Փաստ ինֆո

Ադրբեջանական ռազմական սադրանքների համատեքստում Վաշինգտոնում ընթացող բանակցություններն ընդհատելու Արցախւ խորհրդարանի պահանջին ՀՀ իշխանությունները չեն արձագանքել:

«Ոչ միայն չարձագանքեցին, այլ անգամ՝ չնկատեցինք մեր հայտարարությունը,- «Փաստինֆո» լրատվականի հետ զրույցում ասում է Արցախի խորհրդարանի ընդդիմադիր «Արդարություն» խմբակցության պատգամավոր Մետաքսե Հակոբյանը:

Հիշեցնենք՝ Ադրբեջանի ԶՈՒ ստորաբաժանումները երեկ հրետանային միջոցներից կրակ էին բացել Մարտունու և Մարտակերտի հայկական դիրքերի ուղղությամբ` կիրառելով նաև ԱԹՍ-ներ, որի հետեւանքով ունենք չորս զոհ:

Միաժամանակ, Վաշինգտոնում շարունակվում են Միրզոյան – Բայրամով բանակցությունները, թեեւ Արցախի Ազգային Ժողովը հանդես եկավ հայտարարությամբ, կոչ անելով՝ Հայաստանին անհապաղ դադարեցնել Վաշինգտոնում մեկնարկած բանակցությունները։

Պատգամավորը ցավով է նկատում՝ հույսը կտրելով հայաստանյան իշխանություններից, չեն կարող դիմել նաև Սփյուռքին, որովհետև այն պառակտումը, որ առկա է Արցախում և Հայաստանում, կապիտուլյանտ իշխանությունների շնորհիվ տարածվել է նաև ավանդական Սփյուռքի վրա. «Չգիտենք՝ ի՞նչ կարող է ստեղծված իրավիճակում անել Սփյուռքը, եթե շնորհիվ հայաստանյան օրվա իշխանությունների, պառակտում է մտել նաև Սփյուռքի մեջ։ Մենք տեսնում ենք, թե ի՞նչ է կատարվում այնտեղ և չգիտենք, թե դիմելով նրանց, ինչո՞վ այս պահին կարող է մեզ օգտակար լինել Սփյուռքը։ Արցախը մշտապես կողմնակից է եղել համայն հայության հետ հարաբերությունների կառուցման առողջ բանաձևին՝ Հայաստան – Սփյուռք – Արցախ, սակայն այսօր, արդեն, մտածում ենք բոլորովին նոր համահայկական կառույցի ստեղծման մասին»,- ասում է Մետաքսե Հակոբյանը։

Արցախի Ազգային Ժողովի նիստ է տեղի ունեցել, որին մասնակցում էին նաև Արցախի նախագահ Արայիկ Հարությունյանն ու ԱՀ Կառավարությունը. «Մտքերի փոխանակության ժամանակ, իմ ելույթը ափերից հանեց Արայիկ Հարությունյանին։ Նա Ազգային Ժողովի ամբիոնից սկսեց շարքային, էմոցիոնալ մարդու վարք դրսևորել, ասելով, թե ինքն անկեղծ զրույցի էր եկել, ոչ թե քաղաքական քննարկման, ստեղծված իրավիճակի համար մեղավոր հանելով, անգամ, ժողովրդին և այլն։ Արայիկ Հարությունյանը շատ հստակ հասկացրեց նաև, որ Արցախի ապագայի վերաբերյալ որևէ տեսլական ինքն, այս պահին, չունի, չգիտի անգամ, թե ի՞նչ մարտահրավերներ են սպասվում մեզ՝ Արցախում ապրողներիս, վաղը և, թե ինչպես հնարավոր կլինի դրանք հաղթահարել»։

Պատգամավորը նկատում է՝ այս ամենն իր համար, մեղմ ասած, տարօրինակ էր։ Անհասկանալի էր նաև, թե ինչպես կարող է երկրի նախագահը հայտարարել, թե Ազգային Ժողովի լիագումար նիստին է գալիս՝ անկեղծ զրույցներ ունենալու համար։ Այդպիսի բան չի լինում, ասում է պատգամավորը և հավելում՝ Ազգային Ժողովն ունի իր կանոնակարգը, որը իրենք չեն հորինել, այլ ամրագրված է ԱՀ Սահմանադրությամբ.«Ինչ վերաբերում է իմ ելույթին, ապա այն, ընդհանուր առմամբ, շատ հստակ ուղերձ էր պարունակում՝ երբ, դեռևս, 2022 թվականից մենք հնարավոր ու անհնար բոլոր հարթակներով մեր մտահոգություններն էին բարձրաձայնում և ահազանգում, որ, կարճ ժամանակ անց, մեզ սպասվելու է այն, ինչում հենց այս պահին հայտնվել է Արցախն ու արցախցին, իշխանությունները ոչ մի առիթ բաց չէին թողնում՝ մեղադրելու մեզ խուճապ առաջացնելու նպատակով պոպուլիզմով զբաղվելու մեջ։ Ըստ էության, իմ այօրվա ելույթով, ես շատ հանգիստ Արցախի իշխանությանը ցույց տվեցի իրենց իսկ պոպուլիզմի իրական չափաբաժինը, որ չդադարեց, անգամ, պատերազմից հետո։ Այս ողջ ընթացքում Արցախի իշխանությունը բացի պոպուլիզմից, բացարձակապես ուրիշ ոչնչով չի զբաղվել, որով կեղծ լավատեսության հույսեր էր ներշնչում ժողովրդին, իսկ արդյունքում ունենք այն, ինչ այսօր ունենք»։

Աղբյուր` Փաստինֆո