Փաստ ինֆո

Ադրբեջանի կողմից Լաչինի միջանցքի՝ Լեռնային Ղարաբաղի ժողովրդի փրկության օղակի, ամբողջական փակումը շարունակվում է վերջին 6 ամիսների ընթացքում։ ԼՂ բնակչությունը միտումնավոր զրկվել է բոլոր տեսակի ենթակառուցվածքներից՝ բնական գազից, էլեկտրաէներգիայից ու բջջային կապից օգտվելու հնարավորությունից։ Հուլիսի 4-ին կայացած ԵԱՀԿ Խորհրդարանական վեհաժողովի նստաշրջանում այս մասին հայտարարել է Իսլանդիայի պատվիրակության ղեկավար Բիրգիր Տորարինսոնը՝ հավելելով, որ արցախցիները վերջնականապես կտրված են արտաքին աշխարհից, ինչն, իր գնահատմամբ, բացարձակ անընդունելի է։

«Ադրբեջանի այս գործողությունները բացահայտ խախտում են 2020 թվականի նոյեմբերի համաձայնագիրը, որը ստորագրել է Ադրբեջանի նախագահը։ Այսպիսով՝ Ադրբեջանը խախտում է նաև Մարդու իրավունքների պաշտպանության կոնվենցիան և Արդարադատության միջազգային դատարանի կողմից անցյալ տարվա փետրվարին ընդունած որոշումը»,- ասել է նա։

Նա ԵԱՀԿ ԽՎ-ում իր ելույթի ժամանակ հարց է ուղղել, թե ինչ կաներ Ադրբեջանը, եթե հայտնվեր շրջափակման մեջ՝ հայտարարելով, որ Արցախի ժողովուրդը չի տարբերվում որևէ այլ ժողովուրդներից ու խորհրդարանի դահլիճում նստածներից։

«Նրանք ուզում են նորմալ կյանքով ապրել։ Անցյալ փետրվարին Արդարադատության միջազգային դատարանը շրջափակումը ճանաչել է որպես հայերի նկատմամբ ռասայական խտրականության դեպք: Անցյալ հունվարին տված հարցազրույցում Ադրբեջանի նախագահն ասել էր, որ Լեռնային Ղարաբաղից ելքը բաց է, և բոլորը կարող են հեռանալ։ Նա մոռացել էր ասել, որ եթե գնաս, այլեւս չես կարող վերադառնալ։ Նախագահի հայտարարությունը հստակ ցույց է տալիս, որ շրջափակումը եւս մեկ ապացույց է, որ Ադրբեջանի հիմնական նպատակը Լեռնային Ղարաբաղի հայերի էթնիկ զտումն է։ Ադրբեջանը պետք է փոխի իր քաղաքականությունը և սկսի իրական համերաշխություն ցուցաբերի իր հարևանների նկատմամբ, սկսի ցույց տալ, որ նրանք հոգ են տանում անմեղ մարդկանց կարիքների մասին»,- հայտարարել է իսլանդացի ներկայացուցիչը։

Նա Ադրբեջանին կոչ է արել արցախցիների համար բացել դեպի Արցախ տանող «կյանքի ճանապարհն» ու անմիջապես դադարեցնել շրջափակումը։

Աղբյուր` Փաստինֆո