Փաստ ինֆո

Արցախի ԱԺ-ն քիչ առաջ ընդունեց հայտարարություն, որում ասված է․

«Ադրբեջանի ԶՈՒ-ն հերթական անգամ կոպտորեն խախտելով 2020թ․ նոյեմբերի 9-ին ընդունված եռակողմ հայտարարությամբ հաստատված հրադադարի ռեժիմը՝ սույն թվականի հունիսի 27-ի լույս 28-ի գիշերվա ժամը 1։30-ից սկսած՝ տարբեր զինատեսակներից կրակ են բացել Արցախի հանրապետության տարածքի ուղղությամբ, որի հետևանքով զոհվել են մեր չորս հայրենակիցներ։

Ադրբեջանի կողմից Արցախի լիակատար շրջափակման պայմաններում հրետանային միջոցների և ԱԹՍ-ների կիրառմամբ Արցախի Հանրապետության քաղաքացիների այս հերթական սպանությունը վկայում է, որ Ադրբեջանի ռազմաքաղաքական ղեկավարությունը, անտեսելով միջազգային հեղինակավոր կառույցների կոչերն ու որոշումները, խաղաղության կեղծ օրակարգերով սքողված ցեղասպանական գործողություններով ձգտում է ռազմական քաղաքական, տնտեսական գործիքակազմերի կիրառմամբ հասնել իր հիմնական նպատակին՝ Արցախի վերջնական հայաթափմանը։

Հատկանշական է, որ Ադրբեջանի կողմից հրադադարի ռեժիմի պարբերական խախտումները, ինչպես նաև այս նոր դեպքը, նախորդ դեպքերի նման նույնպես արձանագրվել է այն ժամանակ, երբ ԱՄՆ պետքարտուղարի միջնորդությամբ Վաիշնգտոնում տեղի են ունենում ՀՀ և Ադրբեջանի արտգործնախարարների հերթական բանակցությունները։ Դա, անշուշտ, ևս մեկ անգամ վկայում և հաստատում է, որ «խաղաղության պայմանագրի» շուրջ տեղի ունեցող բանակցությունները իրականում ոչ այլ ինչ են, քան տարածաշրջանում տևական խաղաղության մթնոլորտի ստեղծման նմանակում՝ իբր թե միջազգային ջանքերի համատեքստում։

Խորապես անհանգստացած առկա վտանգավոր իրողությամբ՝ Արցախի Հանրապետության ժողովրդի անունից դիմում ենք ՄԱԿ-ի ԱԽ-ին, ԵԱՀԿ Մինսկի խմբի համանախագահ երկրների ղեկավարներին՝ կարեկցանքի հայտարարություններից, հորդորներից և խորհուրդներից զատ, ձեռնարկել կոնկրետ գործնական քայլեր՝ մասնավորապես պատժամիջոցներ կիրառել Ադրբեջանի նկատմամբ՝ զսպելով նրա ագրեսիվ նկրտումները։ Համոզված ենք, որ երկակի ստանդարտներով գործելաոճն ավելի է ոգևորում Ադրբեջանին՝ նրան դարձնելով սանձարձակ և անվերահսկելի, ՌԴ-ին խաղաղապահ առաքելության շրջանակում՝ առավել կոշտ միջոցներով կասեցնել Ադրբեջանի հակամարդկային, ցեղասպան գործողությունները, վաշինգտոնյան բանակցություններում ՀՀ պատվիրակությանն անհապաղ դադարեցնել մեկնարկած բանակցությունները՝ մինչև Արցախի հետ շփման գծում և ՀՀ սահմաններում լիակատար հրադադարի հաստատումը և այն պահպանելու փաստաթղթային երաշխիքների տրամադրումը։ Հակառակ պարագայում՝ բանակցությունների շարունակումը կնշանակի ադրբեջանական կողմի ագրեսիվ պահվածքի խրախուսում և միջազգային մակարդակով արտոնություն։

Մեր խոնարհումը բերելով հանուն Հայրենիքի իրենց կյանքը նվիրաբերած մեր չորս նահատակների հիշատակին՝ պատրաստակամ ենք շարունակելու նրանց սուրբ գործը»։

Աղբյուր` Փաստինֆո