Փաստ ինֆո

Երևան քաղաքը շատ լուրջ խնդիրներ ունի աղբավայրերի հետ կապված։ Դրանք շատ հնաոճ են և աղբի զատում լիարժեքորեն չի իրականացվում։ «Փաստինֆո»-ի տաղավարում այս մասին ասաց բնապահպան Սիլվա Ադամյանը՝ անդրադառնալով Նուբարաշենի աղբավայրում տարիներ շարունակ կրկնվող հրդեհներին ու դրանց էկոլոգիական հետևանքներին։ Մեր զրուցաակցի խոսքով՝ Հայաստանի աղբավայրերում կարելի է հանդիպել ամեն ինչի՝ սկսած պոլիէթիլենային տոպրակներից մինչև շինաղբ ու ապակու կտորներ։ Հենց դրանք էլ, ըստ բնապահպանի, պատճառ են դառնում շոգ եղանակներին գրանցվող հրդեհների։

«Երբ եղանակը տաքանում է ու արևն անդրադառնում է անգամ փոքր երկաթի՝ ներժի կտորի, ապա անմիջապես սկսում է մխել։ Այդ հրդեհը կարող է անգամ շատ ուժեղ չլինել, բայց ամիսներ շարունակ մխելու հետևանքները կարող են աղտոտել մթնոլորտը»,- ասաց նա։

Բնապահպանը հայտնեց, որ ինքը ժամանակին ուսումնասիրել է աղբավայրերը։ Իր խոսքով՝ մեր աղբավայրերում կատաստրոֆիկ հակասանիտարական վիճակ է տիրում։ Բնապահպանն այնտեղ տեսել է մեծաթիվ առնետներ, սատկած կենդանիներ, ամենակեր թռչուններ։ Այսպիսի դեպքերում, ըստ Ադամյանի, խոսքը վերաբերում է ո՛չ միայն աղբի այրվելուն, այլ խնդիրը շատ ավելի խորն է։

«Այս ամենը կարող է մարդկանց մոտ շնչառական օրգանների խնդիրների առաջացման պատճառ դառնալ, թոքերի հետ կարող են խնդիրներ ծագել։ Իսկ իմ ներկայացրած այդ հակասանիտարական վիճակը կարող է նպաստել տարբեր հիվանդությունների տարածմանը»,- ասաց նա։
Այս առումով, բնապահպանն արձանագրեց, որ այս համատեքստում, ինքը նախորդ օրերին սպասել է Հայաստանի պետական որևէ գերատեսչության, հատկապես Առողջապահության նախարարության համապատասխան հայտարարությանը՝ մթնոլորտի աղտոտման հետևանքներից զերծ մնալու առումով, սակայն, դա այդպես էլ տեղի չի ունեցել։

«Ե՛վ քաղաքապետարանը, և՛ պատկան մարմինները պետք է հատուկ մոտեցում ունենան այս խնդրին։ Այն, որ այս այրման պարագայում իրենք լռում են՝ ինձ համար պարզ չէ ու նորմալ չէ։ Շատերն անգամ քննադատեցին, ասացին, որ առողջապահության նախարարն ուղղակի պարտավոր էր հայտարարություն անել և ասել, որ հարգելի քաղաքացիներ, աղբավայրը վառվում է, ձեզ այսպես կպահեք։ Մեր բնապահպան գործընկերներն էին հրապարակել՝ կետերով, թե ինչ պետք է արվեր. Լուսամուտները փակել, թաց շորով մաքրել, դիմակներ կրել, փորձել հնարավորինս քիչ դուրս գալ տներից, ողողումներ անել։ Իհարկե, շատ լավ է, որ մենք այսպիսի գրագետ գործընկերներ ունենք, բայց, կներեք էլի, մի քիչ կարող է կոպիտ ստացվել, Առողջապահության նախարարությունն այդ դեպքում ինչո՞վ է զբաղված»,- ասաց նա։
Ադամյանն անընդունելի համարեց նաև աղբավայրը հողով ծածկելու մասին հայտարարությունները՝ հայտնելով, որ դա չի կարող խնդրի լուծում լինել։ Խոսեց նաև աղբավայրերի գարշահոտության ու քաղաքի «փոշու ամպի» խնդիրների մասին։

Իր խոսքով՝ ինքն ու իր գործընկերներն այս բոլոր խնդիրներով բազմիցս դիմել են պատկան մարմիններին, սակայն, իրենց խոսքը լսող չկա։

Աղբյուր` Փաստինֆո