Փաստ ինֆո

Բարձրագույն դատական խորհուրդը հերթական անգամ գերազանցեց սեփական «հակառեկորդը»։ ԲԴԽ-ում գործերի քննության ընթացքում խախտումներն ակնառու էին, իսկ դատավորներ Դավիթ Հարությունյանի, Աստղիկ Խառատյանի, Տիգրան Պետրոսյանի, Արտակ Բարսեղյանի լիազորությունները դադարեցնելու որոշումները՝ կանխատեսելի, այդուհանդերձ, կառույցն «անկախատեսելի» արդյունք գրանցեց՝ այս անգամ խոչընդոտելով նաև լրագրողների մասնագիտական գործունեությունը։

Նախ՝ թափանցիկության սկզբունքների մասին ազդարարած կառույցը կամայականորեն որոշել էր դռնփակ ռեժիմով քննել դատավոր Դավիթ Հարությունյանի վերաբերյալ վարույթը, որն ինչպես պարզվեց՝ իրականացվել է կոպտագույն խախտումներով, որի մասին ահազանգել են նաև դատավորի ներկայացուցիչները, իսկ դատավորներ Աստղիկ Խառատյանի, Տիգրան Պետրոսյանի, Արտակ Բարսեղյանի գործի՝ դռնբաց քննության ընթացքում փաստացի արձանագրվել է ԱՆ ներկայացուցիչների «մերկությունը», սակայն և՛ դատավոր Դավիթ Հարությունյանի, և՛ Տիգրան Պետրոսյանի և մյուսների, և՛ Բունիաթյանի գործով որոշումների հրապարակումը նախատեսված էր դռնբաց ռեժիմով։ Ոչ թե որպես բարի կամքի դրսեւորում, այլ՝ օրենքի ուժով, սակայն անգամ սա ԲԴԽ-ն բացահայտ խախտեց. փաստացի փակ դռների հետևում հրապարակեց դատավորներին կարգապահական պատասխանատվության ենթարկելու մասին որոշումները՝ թույլ չտալով, որ ԶԼՄ ներկայացուցիչները ներկա գտնվեն հրապարակմանը։

Ընդ որում, եթե ԲԴԽ-ն վերջին շրջանում, հատկապես, դատավոր Զարուհի Նախշքարյանի գործով նիստի հանրայնացումից հետո, հրապարակում է բացառապես դատական ակտերի եզրափակիչ մասի վերաբերյալ տեսանյութերը, ապա այժմ սահմանափակվում է նաև նիստը լուսաբանելու ցանկություն ունեցող լրագրողների մասնագիտական գործունեությունը, արգելվում է մուտք գործել նիստերի դահլիճ։ Այսինքն՝ Դատական դեպարտամենտի աշխատակիցները պետք է որոշեն, թե ԶԼՄ-ներում որ կադրերը պետք է տեսանելի լինեն հանրությանը, որ կադրերը՝ ոչ։

Նախ, որոշումների հրապարակման համար ԶԼՄ ներկայացուցիչները ԲԴԽ շենքում եղել են հրապարակումից առնվազն 20-30 րոպե շուտ, սակայն դատական կարգադրիչները թույլ չեն տվել բարձրանալ նիստերի դահլիճ՝ հայտնելով, որ շենքի առաջին հարկում սենյակ է հատկացվել, որտեղ տեղադրված էկրանից լրագրողները կարող են հետևել որոշման հրապարակմանը։ ԲԴԽ նախագահի խորհրդական Գագիկ Հարությունյանը, որն օրերս դարձել է դատավորի թեկնածու, հայտարարեց, թե դատական նիստերի դահլիճում տեղ չկա, իսկ մեր դիտարկմանը, որ նիստերի դահլիճը զբաղված է դատական դեպարտամենտի աշխատակիցներով, ըստ այդմ, առաջնահերթությունը պետք է տրվի ԶԼՄ ներկայացուցիչներին, որոնք իրենց մասնագիտական գործունեությունն են իրականացնում, նախ նշեց, որ տեղեկություն չունի, թե ովքեր են նիստերի դահլիճում, ապա նշեց, որ այնտեղ մարդիկ են, որոնց մուտքը չեն կարող սահմանափակել։ Հարությունյանը հորդորեց դիմել ԲԴԽ մամուլի ծառայություն, որտեղից, սակայն զանգերն անպատասխան թողեցին, չի բացառվում՝ հրահանգ կար չարձագանքելու, քանի որ փաստացի մամուլի քարտուղարի և Դատական դեպարտամենտի փոխարեն «պարզաբանում» ներկայացնելու դերը ստանձնել էր Անդրեասյանի խորհրդականը, ում խոստացել են դատավոր նշանակել։ Նիստերի դահլիճի ներսից արված տեսանկարահանումն էլ վկայեց, որ իրապես դատական նիստերի դահլիճում գտնվում են դեպարտամենտի աշխատակիցները, որոնց Կարեն Անդրեսայանն օգտագործել էր որպես «մասովկա» իր ապօրինությունները քողարկելու համար։

Լրագրողները, նկատի ունենալով Անդրեասյանի «վախերը» լրագրողներից, չեն առարկել, որ նիստերի դահլիճ բարձրանան միայն օպերատորները, ինչը ևս չի իրականացվել։ Եթե Կարեն Անդրեասյանը թաքնվելու և ապօրինությունները հանրությունից քողարկելու համար ընտրել էր գործերը դռնփակ ռեժիմով քննելու տարբերակը, ապա, դռնբացության պայմաններում Անդրեասյանը կրկին թաքնվում է, այս անգամ՝ փակ դռները քողարկելով էկրանով։ Ասել է թե՝ եթե դուռը փակ է, ուրեմն՝ ապօրինությունները չեն տեսնում, ամեն ինչ լավ է...։

Հեղինակ՝ Իզաբել Սահակյան

Աղբյուր` Փաստինֆո