Փաստ ինֆո

Իրանում, ինչպես նաև Հայաստանում, կարծես թե հստակ տարանջատված է ՀՀ սահմանային լարվածությունը և Արցախում իրավիճակը, ուստի իրանական կողմը գրեթե խուսափում է Արցախի վերաբերյալ որևէ հայտարարությունից՝ հաշվի առնելով հայկական կողմի դիրքորոշումը: «Փաստնֆոյի» եթերում ասել է իրանագետ, ԵՊՀ իրանագիտության ամբիոնի դասախոս Գարիկ Միսակյանը:

Նրա դիտարկմամբ, ՀՀ սահմանների վերաբերյալ Իրանից մշտապես հայտարարություններ են հնչում` հատկապես «Զանգեզուրի միջանցքի» հետ կապված, սակայն նաև Իրանի մտահոգություններն էլ են բավականին շատ, երբ Հայաստանի ու Ադրբեջանի միջև բանակցություններ են տեղի ունենում: Եվ, երբ այդ բանակցությունները հիմնականում տեղի են ունենում արևմտյան պետությունների տարածքներում, Իրանն այդ ժամանակահատվածում, կարծես թե, խուսափում է որևէ արձագանքից:

Անդրադառնալով Հայաստանի ու Թուրքիայի ղեկավարների հեռախոսազրույցին, իրանագետը նշեց, որ հատկապես Արցախում լարվածության ֆոնին, դա նաև Իրանում որոշակի հարցերի տեղիք տվեց, քանի որ պաշտոնական հաղորդագրության մեջ նախ չկար Արցախի վերաբերյալ որևէ բան, երկրորդ այդ լարվածության ֆոնին Իրանում որոշակի հարցեր առաջացան. արդյո՞ք ՀՀ-ն շարունակում է Արցախյան հակամարտության կարգավորման գործընթացում լինել հիմնական խաղացողներից, թե՞ այլ որոշում է կայացրել: «Միայն իրանական գործոնն է եղել պատճառներից մեկը, որ միջանցքը կյանքի չի կոչվել: Իրանը նորից վերահաստատել է այն դիրքորոշումը, որ չի ցանկանում միջանցքը ՀՀ և ԻԻՀ սահմանով անցնի, եթե նույնիսկ դա ցանկանան այլ պետություններ:

Իրանական կողմը նաև հղում է կատարում հայկական կողմին՝ նման միջանցք չտալու ցանկության մասին»,- ասել է Գ. Միսակյանը:

Անդրադառնալով իրանա-ադրբեջանական հարաբերություններին` իրանագետը նշեց, որ Իրանի և Ադրբեջանի հարաբերություններում կան խնդիրներ, որոնք, գրեթե անլուծելի են: Կարմիր գծերը վերաբերվում են Իրանի ազգային շահին, ուստի Իրանը դրանցից հրաժարվելու ցանկություն չունի:
Մանրամասները՝ տեսանյութում:

Աղբյուր` Փաստինֆո