Փաստ ինֆո

«Արցախի անվտանգության և զարգացման ճակատ» հանրային շարժումը հանդիպումներ է ունենում Ստեփանակերտում՝ ներկայացնելով շարժման գաղափարախոսությունն ու նպատակը: Հունիսի 15-ից Ադրբեջանի կողմից Արցախի լիակատար շրջափակման հետևանքով իրավիճակն ավելի է բարդացել: Հատկապես սուր է վառելիքի խնդիրը, ուստի Շարժման գործադիր կոմիտեի ներկայացուցիչներն այս ընթացքում հանդիպումներ են իրականացնում միայն Ստեփանակերտում՝ հանրության տարբեր խմբերի հետ:

Նախօրեին Շուշիից տեղահանվածների հետ հանդիպմանը Շարժման Գործադիր կոմիտեի ներկայացուցիչները նշել են, որ շարժումը բաց է բոլոր նրանց համար, ովքեր չեն տեսնում Արցախն Ադրբեջանի կազմում:

Նշելով, որ Ադրբեջանը փորձում է սեղմել օղակը Արցախի շուրջ և ամեն գնով հասնել Արցախի էթնիկ զտմանը՝ Շարժման ներկայացուցիչները միաժամանակ նկատել են, որ Ադրբեջանը միշտ է ձգտել դրան, իսկ արցախցիներին հաջողվել է դիմակայել՝ դրան հակադրելով իրենց պայքարի ոգին, հայրենիքում ապրելու կամքը ու չընկրկել դժվարությունների առջև:

«Առանց գաղափարի հնարավոր չէ հաղթահարել դժվարությունները: Եթե ոգի կա, կամք կա, գաղափար կա, ամեն ինչ հաղթահարելի է: Առանց հստակեցնելու գաղափարը՝ չես կարող հասկանալ, թե ուր ես շարժվում: Բայց կարևոր է նաև հավատն ու վստահությունը միմյանց նկատմամբ: Եթե մենք իրար չենք հավատում, անգամ ամենալավ նպատակը չի կարող հաջողություն ապահովել: Եվ, իհարկե, գաղափարին և հավատին պետք է ավելանա գործողությունը: Մենք՝ որպես շարժում, պետք է ասենք աշխարհին՝ մենք համաձայն չենք, որ Արցախը լինի Ադրբեջանի կազմում։ Մեր այս ասելիքը, մեր ձայնը պետք է հնչի շատ հստակ, բարձր, միասնական և հետևողական, որովհետև աշխարհը հիմա մեզ չի լսում»,-ասել է Շարժման համակարգող Ռուբեն Վարդանյանը:

«Շարժման նպատակն այն է, որ մարդիկ համախմբվեն ոչ թե մարդու, այլ գաղափարի շուրջ։ Մենք ուզում ենք մեր երկիրը պահել։ Տևական ժամանակ առաջ մենք ասել ենք հանրությանը՝ անցակետը մեզ համար կարմիր գիծ է, չի կարելի կարմիր գիծը փոքր-ինչ հատել ու կողքով անցնել-գնալ, որովհետև եթե մի բան ենք խոսք տալիս, պետք է մեր խոստումը պահենք։ Եթե որոշումը ընդունում ենք, պետք է իրագործենք այն։ Մեր սկզբունքը սա է»,- ավելացրել է Շարժման Գործադիր կոմիտեի անդամ Գարիկ Աբրահամյանը:

Նշվել է որ, Շարժման համար որևէ կերպ ընդունելի չեն Ադրբեջանի հետ նրանց պայմաններով խոսելու մոտեցումները: Ադրբեջանի հետ բանակցությունները պետք է տեղի ունենան միջազգային միջնորդությամբ և միջազգային մեխանիզմների շրջանակներում: Գործադիր կոմիտեի ներկայացուցիչները ընդգծել են թե՛ Արցախի իշխանությունների, թե՛ հանրության համար ընդունված վեց կարմիր գծերի՝ Հայաստանի հետ անխափան ու առանց սահմանափակումների ցամաքային կապի ապահովման, սեփական օրենքների, լեզվի, կրոնի ու մշակույթի, հայկական անձնագրի ու արժույթի, սեփական վերահսկողության ենթակառուցվածքների պահպանման կարևորությունն ու անխախտելիությունը:

Տեղեկացվել է, որ շարժումը ոչ միայն Արցախում է գործունեություն ծավալում, այլ աշխատանքներ են տարվում Հայաստանում և Սփյուռքում կառույցներ ստեղծելու ուղղությամբ, քանի որ Արցախը կարող է հաջողության հասնել միայն Հայաստանով և Հայկական աշխարհով:

Աղբյուր` Փաստինֆո