Փաստ ինֆո

Իրավապահներն ավելի քան մեկ շաբաթ է, ինչ չեն կարողանում հայտնաբերել Սյունիքի նախկին մարզպետ Սուրիկ Խաչատրյանի, նույն ինքը «Լիսկայի» որդուն՝ Տիգրան Խաչատրյանին, որը որոնվում է 46-ամյա տղամարդու ուղղությամբ կրակելու համար։

Հիշեցնենք, որ հունիսի 19-ին 3 միջադեպ է տեղի ունեցել Սուրիկ Խաչատրյանի որդու՝ Տիգրան Խաչատրյանի մասնակցությամբ Ըստ հրապարակումների՝ Տիգրան Խաչատրյանը քաղաքի բանուկ մասում հայհոյել էր ոստիկաններից մեկի կնոջը։ Ավելի ուշ կռվել բանջարեղեն վաճառող տղայի հետ։ Իսկ երեկոյան վիճել վուլկանիզացիայի 46-ամյա աշխատակցի հետ ու կրակել նրա ուղղությամբ։ Տուժածին տեղափոխել էին հիվանդանոց։ Ասում էին՝ կրակել է իրեն «Տիկո» ասելու համար։

Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 335-րդ հոդվածի 1-ին մասով, 297-րդ հոդվածի 3-րդ մասով, ինչպես նաև` ՀՀ քրեական օրենսգրքի 171-րդ հոդվածի 2-րդ մասի 7-րդ կետով ։ ՔԿ-ն պաշտոնապես հայտնել էր, որ փաստական տվյալներ են ստացվել առ այն, որ Տիգրան Խաչատրյանը ավտոմեքենայի համար անվադողեր գնելու հարցի շուրջ պայմանավորվածություն է ձեռք բերել անվադողերի վաճառքով զբաղվող, 46-ամյա համաքաղաքացու հետ։ Վերջինիս եղբոր որդին, դրանք տրամադրելու նպատակով, զանգահարել է Տիգրան Խաչատրյանին և, դիմելաձևի հետ կապված՝ նրանց միջև առաջացել է լեզվակռիվ, որը մնացել է անավարտ:

Նույն օրը՝ ժամը 20:30-ի սահմաններում, Տ․Խաչատրյանն իրեն պատկանող «Mercedes-Benz» մակնիշի ավտոմեքենայով, երկու մտերիմների հետ, գնացել է ավտոտեխսպասարկման կետ, որտեղ հիշյալ հարցի շուրջ պարզաբանումներ կատարելու ընթացքում, չնչին առիթն օգտագործելով, իր սեփական անձի առավելություններն ընդգծելու և այդ կերպ հանդուգն վարքագիծ դրսևորելու մոլուցքից դրդված, խուլիգանական դրդումներով, վիճաբանություն է հրահրել աշխատակիցների հետ, նրանց հասցեին հնչեցրել սեռական բնույթի հայհոյանքներ։ Ապա, համակեցության կանոնների ցուցադրաբար անտեսմամբ, ավտոտեխսպասարկման կետի հարևանությամբ գտնվող քաղաքացիների, թաղամասի բնակիչների, սպասարկման կետերի անդորրը խախտելով, իր մոտ ապօրինի կրած հրազենով կրակոց է արձակել 46-ամյա տղամարդու ուղղությամբ` վերջինիս պատճառելով առողջության թեթև վնասի հատկանիշներ պարունակող վերոնշյալ մարմնական վնասվածքը և հեռացել դեպքի վայրից:

Այդ ընթացքում Տ․Խաչատրյանը, իր վարած «Mercedes-Benz» մակնիշի վնասված ավտոմեքենան թաքցնելով, ընկերներից մեկի հետ, իրեն պատկանող մեկ այլ՝ «Toyota Land Cruiser 200» մակնիշի ավտոմեքենայով, լքել են Գորիսի տարածքը:

Հունիսի 22-ին Քննչական կոմիտեն հայտարարեց, որ Տիգրան Խաչատրյանի նկատմամբ քրեական հետապնդում հարուցելու որոշում է կայացվել, նրա նկատմամբ որպես խափանման միջոց է ընտրվել կալանավորումը, սակայն, ինչպես պարզվեց Տիգրան Խաչատրյանին մեղադրանք դեռևս ներկայացված չէ, շուրջ 2 շաբաթ է՝ իրավապահները նրան փնտրում են։ ՀՀ քննչական կոմիտեից «Փաստինֆո»-ի հետ զրույցում հայտնեցին, որ նա վարույթն իրականացնող մարմնին դեռ չի ներկայացվել։ ՔԿ փոխանցմամբ՝ Ոստիկանությանը տրված է հանձնարարություն՝ Տիգրան Խաչատրյանին հայտնաբերելու և վարույթն իրականացնող մարմնին ներկայացնելու վերաբերյալ։ Հարցին՝ արդյո՞ք ՕՀՄ-ներ ևս իրականացվում են՝ Խաչատրյանին հայտնաբերելու ուղղությամբ, կառույցից խնդրեցին մանրամասների համար դիմել հետախուզում իրականացնող մարմնին՝ ոստիկանությանը։

Ի դեպ, մինչ Խաչատրյանին կհայտնաբերեն իրավապահները, փաստաբան Վահագն Քեշիշյանն ահազանգում է՝ Խաչատրյանը զրկված է անհրաժեշտ պաշտպանությունից։ Փաստաբանը «Փաստինֆո»-ի հետ զրույցում ահազանգել է, որ վարույթն իրականացնող մարմինը խոչընդոտում է իր՝ որպես պաշտպանի ներգրավմանը։ Մասնավորապես, Տիգրան Խաչատրյանի եղբոր՝ Տրդատ Խաչատրյանի առաջարկությամբ և գրավոր դիմումով նա ցանկացել է ներգրավվել, սակայն նախաքննական մարմինը հրաժարվում է նրան որպես պաշտպան ներգրավել։ Դրա հետևանքով պաշտպանը հնարավորություն չունի ծանոթանալու նյութերին, բողոքարկելու կալանավորման, հետախուզման որոշումները։
Հեղինակ՝ Իզաբել Սահակյան

Աղբյուր` Փաստինֆո