Փաստ ինֆո

Կանադայում 16-ամյա աղջիկը կորել է անտառում և երկու օր անց փրկվել՝ շնորհիվ թվային ֆոտոխցիկի պատահական լուսանկարի: Այս մասին հայտնում է CBC News-ը:

Բրիտանական Կոլումբիա նահանգի Լանգլի քաղաքի բնակչուհի Էսթեր Վանը հունիսի 27-ին երկու հասակակիցների և մեկ մեծահասակի ընկերակցությամբ արշավի է գնացել: Խումբը պատրաստվում էր մի քանի օր անցկացնել Golden Ears Provincial Park բնական պուրակի տարածքում։ Սակայն անտառապատ լեռներից մեկը բարձրանալու ժամանակ Վանը հետ է ընկել ուղեկիցներից և կորել։ Երբ աշակերտուհին հասկացել է, որ մենակ է մնացել, փորձել է իջնել սարից, բայց ընկել է ու վերջնականապես խճճվել:

Երեկոյան նա արդեն լսել է փրկարարների սուլոցները, սակայն չի կարողացել որոշել, թե որ կողմից է ձայնը գալիս։ Վանը սարից իջել է առվակի մոտ և գիշերը լեռան լանջին տեսել է լուսարձակող ճառագայթ։ Նա փորձել է պատասխան ազդանշան տալ լապտերով, սակայն նրան չեն նկատել։ «Ինձ համակել էր վախն ու հուսահատության զգացումը, սակայն ես հասկանում էի, որ հանձնվել չի կարելի», -հիշում է Վանը:

Փրկարարները փորձել են զանգահարել նրա բջջային հեռախոսին, սակայն այգում չափազանց վատ կապ է եղել։ Չորեքշաբթի աղջիկը որոշել է վերադառնալ լեռ, որտեղ անցնում էր զբոսաշրջային արահետը։ Այս ամբողջ ընթացքում նա լսել է փրկարարական անձնակազմի սուլոցները և մի քանի անգամ տեսել ուղղաթիռը, որը պտտվում էր այգու վրայով:

Հինգշաբթի առավոտյան Վանգը հիշել է, որ արշավի սկզբում թվային ֆոտոխցիկով մի քանի լուսանկար է արել: Լուսանկարներից մեկում ձյունածածկ գագաթ է եղել։ Աշակերտուհին այն տեսել է այն վայրից, որտեղ գտնվում էր, կարողացել է կողմնորոշվել և հասկացել է, թե որ ուղղությամբ պետք է գնալ գետի երկայնքով։ Երեկոյան նա դուրս է եկել ճանապարհի մոտ, իսկ դրա երկայնքով հասել է ավտոկայանատեղի, որտեղ նրա ծնողները սպասում էին որոնողների լուրերին։

Անտառում թափառելու ընթացքում Վանը գրեթե չի տուժել. նա մի քանի քերծվածք է ստացել և ուժեղ հարել ոտքերը։ Ընդ որում, աղջիկը խոստովանել է, որ հոգեբանական տեսանկյունից ծանր է տարել անտառում թափառելը, եւ իրեն ժամանակ կպահանջվի «այդ փորձը մարսելու համար»:

Աղբյուր` Փաստինֆո