Փաստ ինֆո

«Ֆրանսիան կրակի մեջ է: Այդ պետության որոշ խոշոր քաղաքներում՝ Մարսելում, Թուլուզում, Նանտում իշխանություն, որպես այդպիսին, գոյություն չունի։ Այն, ինչ այս օրերին կատարվում է Ֆրանսիայում՝ քաղաքների տոտալ զավթումն ու թալանը, ինչպես նաև՝ մեքենաների ու շինությունների պայթեցումն ու ոչնչացումը, այսպես կոչված, երկրորդ ալիքի ֆրանսիացիների՝ իսլամական երկրներից ներգաղթած էմիգրանտների մասնակցությամբ, արդեն բնականոն երևույթ կարելի է համարել, ինչի մասին բազմաթիվ անգամներ խոսվել է»,- «Փաստինֆո» լրատվականի հետ զրույցում ասում է ԲՀԿ քաղխորհրդի անդամ Արման Աբովյանը։

Հիշեցնենք, որ ֆրանսիական մի շարք խոշոր քաղաքներում՝ Փարիզում ոստիկանների կողմից 17-ամյա դեռահասի սպանությունից հետո հրկիզումներ են սկսվել։ Հունիսի 27-ին, 17-ամյա ներգաղթյալ Նահելը մահացել էր ոստիկական կրակոցից՝ իրավապահի պահանջը չկատարելուց հետո: Ի աջակցություն ներգաղթյալ դեռահասի՝ Ֆրանսիայում ցույցեր և անկարգություններ կազմակերպվել։ Լարվածությունը գնալով այդ երկրում ժամ առ ժամ աճ է գրանցում։ Թուլուզի Միրայ թաղամասում, տեղի բնակիչների զայրույթն արտահայտվել է զանգվածային անկարգություններով՝ փողոցներում մեքենաների, ինչպես նաև աղբամանների այրումով։

Արման Աբովյանը նկատում է՝ նույնիսկ եվրոպական քաղաքականության ռահվիրաներից Անգելա Մերկելն, արդեն իսկ ընդունում է, որ եվրոպական մուլտիկուլտուրալիզմի քաղաքականությունն, ըստ էության, տապալվել է. «Արդյունքում ստեղծվել է մի իրականություն, որտեղ առկա է երկու Եվրոպա՝ առաջին դեպքում՝ եվրոպացի ժողովրդով բնակեցված խաղաղ երկրների մի միություն, երկրորդ պարագայում՝ որոշակի գործընթացների ներքո եռացող մի կաթսա, որը գեներացվում է, հիմնականում, իսլամիստ ռադիկալ խմբավորումների կողմից, որոնք բավականին լուրջ ազդեցութուն ունեն որոշ տվյալներով՝ մինչև՝ 8 մլն.-ի հասնող իսլամիստ ներգաղթյալների շրջանակներում»։

Եթե, որպես օրինակ, քննարկենք Ֆրանսիայի պարագան, ապա, ըստ բանախոսի, պետք է փաստենք, որ նրան չի հաջողվել, ըստ էության, կանխել այս պայթյունը.«Դա, ռադիկալ իսլամիզի պարագայում, տեսականորեն էլ հնարավոր չէր։ Նույն իրավիճակն, ի միջի այլոց, հիմա նաև Մեծ Բրիտանիայում, Գերմանիայում, Բելգիայում և այլ եվրոպական երկրներում է։ Այս պետություններին չի հաջողվել ստեղծել այնպիսի մթնոլորտ, որտեղ ներգաղթյալը կընդունի, այսպես կոչված, եվրոպական կենսաձևը, արժեքներն ու կշարժվի՝ համաձայն այդ երկրներում գործող օրենքների և այն տեսլականի, որն այդ երկրներն են փորձում առաջ տանել՝ մուլտիկուլտուրալիզմի և հանդուրժողականության շրջանակներում»։

Արման Աբովյանի դիտարկմամբ՝ ականատեսն ենք բոլորովին հակառակ մի պրոցեսի, երբ հենց եվրոպական դասական իշխանություններն ու կառավարությունները փորձում են հարմարվել պսևդո իսլամական ագրեսիվ քաղաքականությանը.«Այս իմաստով վառ օրինակ է Շվեդիան, որը, ընդամենը 10 տարի առաջ Եվրոպայի ամենաանվտանգ պետությոններից մեկն էր, իսկ արդեն այսօր այն մտնում է ամենավտանգավոր պետությունների տասնյակում, որտեղ Սոմալիից, աֆրիկյան և իսլամական պետություններից ներգաղթած էմիգրանտներն, ուղղակի, կրիմինալ տեռորի ենթարկել այդ պետությունը»։

Ամփոփելով զրույցը՝ բանախոսն ասում է՝ այս ամենն, իհարկե, ավելորդ անգամ ապացուցում է այն թեզը, որ հնարավոր չէ սոցիալական բարիքներով ձևափոխության ենթարկել մարդկանց մտածողությունը. «Սա, բացարձակ, անպտուղ գործողություն է, որովհետև իրականությունը ցույց տվեց և ապացուցեց, որ, այո, այսօրինակ դեպքերը եղել են կան ու դեռ լինելու են։ Ասեմ ավելին՝ մոտակա 4-5 տարիների ընթացում ես անհամեմատ ավելի ցավալի իրողությունների զարագացում եմ կանխատեսում Եվրոպայի համար»։

Աղբյուր` Փաստինֆո