Փաստ ինֆո

ՀՀ-ում իշխանությունն օկուպացրած հանցախումբը չի ներկայացնում, ավելին, մանդատ չունի ներկայացնելու հայ մարդու շահերը։ ՄԱԿ-ի գրասենյակի մոտ հայտարարել են ՀՅԴ նախաձեռնությամբ տեղի ունեցած ակցիայի մասնակիցները՝ նշելով, որ սակարկման առարկա չեն արցախցի մեր հայրենակիցների ինքնորոշման իրավունքն ու մեր երկրի տարածքային ամբողջականությունը

Ինչպես արդեն տեղեկացրել ենք՝ ՀՅԴ-ն հունիսի 26-ին հայտարարել էր 24-ժամյա նստացույց՝ ԵԱՀԿ Մինկի խմբի համանախագահ երկրների՝ ՌԴ-ի, ԱՄՆ-ի ու Ֆրանսիայի դեսպանատների, ինչպես նաեւ ԵՄ ներկայացուցչության գրասենյակի մոտ՝ «SOS Artsakh խորագրով, որն ամփոփվեց այսօր առավոտյան ՄԱԿ-ի գրասենյակի մոտ։

«Ժամանակն է, որ հայտարարությունների տեքստերից անդին, գործուն ու արդյունավետ քայլերով ցույց տալու, որ իրենք իրական ժողովրդավարության, մարդու իրավունքների ջատագովն են։ Ժամանակն է, որ դադարեն լինեն խուլ, համր և կույր։ Ժամանակն է, որ կանգնեն իրական ժողովրդավարության, մարդու իրավունքների և համամարդկային արժեքների կողքին։ Այսինքն, ժամանակն է, որ կանգնեն Արցախի Հանրապետության կողքին»,- հայտարարեցին ակցիայի մասնակիցները։

24-ժամյա նստացույց իրականացրած մեր հայրենակիցները տարբեր պաստառներով ու վանկարկումներով միջազգային հանրության ուշադրությունն են հրավիրում Ադրբեջանի կողմի մարդու կյանքի իրավունքի կոպիտ խախտումներին։ Հայտարարում են, որ չնայած միջազգային տարբեր կառույցների կողմից ընդունված տարբեր բանաձևերին ու օրինագծերին, միջազգային հանրությունը բավարար քայլեր չի կատարում Արցախում ծայրահեղ ճգնաժամի ու ցեղասպանության առջև կանգնած արցախահայության խնդրի լուծման ուղղությամբ։
Ներկաների բնորոշմամբ՝ ՀՀ-ում իշխանությունն օկուպացրած հանցախումբը չի ներկայացնում, ավելին, մանդատ չունի ներկայացնելու հայ մարդու շահերը։ Իրենց խոսքով՝ սակարկման առարկա չեն արցախցի մեր հայրենակիցների ինքնորոշման իրավունքն ու մեր երկրի տարածքային ամբողջականությունը։

«Արդեն 199 օր է՝ Արցախում 120.000 հայ մարդիկ՝ 30 հազ. երեխա, 20 հազ. տարեց, 9 հազ. հաշմանդամություն ունեցող հայեր զրկված են իրենց տարրական կենսական, առողջապահական ու այլ իրավունքներն իրացնելու հնարավորությունից։ Ես այստեղ եմ ՄԱԿ-ի գրասենյակի ներկայացուցիչներին փոխանցելու Արցախի ՄԻՊ-ի կոչը՝ դադարեցնել երկակի ստանդարտները, դադարեցնեն չնկատել, չլսել և չտեսնել Արցախից հնչող SOS ահազանգը»,- ասաց «Հայաստան» խմբակցության պատգամավոր Ասպրամ Կրպեյանը։

Աղբյուր` Փաստինֆո