Փաստ ինֆո

Ադրբեջանն անելու է ամեն բան, որպեսզի հասարակությանը պառակտի, որպեսզի շուկայի աշխատողը գա, ասի՝ բա ի՞նչ է լինելու վերջը։ Արցախի Հանրապետության ԱԺ-ում նման հայտարարությամբ է հանդես եկել ԱՀ նախագահ Արայիկ Հարությունյանը՝ հավելելով, որ միասնականության դեպքում վերջը լավ է լինելու։

«Մենք պետք է աշխատենք, որ հասարակությունը հասկանա, որ եթե 10 օր հետո շաքարավազ չլինի, շուկայի աշխատող կանայք չգան ասեն՝ բա սրա վերջն ի՞նչ է լինելու։ Մենք պետք է որոշում կայացնենք։ Մեզ համար գլխավոր նպատակը շաքարավազ ունենա՞լն է, կոկա- կոլա խմե՞լն է, գարեջուր ունենա՞լն է, թե՞ իրականում մեր նպատակին հասնելը։ Եթե մեր նպատակին հասնելը, ապա, այո՛, մենք կրելու ենք զրկանքներ։ Պիտի հասկանանք։ Եթե ասում եմ ձմռանը գազ չի լինելու՝ հասարակությունը պետք է գիտակցի դա։ Բայց ասում են՝ նախագահն այս ի՞նչ է ասում։. ժողովուրդ, չեմ ուզում խաբել։ Այո՛, այս ինֆորմացիան իրավունք ունեմ բացելու»,- ասաց նա՝ հավելելով, որ պետք է պայքարել՝ հնարավոր պառակտումից զերծ մնալու համար։

Արայիկ Հարությունյանը հայտարարեց, որ այսօր կոմֆորտ փնտրելու դեպքում մեկ տարի անց այդ կոմֆորտը չի լինելու։ Իր խոսքով՝ եթե այսօր ճանապարհն առանց խոչընդոտների բացվի՝ ապա հետագայում շատ ավելի մեծ զրկանքներ են առաջ գալու։
«Դրա արդյունքում կա՛մ կկորցնենք երկիրը, կամ փախստականի կարգավիճակ կստանանք։ Ուրախ չեմ, առկա վիճակից, բայց այլ ելք չունենք»,- ասաց նա։

Արայիկ Հարությունյանը նաև հայտարարեց, որ որևէ մեկը չի կարող Արցախին զրկել ինքնորոշման իրավունքից։

Աղբյուր` Փաստինֆո