Փաստ ինֆո

«Բնակարանների և անհատական բնակելի տների էներգաարդյունավետ վերանորոգման աշխատանքների պետական աջակցության ծրագրի» գործողության ժամկետը կերկարաձգվի մեկ տարով՝ մինչև 2024թ. հուլիսի 1-ը։ ՏԿԵ նախարարության առաջարկած այս նախագիծը Կառավարության այսօրվա նիստում հավանության արժանացավ։

Նախագծով նախատեսվում է հանել Ծրագրով շահառուներին տրամադրվող վարկի տոկոսադրույքի առավելագույն շեմը (14% փաստացի) և սահմանել սուբսիդավորման հստակ տոկոսադրույքներ Ծրագրով առանձնացված բնակավայրերի մասով։

Ծրագրի ավարտը նախատեսված էր 2023 թվականի հուլիսի 1-ին: Ծրագրի շրջանակներում տրամադրված միջոցների նպատակային օգտագործման մշտադիտարկման, Ծրագրի արդյունավետության գնահատման և դրա արդյունքներով Ծրագրի ժամկետը երկարաձգելու վերաբերյալ որոշում կայացնելու նպատակով՝ ՀՀ ՏԿԵ նախարարությունը ՀՀ կենտրոնական բանկի և Ծրագրի շրջանակներում Նախարարության հետ համագործակցող բանկերի հետ համատեղ ս.թ. մայիսի 12-ից 26-ն ընկած ժամանակահատվածում իրականացրել է մշտադիտարկման միջոցառումներ Երևան քաղաքում և ՀՀ մարզերում:

Ինչպես նշեց ՏԿԵ նախարար Գնել Սանոսյանը, նախարարության ներկայացուցիչները, առևտրային բանկերն ու վարկային կազմակերպությունները տեղերում ծանոթացել են կատարված աշխատանքներին, արձանագրել իրականացված աշխատանքների՝

Ծրագրի պահանջներին բավարարելու փաստերը։ Ըստ այդմ՝ բոլոր 70 բնակելի տներում/բնակարաններում իրականացված մշտադիտարկումների արդյունքում արձանագրվել է, որ իրականացված աշխատանքները համապատասխանում են Ծրագրի պահանջներին։

Սանոսյանը նաև նշեց, որ արդեն 6,5 մլրդ վարկային միջոցներ են տրամադրվել։ Վարչապետն էլ հիշեցրեց ծրագրի պարտադիր պայմանի մասին՝ տրամադրվող վարկի առվազն 30 տոկոսն օգտագործել էներգախնայողության նպատակով։

Աղբյուր` Փաստինֆո