Փաստ ինֆո

Մինչև օգոստոսի 1-ը գազի սակագնային տարին էր և վերանայման գործընթաց։ Գնի վերանայում, ամեն դեպքում, ձեռնարկվելու էր։ Այսօր տեղի ունեցած ճեպազրույցում այս մասին հայտարարեց Հանրային ծառայությունները կարգավորող հանձնաժողովի նախագահ Գարեգին Բաղրամյանը՝ անդրադառնալով հարցին, թե արդյո՞ք Հանրային ծառայությունները կարգավորող հանձնաժողովը քննել է գազի սակագինը վերանայելու հորդորով կուսակցություններից մեկի ներկայացրած դիմումը։

«Փոխարժեքն ընդամենը մեկ գործոնն է, որն ազդում է այդ սակագնի ձևավորման վրա։ Այնտեղ նաև կան այլ... (ազդակներ խմբ.)։ Իհարկե, փոխարժեքը դրական է ազդել, բայց եկեք չմոռանանք, որ սպառման շուրջ 70 տոկոսն արդեն օգտվում է փոխարժեքի նվազեցումից, որովհետև միայն բնակչության համար է, որ սահմանված է դրամային սակագին։ Իսկ մնացած 70 տոկոս սպառումը սահմանված է փոխարժեքի հետ կապված բանաձև։ Արդեն իսկ իրենց ամսական բացարձակ վճարումները նվազել են»,- ասաց նա։

Այդուհանդերձ, Բաղրամյանը հայտնեց նաև, որ որոշում է կայացվել այդ դրական արդյունքն ուղղել որոշակի ներդրումային ծրագրերի իրականացմանը։ Նա հիշեցրեց, որ կառավարության՝ դեռևս նախորդ նիստում կայացվեց որոշում, որով առաջարկվում էր Երևան քաղաքի գազամատակարարման համակարգի վերականգնում։
«Դա ենթադրում է Երևան մտնող ամբողջությամբ նոր 4 ուղղություններով գազաբաշխիչ կայանների կառուցում և նոր խողովակաշարի կառուցում, որի արդյունքում Երևանում սպառվող գազի ծավալի պոտենցիալը կրկնապատկվելու է»,- ասաց նա։

Հանրային ծառայությունները կարգավորող հանձնաժողովի նախագահը հայտնեց, որ գազի գնի հարցը ներկայացված է հանձնաժողովի վաղվա նիստին։ Առաջարկվել է գինը պահել նույնը՝ փոխարժեքի տատանման գումարներն ուղղելով ենթակառուցվածքների ներդրման գործին։ Բաղրամյանը մանրամասնեց, որ այս առումով սպառողը որևէ ներդրում չի անելու։ Իր խոսքով՝ հաշվի են առնվում նաև փոխարժեքի տատանման արդյունքում, հատկապես ամռանը, հնարավոր ռիսկերը։

«Ամառային ամիսներին բնակչության շրջանում գազի սպառում գրեթե չի լինում։ Կարող եմ ասել, որ ամռանն սպառումը եռակի, քառակի նվազում է։ Փոխարժեքի տատանմամբ ինչ-որ նվազեցում անելը հետագայում հետո աշնան կամ ձմեռային ամիսներին փոխարժեքի հնարավոր բարձրացման դեպքում շատ ավելի վատ անդրադարձ կունենա նույն սակագնի վրա»,- ասաց նա։

Բաղրամյանը նաև հայտնեց, որ կառավարության որոշմամբ ոչ թե սպառողն է վճարում ենթակառուցվածքների կառուցման համար, այլ ներդրված գումարով ենթակառուցվածքը կառուցվելու է, իսկ նոր սպառողները պարզապես վճարում են համապատասխան միացման գումարները։

«Այդ գումնարներն, արդեն, հավաքվելու են «Գազպրոմ»-ում, և հետագա սակագների վերանայման ժամանակ, միանշանակ, դրական արդյունք են ունենալու։ Այսինքն, ներդրումն ամբողջությամբ վերադարձվելու է ու գործող սակագների վրա լուրջ ազդեցություն չի ունենալու»,- ասաց նա։

Աղբյուր` Փաստինֆո