Փաստ ինֆո

Այսպես կոչված «խաղաղության պայմանագրի» ուղղությամբ տարվող բանակցություններին զուգընթաց՝ Ադրբեջանը ոչ միայն շարունակում է ռազմական սադրանքներն ու տեղեկատվական գրոհները, այլև սկսել է Արցախի ՊԲ զինծառայողներին անվանել «անջատողականներ»։ Դրանով Ադրբեջանը փորձ է անում Արցախի էթնիկ զտմանն ու ցեղասպանությանն ուղղված իր քայլերը ներկայացնել որպես «հակաահաբեկչական գործողություններ»։ «Փաստինֆո»-ի հետ զրույցում նման մտահոգություն հայտնեց քաղաքագետ Արա Պողոսյանը։

Ի միջիայլոց, վերջերս ռուսական կողմից արտահոսք եղավ այն մասին, որ ԱՄՆ ևս այնպիսի դիրքորոշում ունի, որ Ադրբեջանի կողմից իրականացվող գործողությունները ունեն հակաահաբեկչական բնույթ։ Եվ սա լեգալիզացվում է ՀՀ իշխանությունների՝ Արցախն Ադրբեջանի մաս ճանաչելու պատրաստակամության մասին հայտարարություններով»,-նկատում է Պողոսյանը։

Մեկնաբանելով Արցախի ԱԺ երեկվա հայտարարությանը, որով կոչ էր արվում ՀՀ պատվիրակությանը՝ անհապաղ դադարեցնել բանակցությունները, քանի դեռ հրադադարի ռեժիմը չի հարգում Ադրբեջանը, քաղաքագետը նշեց՝ դրանք տեղին են, բայց՝ ուշացած։

«Շատ ավելի շուտ էր պետք նման կոշտ արձագանքներով հանդես գար, ՀՀ իշխանություններին հստակ պետք է ներկայացնեին իրենց պահանջները, որոնք տեսականորեն կարող էին բանակցաին գործըթնացի ժամանակ քննարկման նյութ դառնալ։ Անգամ երեկվա հայտարարության մեջ ամբողջական ու պարզ ձևակերպված չէին ՀՀ բանակցողից սպասելիքներն ու հարցերը, որոնց շուրջ չկա համաձայնություն։

Վեր կանգնելով բոլոր հակասություններից, որոնք կան հայ քաղաքական ու քաղաքագիտական շրջանակներում՝ պետք է նկատի ունենալ, որ նման բովանդակությամբ հայտարարությունները կարևոր զսպող գործիք կարող են դառնալ հայկական կողմից բանակցողի ձեռքում՝ ընդդեմ Ադրբեջանի, այլ հարց է՝ դա կօգտագործվեր, թե ոչ»,-նկատում է Պողոսյանը։

Քաղաքագետի համոզմամբ՝ անկախ ՀՀ իշխանությունների՝ Արցախի հարցում ունեցած դիրքորոշումից ու դրա առաջացրած ծանր հետևանքներից, Արցախի իշխանությունները բանակցային տարբեր շրջափուլերում՝ թեկուզ առանձին, իրենց պահանջները, Արցախի ապագայի հետ կապված իրենց հայեցակարգը պետք է հասցնեին ուժային կենտրոններին՝ օգտագործելով աշխարհում գործող մեր լոբբիստական խմբերը, Սփյուռքի ներուժը՝ այդպես նաև հանրահռչակելով դրանք։

Իսկ վաշինգտոնում ընթացող բանակցություններից կոնկրետ քաղաքագետը որևէ ակնկալիք չունի։

«Պարզ է, որ ՀՀ բանակցողն Արցախի իշխանությունների կոչերին չի անսալու։ Սրան նախորդած ժամանակահատվածում Արցախը ներկայացնող ղեկավարությունը բավականաչափ հաստատակամություն չի ցուցաբերել՝ իր դիրքորոշումն ու պահանջներն ամբողջությամբ պնդելու իմաստով»,-եզրափակեց Արա Պողոսյանը։

Աղբյուր` Փաստինֆո