Փաստ ինֆո

Խնդիրն այլեւս Ադրբեջանի նախագահը կամ նրա՝ այս կամ այն անհեթեթ ելույթները չեն, այլ Հայաստանի Հանրապետության Կառավարության շենքում նստած անձը, որը, մեր բոլորի հաշվին աշխատավարձ ստանալով ու կյանքը վայելելով, հասցրել է մեզ այս իրավիճակին։ Քանի դեռ այս որակի վարչապետ ունենք, Ալիևին ինչ կուզի կանի և կասի, նա ամենօրյա ռեժիմով կպահանջի ո՛չ միայն Երասխի գործարանի, այլ նաև Մեծամորի ատոմակայանի փակումը և, առհասարակ, հնարավոր ամեն ինչ՝ Հայաստանին մաքսիմում ծանր ու անդառնալի վնասներ հասցնելու համար»,- «Փաստինֆո»-ի հետ զրույցում, ասում է միջազգային անվտանգային հարցերով մասնագետ Արմեն Մանվելյանը։

Հիշեցնենք՝ նախօրեին Ադրբեջանի նախագահ Ալիևը Բաքվում Չմիավորման շարժման համակարգող բյուրոյի նախարարական հանդիպման ընթացքում կրկին, մեղադրանքներ էր հնչեցրել Հայաստանի հասցեին, այս անգամ՝ թիրախավորելով Երասխում օտարերկրյա ներդրումային ծրագրով կառուցվող մետալուրգիական կոմբինատը, որակելով այն, իբր, «բնապահպանական աղետի սպառնալիք» Նախիջևանի համար։

Հայաստանյան օրվա իշխանությունների թույլ և դավաճանական կեցվածքը առիթ է տալիս մեր թշնամիներին՝ վարվել Հայաստանի և Արցախի հետ այնպես, ինչպես իրենց երկրների պետական շահն է թելադրում, ասում է Արմեն Մանվելյանն ու հավելում.«Եթե այս Կառավարության կազմում տղամարդիկ լինեին, Ալիևը երբեք այսպիսի տխմար հայտարություններով հանդես չէր գա, և մենք, ստիպված չէինք լինի, մեկնաբանել դրանք»։

Երասխում կառուցվող մետալուրգիական գործարանը թիրախավորելով, ըստ բանախոսի, ադրբեջանական կողմը կարող է գնալ ցանկացած արկածախնդրության և սադրանքի, ընդհուպ մինչև՝ ճանապարհների կրկին շրջափակում, նրանք կարող են Տիգրանաշենը պահանջել և ստանալ, մանավանդ որ, իրականում, արդեն վաղուց պահանջում էն, օրվա իշխանություններն էլ՝ պատրաստակամ են տալու.«Պետք է մտածել այս աղետը կանխելու ձևերի մասին, որի իրականացման համար, առաջին հերթին, մեր երկրի ներկայիս ներքաղաքական իրավիճակը պետք է փոխենք։ Օրինակ, հենց դրան է ուղղված Հայաքվե գործընթացը, որ նախաձեռնել և իրականացնում ենք»,-ասում է Արմեն Մանվելյանը։

Թիրախավորելով միջազգային ներդրումներով կառուցվող գործարանը՝ հնարավո՞ր է սա առիթ հանդիսանա, որ միջազգային հանրությանը հասեցեական և գործուն մեխանիզմներով հակազդող միջոցներ ձեռնարկի ագրեսոր Ադրբեջանի նկատմամբ, հարցին ի պատասխան Արմեն Մանվելյանը բացառեց նման հեռանկարը. բացառվում է. «Միջազգային հանրություն կոչվածը չի կարող ձայն հանել այն պարագայում, երբ քո իսկ երկրի ղեկավարությունն ամենաբարձր մակարդակով լռում է։ Մենք բազմաթիվ օրինակներ ունենք, երբ Սփյուռքում ապրող մեր ազդեցիկ հայրենակիցները դիմում են միջազգային այս կամ այն կառույցներին կամ դրանց ղեկավարներին, բացատրում Արցախում տիրող իրավիճակը և, որպես պատասխան, լսում են հետևյալը՝ ձեր երկրի ղեկավարությունն այստեղ բոլորովին այլ իրականություն է ներկայացնում։ Այսպիսի իրավիճակում միջազգային հանրության ո՞ր արձագանքի մասին ենք մենք խոսում կամ ակնկալում լսել»։

Հարցին՝ ո՞ւր է տանում ալիևյան հերթական ագրեսիվ վարքագիծն՝ այս անգամ թիրախավորված Երասխի ուղղությամբ, ըստ բանախոսի հնչեցված պատասխանի՝ ոչ մի լավ տեղ. «Հայստանյան օրվա իշխանութունների և Ալիևի շահերը լիովին համընկնում են։ Այս իշխանութունները մեզ ստիպում են հակազդող որևէ քայլով կամ նախաձեռնությամբ հանդես չգալ, որպեսզի Ադրբեջանի ագրեսոր ղեկավարը մեր երկրի վրա չհարձակվի։ Հայաստանում և Արցախում վախի մթնոլորտի ստեղծման և տարածման շահառուն, հենց, գործող քաղաքական ռեժիմն է։ Ալիևի հետ ձեռք – ձեռքի տված, նրանք մեր երկրի ներսում վախի ու տագնապի մթնոլորտ են սերմանում, որի արդյունքում, խաղաղության իմիտացիա ստեղծելով, սրանք գնում են Ալիևի համար ցանկալի զիջումների, իսկ նա՝ քայլ առ քայլ, հասնում է իր առջև դրած նպատակներին։ Արդյունքում, մենք արդեն փաստացի կորցնում ենք մեր երկիրն ու պետականությունը, ինչն հայաստանյան օրվա իշխանութունների գլխավոր նպատակներից մեկն է, որպեսզի, երբ այս ամենն ավարտվի և իրենք այստեղից փախչեն, չլինի որևէ տեսակի պետական միավոր, որ կգնա նրանց հետևից և կզբաղվի իրենց պատասխանատվության ենթարկելու իրավական գործընթացով»։

Աղբյուր` Փաստինֆո