Փաստ ինֆո

Ադրբեջանի ֆաշիստական ռեժիմը քաղաքակիրթ աշխարհի առաջ հերթական թշնամական, ահաբեկչական գործողություններն իրականացրեց Արցախի Հանրապետության, Արցախի ժողովրդի և համայն հայ ժողովրդի դեմ։ ՄԱԿ-ի Հայաստանյան գրասենյակի դիմաց այսօր առավոտյան տեղի ունեցած SOS Artsakh ակցիայի ժամանակ հայտարարեց «Հայաստան» խմբակցության պատգամավոր Արթուր Խաչատրյանը՝ ներկաներին հորդորելով մեկ րոպե լռությամբ հարգել ադրբեջանական սադրանքի հետևանքով զոհված մեր 4 հայրենակիցների հիշատակը։

Խաչատրյանը դիմեց Հայաստանում ՄԱԿ-ի ներկայացուցչությանը՝ հիշեցնելով ՄԱԿ-ի կանոնադրության հիմքում մարդու ազատ ինքնորոշման իրավունքի կետի ապահովման անհրաժեշտությունը։

«ՄԱԿ-ի ստեղծումից հետո տասնյակ պետություններ են ստեղծվել՝ իրացնելով ազգերի ազատ ինքնորոշման և իրավահավասարության իրավունքը։ Իսկ ինչո՞վ է Արցախի ժողովուրդը պակաս մյուս ազգերից, որոնք օգտագործելով այդ իրավունքը, պետություն են ստեղծել... .... տարածքային ամբողջապանության սկզբունքը, որի վրա հղում է կատարում Ադրբեջանը, իսկ այսօր նաև Ադրբեջանի բարեկամ ՔՊ-ական իշխանությունը՝ որևէ կերպ չեն արգելում ժողովուրդներին իրացնել ինքնորոշման իրավունքը»,-ասաց նա։
Խաչատրյանն հղում կատարեց նաև ՄԱԿ-ի ԱԽ 4 բանաձևերին, որոնք Ադրբեջանին կոչ են անում դադարեցնել ագրեսիվ գործողությունները։

«Մինսկի խմբի համանախագահ երկրները, որոնք կոչված էին բանակցային գործընթացով ապահովել Արցախի հակամարտության խաղաղ կարգավորումը՝ Արցախի վերջնական կարգավիճակի ճշտումը, նաև ինքնորոշման իրավունքի և իրավահավասարության սկզբունքներից ելնելով, բազմաթիվ անգամ հայտարարում էին, որ ուժի կիրառումը երբեք անպատիժ չի մնա։ Ադրբեջանն ուժ կիրառեց 2020 թվականին, Ադրբեջանն ուժ է կիրառում նաև այսօր։ Ինչո՞ւ է Ադրբեջանը մինչև այս պահն անպատիժ»,- ասաց նա։
Այս համատեքստում, պատգամավորը հավաստիացրեց, որ որքան էլ միջազգային հանրությունը հայտարարի, թե միջազգային իրավունքն առաջնային է՝ Ադրբեջանն, իր խոսքով, թքած ունի այդ ամենի վրա, քանի որ խախտելու դեպքում որևէ հետևանքի առջև չի կանգնում։ Խաչատրյանը կոչ արեց՝ մարդու իրավունքների պաշտպանության համար խոսքից անցնել գործի՝ Ադրբեջանի նկատմամբ պատժամիջոցներ կիրառելով։

«Մի՞ թե Ադրբեջանի նավթային շանտաժն ավելի ուժեղ է։ Մի՞ թե Ադրբեջանի նավթն ավելի հզոր է, քան 120.000 մարդու կյանքը, 30 հազ. երեխայի կյանքը, արցունքները, թերսնումը, կրթության ու առողջության իրավունքից զրկումը։ Սա՞ է այդ իրավունքը, որ դուք այդքան «վեհանձն» քարոզում եք։ Մի՞ թե կարելի է կրկնակի ստանդարտներն այսքան նողկալիորեն առաջ մղել։ ՄԱրդու իրավունքներից եք խոսում, ուզում եք՝ հավատա՞ն ձեզ։ Դե գնացեք Արցախ ու խոսեք մարդու իրավունքներից»,- հայտարարեց պատգամավորը։
Ինչպես արդեն տեղեկացրել ենք՝ ՀՅԴ-ն հունիսի 26-ին հայտարարել էր 24-ժամյա նստացույց՝ ԵԱՀԿ Մինկի խմբի համանախագահ երկրների՝ ՌԴ-ի, ԱՄՆ-ի ու Ֆրանսիայի դեսպանատների, ինչպես նաեւ ԵՄ ներկայացուցչության գրասենյակի մոտ՝ «SOS Artsakh խորագրով, որն ամփոփվեց այսօր առավոտյան ՄԱԿ-ի գրասենյակի մոտ։

Աղբյուր` Փաստինֆո