մոդելներ։

Շիրակի մարզում ընտրվել է 27 բնակավայր, որոնցից 4-ում կձևավորվեն կրթահամալիրներ, 9-ի համար կկառուցվեն նոր դպրոցների շենքեր, 5-ում կկառուցվեն միայն մարզադահլիճների և հանդիսությունների դահլիճների մասնաշենքերը, իսկ ուսումնական մասնաշենքերը կդիտարկվեն վերանորոգման համար։ Եվս մեկ դպրոց՝ Ղազանչիինը, դեռ պետք է ուսումնասիրվի,Աշոցքինը, Թորոսգյուղինը, Մեծ Սեպասարին ու Բագրավանինն էլ կվերանորոգվեն:

Նախագծով նախատեսվում է գումար հատկացնել ընդհանուր թվով 42 հաստատության՝ 15 կրթահամալիրի ստեղծման, 20 դպրոցի և 7 մարզադահլիճի և հանդիսությունների դահլիճի մասնաշենքերի կառուցման համար անհրաժեշտ նախագծանախահաշվային փաստաթղթերի մշակման և փորձաքննության ծառայությունների ձեռքբերման համար։

Աղբյուր` Փաստինֆո