Փաստ ինֆո

«Եթե դու չես պաշտպանվում, քեզ անընդահատ ստորացնելու, նվաստացնելու և թալանելու են։ Սա բնության օրենքն է։ Այսօր աշխարհում գայլերի օրենքն է տիրում՝ ով ուժեղ է՝ սուր է ճոճում թույլի գլխին, փորձում ունեզրկել, թալանել, գողանալ նրանը։ Նույնն անում է նաև Ալիևը՝ մեր նկատմամբ»,- «Փաստինֆո» լրատվականի հետ զրուցում ասել է «Արաբո» ջոկատի հրամանատար Մանվել Եղիազարյանը՝ մեկնաբանելով արհեստածինԱդրբեջանի նախագահ Իլհամ Ալիևի հերթական հոխորտալից և ռազմատենչ հայտարարությունը։

Հիշեցնենք՝ նախօրեին ադրբեջանական պետական «Az Tv» հեռուստաընկերության շաբաթական թողարկումից հայտնի դարձավ, որ Ադրբեջանը պատրաստվում է «Վրեժ–3» գործողություն իրանակացնել Արցախում։ Հաղորդման ժամանակ մեջբերումներ էին արվել Ադրբեջանի նախագահ Ալիևի հերթական սպառնալից ու ռազմատենչ ելույթներից, որում վերջինս մեղադրանքներ էր ներկայացրել նաև ռուսական կողմին, թե, իբր, խաղաղապահ առաքելություն իրականացնող ռուսական զորամիավորումը զինում է Արցախին։ Ալիևը հավելել էր, թե ՌԴ–ն ու ՀՀ–ն խախտում են նոյեմբերի 9-ի եռակողմ հայտարարության կետերը, իսկ Ադրբեջանը, դեռևս, չի հասել «Զանգեզուրի միջանցքի» բացմանն ու պետք է քայլեր ձեռնարկել այդ ուղղությամբ:

«Արաբո» ջոկատի հրամանատարն ասում է՝ հայ ժողովուրդն,այսօր ոչ միայն Ադրբեջանի դեմ է փորձում և ցանկանում պայքարել, այլ նաև՝ սեփական իշխանության դեմ։ Մենք շրջապատման մեջ ենք՝ ներսից ու դրսից միայն թշնամիներ են, որն, ըստ բանախոսի, ցավոք, մեզ համար լավ ավարտ չի ունենալու։

«Մենք հիմա պարտավոր ենք անմիջապես և առանց վախի ուշքի գալ, ի վերջո՝ ամոթ է։ Ալիևն ինքն էլ գիտի, որ 2020 թ. աշնանը փողով գնել է այն շրջանները, որոնք հիմա, ասում է, թե Ադրբեջանի տարածքային ամբողջականության մաս են կազմում։ Այս մասին հիանալի գիտի նաև աշխարհը, բայց լուռ է, որովհետև սեփական շահը պահանջում է նրանց լուռ մնալ։ Չի՞ ամաչում Ալիևը, չափահաս մարդ է, կարծես թե։ Հետո էլ՝ ասում են, թե տարիքն իմաստություն է բերում, բայց ինչպես տեսնում ենք՝ ոչ Ալիևի պարագայում։ Ինչպես ռուսն է ասում՝ եթե մարդն անուղեղ է, ապա դա ողջ կյանքի համար է»,- ասում է Մանվել Եղիազարյանը։

Հրամանատարը հավելում է՝ Ալիևի հերթական հոխորտանքը կրկին ապացուցում է այն փաստը, որ, եթե մենք մեզ չպաշտպանենք, աշխարհում ոչ ոք մեզ չի պաշտպանելու. «Ով ուզում ես եղիր՝ եթե դու քեզ չես պաշտպանելու, ուրիշն ինչո՞ւ պետք է գա, քեզ ու քո հողը պաշտպանի։ Ֆրանսիայի նախագահն, անգամ, վերջերս բարձրաձայնեց, թե բանակցային սեղանի շուրջ, ինքն Արցախի շահն ավելի է պաշտպանում, քան Հայաստանի Հանրապետությունը ներկայացնող անձը։ Հետևաբար, հայ ժողովրդին պետք է հասկացնել, որ ամեն երկրորդական բան կողքի դնելու ժամանակն է, հիմա ազգովի պետք է իրար գլխի հավաքվենք և լծվենք միայն մեկ գործի՝ Հայրենիքի սահմանների պաշտպանությանը, որ Հայրենիք ունենանք, որ անհայրենիք չդառնանք, այն, ինչ դարերով երազել է թուրքը։ Ի վերջո, ամենամեծ դավաճանությոնը հիասթափությունն է»։

Անդրադառնալով ռուսական խաղաղապահ զորքի վրա մատ թափ տալուԱլիևի երեկվա վարքագծին՝ Մանվել Եղիազարյանը նկատում է՝ ինչպես Ալիևն, այնպես նաև՝ հավաքական Արևմուտքն ու Փաշինյանը, լծվել են ռուսական ազդեցությունը տարածաշրջանից հեռացնելու գործին, որը, սակայն, ամեն գնով պետք է թույլ չտալ. «Այն պահից, երբ ռուսական խաղաղապահ առաքելություն իրականացնող զորքը դուրս կգա Արցախից, կարելի է ասել՝ Արցախի հարցը լուծված է, և մենք, այլևս, ոչինչ անել չենք կարողանալու։ Ամեն դեպքում, մեկ փաստ ակնհայտ է՝ Ալիևը չափազանց շատ է շտապում՝ թղթի վրա ստորագրված տեսել, այսպես կոչված, Խաղաղության պայմանագիրը և հատկապես հիմա նա կանի հնարավոր և անհնար ամեն բան՝ հասնելու դրան, իսկ մենք պետք է պատրաստ լինենք»։

Աղբյուր` Փաստինֆո