Փաստ ինֆո

Տեղ համայնքի ՔՊ-ական ղեկավարությունն ինչ ուզում, այն էլ անում է, մեջք ունեն ու քանդում են այն, ինչ ուզում եմ, շինում այն, ինչ իրենց անձնական շահի հետ է առնչվում։ «Փաստինֆո»-ի հետ զրույցում ասում է Տեղ համայնքի ավագանու ընդդիմադիր անդամ Մասիս Զեյնալյանը՝ նշելով, որ Սյունիքի մարզի դատախազն «իրենցն է, ինչ խնդրահարույց հարց, որ բարձրացվում ես, գնում է Երևան, հետ գալիս իրենց դատախազի մոտ։ Սա է իրավիճակը»։

Նրա փոխանցմամբ՝ արդեն 1.5 տարի կլինի, ինչ համայնքային ղեկավարությունը քանդել է 320 տ տարողությամբ ջրավազանը՝ 7 համայնքի զրկելով անխափան ջրամատակարարումից.«Հարցնում եմ՝ ինչո՞ւ եք քանդել, ասում են՝ նախկիններն են քանդել։ Այ ընկեր, զզվացրիք արդեն էդ նախկիններով, ջրավազանը քանդվել է 1.5 տարի առաջ՝ 2022-ին, ի՞նչ նախկիններ։ Արդյունքում, յոթը գյուղի ջրամատակարարումը դարձել է օրը մեջ կամ, լավագույն դեպքում՝ ժամով։ Եվ սա այն պարագայում, երբ մենք պատերազմող գոտի ենք, ամեն պահի պատերազմն այստեղ կարող է վերսկսվել»,- ասում է Զեյնալյանը։

Թե ինչո՞ւ է քանդվել Սյունիքի մարզի յոթ գյուղերի համար կենսական նշանակության ջրավազանը, Մասիս Զեյնալյանն ասում է՝ պատասխանը գիտի, սակայն դեռևս չի բարձրաձայնի, կսպասի պատկան մարմինների արձագանքին, որի չլինելու դեպքում արդեն ինքը կխոսի պատճառների մասին.«Հարցի քննարկմանը ներկա է եղել նաև մարզպետը, որ ասել է՝ ստեղծված իրավիճակը համազոր է հանցանքի։ Սրանք ասում են՝ նախկինների ժամանակ ինչ – որ խողովակ են հանել – տարել։ Ամոթ է ախր, մի խողովակի եղածն ի՞նչ է, որ համայնքապետարանը չի կարողանում բերի տեղադրի՝ էդ յոթը գյուղին չզրկեն խմելու ջրի ռեսուրսից»։

Մասիս Զեյնալյանը նկատում է՝ համայնքապետ Դավիթ Ղուլյանը, որի վերահսկողության տակ են գտնվում յոթը վարչական շրջաններ, պատերազմական իրավիճակում համարվելու է այդ ողջ տարածքի գերագույն պատասխանատուն, սակայն, իր դրսևորած վարքով, ըստ բանախոսի, նա դեռևս գերագույն չարիք է, ոչ թե պատասխանատու։ Ավագանու ընդդիմադիր անդամի խոսքերով՝ եթե առաջ քաշած խնդիրների լուծման համար արագ ու պատշաճ քայլեր չձեռնարկվեն, ինքը պատրաստվում է դիմել Գլխավոր դատախազություն։

Խնդիրներա այստեղ այսքանով չեն ավարտվում։ Մասիս Զեյնալյանն ահազանգում է՝ գործող համայնքային իշխանությունը պատրաստվում է սեփականաշնորհել ավազի հանքը.«Կան հարցեր, որ մարզպետի իրավասությունից դուրս են։ Հիմա դիմել ենք Տարածքային կառավարման նախարարություն, ինչպես նաև՝ վերահսկողական ծառայություն։ Ավազի հանքի սեփականաշորհումը հետագայում լուրջ խնդիրների առաջ է կանգնեցնելու գյուղին։ Եթե նախկինում, գոնե գյուղացիները կարողանում էին համայնքային բյուջեին սիմոլիկ գումար վճարելով օգտվեին ավազահանքից, հիմնականում գերեզմանների շինարարության աշխատանքների համար,ապա հիմա դա էլ չեն կարողանալու։ Գյուղի միակ առավելությունը սա էր, սրանից էլ ուզում են կտրեն գյուղացուն»։

Զեյնալյանն ասում է՝ հարցնում ենք՝ ո՞վ է ավազահանքը սեփականաշնորհել ցանկացող ընկերությունը, չեն ասում, գաղտնիք է. «Այնինչ, կան տեղեկություններ, որ դրանով զբաղվում է համայնքապետ Դավիթ Ղուլյանի եղբայրը՝ իր հիմնած «Աս Շին 80» ՍՊԸ-ով։ Ավելին, արդեն հայտարարություն է տարածվել համայնքապետարանի պաշտոնական էջով, թե Սյունիքի մարզի Տեղի բազալտային անդեզիտների հանքերեվակման տարածքում օգտակար հանածոների երկրաբանական ուսումնասիրության աշխատանքների, շրջակա միջավայրի վրա ազդեցության նախնական գնահատման հայտի վերաբերյալ հանրային քննարկում են նախաձեռնում և բոլորին հրավիրում են ակտիվ մասնակցություն ունենալ դրան։ Մի երկու հոգի՝ իրենց մարդկանցից, բերելու են, իբր, քննարկման են մասնակցում, հետո ողջ համայնքի անունից ասեն, որ ժողովուրդը համաձայն է ավազահանքի սեփականաշնորհման գործարքին և այդ հանքից ողջ հասույթը գնա համայնքապետի ընտանիքի գրպանը։ Սա է իրավիճակը՝ պատերազմող համայնքում»։

Ըստ նրա՝ համայնքում ապօրինությունները բազմաթիվ են՝ նշելով, որ ինչքան խոսում է, դեռ խոսելու բան է մնում.«Ախր, ինչպե՞ս կարելի է այսպիսի իրավիճակում, որում հայտնվել է համայնքը, համայնքային ղեկավարության կողմից այսպիսի վարք դրսևորել։ Հարց է քննարկվում, որին ես չեմ մասնակցում, հետո, մեկ էլ պարզվում է՝ իմ փոխարեն ինչ – որ մեկը քվեարկել է։ Գյուղապետարանները լցված են իրենց ազգականներով՝ աշխատում են միայն նրանք։ Մանկապարտեզներում՝ նույն իրավիճակն է։ Դավիթ Ղուլունցը, օրենք խախտելով, կնոջը 1-2 դրույթով մեթոդիստ է նշանակել։ Յոթ գյուղի մանկապարտեզներն, ընդամենը երկու մեթոդիստ են սպասարկում, որից մեկն իր կինն է։ Հետո էլ այս մարդիկ հայրենասիրությունից են խոսում…Սա՞ է կոչվում է հայրենասիրություն՝ քանդել սեփական գյուղը»,- ասում է Զեյնալյանը։

Աղբյուր` Փաստինֆո