Փաստ ինֆո

Կառավարության այսօրվա նիստում հավանության է արժանացել թոշակների և նպաստների չափը հուլիսի 1-ից մի քանի հազար դրամով բարձրացնելու մասին՝ Աշխատանքի և սոցիալական հարցերի նախարարության ներկայացրած նախագիծը։
Ըստ այդմ՝ նվազագույն կենսաթոշակի չափը կկազմի 36 000 դրամ 31 600–ի փոխարեն, աշխատանքային կենսաթոշակը 24 000 դրամ` 21 000-ի փոխարեն։

Սոցապ նախարարը նշեց, որ միջին կենսաթոշակը կբարձրանա 7,1 տոկոսով, այսինքն՝ 46 100 դրամից հասնելով 49 700 դրամի։
Զինվորական կենսաթոշակի շահառու հանդիսացող 1-ին խմբի հաշմանդամություն ունեցողները կստանան 50 600 դրամ 46 000–ի փոխարեն, 2-րդ խմբի շահառուները՝ 41 400 դրամ 36 000 դրամի փոխարեն, 3-րդ խմբինը 38 000 դրամ` 33 000 դրամի փոխարեն։
Պարտադիր ժամկետային զինվորական ծառայության շարքային կազմի մահացած (զոհված) զինծառայողի ընտանիքի անդամի կերակրողին կորցնելու դեպքում զինվորական կենսաթոշակի չափը հուլիսի 1-ից կկազմի 38 000 դրամ 33 000–ի փոխարեն, իսկ երկու ծնողին կորցրած՝ 18 տարին չլրացած երեխայի դեպքում՝ 120 000 դրամ 90 000 – ի փոխարեն։

Նախարարության առաջարկով կբարձրացվեն նաև ծերության, հաշմանդամության և կերակրողին կորցնելու դեպքում նպաստների չափերը. ծերության նպաստի չափը կկազմի 36 000 դրամ 31 600-ի փոխարեն, 1-ին խմբի հաշմանդամություն ունեցող անձի թոշակը 39 000 դրամ 31 600-ի փոխարեն, 2-րդ խմբի համար՝ 37 500 դրամ 31 600 դրամի փոխարեն, 3-րդ խմբի համար՝ 36 000 դրամ` 31 600 դրամի փոխարեն։

Սոցապ նախարարությունում հաշվարկել են, որ 2023 թվականի պետական բյուջեով նախատեսված գումարները բավարար են հիշյալ բարձրացումն ապահովելու համար։ Նախնական գնահատմամբ, դրա համար կպահանջվի շուրջ 7.5 մլրդ դրամ հավելյալ գումար։
Նախարարը վստահեցրեց, որ տեմպը պահպանելու դեպքում 2026թ թվականին նվազագույն կնեսաթոշակի չափը գրեթե կմոտենա նվազագույն սպառողական զամբյուղին։

Աղբյուր` Փաստինֆո