Փաստ ինֆո

Երևանի ընդհանուր իրավասության դատարանի դատավոր Դավիթ Հարությունյանին կարգապահական պատասխանատվության ենթարկելու միջնորդության քննությունը ԲԴԽ-ում՝ փակ դռների հետևում, խախտումներով է իրականացվել, այդ թվում՝ սահմանափակումներով, որոնք հանգեցնում են դատավորի՝ արդար դատաքննության իրավունքի խախտմանը։ Աննախադեպ շտապողականությամբ՝ ընդամենը չորս օրվա ընթացքում, Խորհուրդը քննեց դատավորին կարգապահական պատասխանատվության ենթարկելու միջնորդությունը, եւ առանց դատավորին լսելու հեռացավ խորհրդակցական սենյակ, որոշումը կհրապարակի հենց դատավորի ծննդյան օրը՝ հուլիսի 3-ին՝ ժամը 11.30-ին։

Հիշեցնենք, որ դատավոր Դավիթ Հարությունյանի նկատմամբ կարգապահական վարույթը հարուցվել է ապրիլի 7-ին՝ դատավորների ընդհանուր ժողովի օրը լրագրողների հետ ունեցած հարցազրույցի համար, որով դատավորն արձանագրել էր, որ 20-ից ավելի դատավորի լիազորություն տարբեր եղանակով անօրինական կերպով դադարեցվել են։ Անդրադառնալով հարցին՝ արդյո՞ք կա ուղղորդում իշխանությունների կողմից, Հարությունյանը նշել էր. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է»։

Այս հայտարարությունների հիման վրա ՀՀ ԱՆ-ն վարույթ է հարուցել դատավոր Դավիթ Հարությունյանի նկատմամբ և միջնորդություն ներկայացրել ԲԴԽ՝ պահանջելով դատավորին կարգապահական պատասխանատվության ենթարկել և, թեև վարույթը հարուցվել է դատավորի կողմից հրապարակային արված հայտարարությունների հիման վրա, ԲԴԽ-ն, բավարարելով ԱՆ միջնորդությունը, որոշել է գործը քննել դռնփակ ռեժիմով, ընդ որում, մինչ այդ՝ նախագահող Կարեն Անդրեասյանը «հասցրել» էր հրապարակային հայտարարել դատավորի կողմից թույլ տրված ենթադրյալ խախտումը, ապա նոր միայն անցել դռնփակության ռեժիմին, իսկ ԱՆ նախարար Գրիգոր Մինասյանը պարբերաբար հարցազրույցներում անդրադարձել է գործին՝ հանրությանը ներկայացնելով նաև տվյալներ, որոնք, դատավորի փաստաբանների դիտարկմամբ՝ իրականությանը չեն համապատասխանում։ Գործի քննությունն առաջին իսկ օրվանից ընթացել է լարված մթնոլորտում. նախ՝ ԲԴԽ նախագահի ցուցումով նիստերի դահլիճից հեռացվեց դատավորի գույքը՝ տեխնիկան, որով դատավորը պետք է իրականացներ իր պաշտպանությունը, ապա, սահմանափակվեց դատավորի ներկայացուցիչների թիվը՝ միայն չորսով, իսկ դատավորի՝ հետագայում ներգրավված ներկայացուցիչներն արդեն ահազանգեցին փակ դռների հետևում աղաղակող այլ խախտումների մասին։

Օրինակ՝ ԲԴԽ-ն սահմանափակել էր գործի նյութերին ծանոթանալու ժամկետները, ապա՝ միջնորդություններ ներկայացնելու ժամանակահատվածը և մերժել՝ առանց դրանք ամբողջությամբ լսելու, դատավորին և նրա ներկայացուցիչներին թույլ չի տրվել ձայնագրառումներ իրականացնել, իսկ ԲԴԽ կողմից իրականացվող՝ նիստերի արձանագրության վերաբերյալ կողմը վստահություն չունի, քանի որ նիստերի ընթացքում համակարգչի խափանում էր եղել։ Ավելին՝ կողմը կասկածներ ունի, որ դատավորի ներկայացուցիչների բարձրացրած հարցադրումները կարող են և արձանագրված չլինել և հետագայում տեղ չգտնել գործի նյութերում։ Դատավորի փաստաբանները դիմել էին ՄԻԵԴ՝ պահանջելով կիրառել միջանկյալ միջոց, սակայն, մինչ ՄԻԵԴ-ը կկայացներ որոշումը, ԲԴԽ-ն շտապողականությամբ՝ ընդամենը չորս օրում, քննել և ավարտել է գործը՝ առանց դատավորին և նրա ներկայացուցիչներին լսելու։ Մասնավորապես, հուլիսի 26-ին, երբ փաստաբանական համայնքը, այդ թվում՝ դատավորի ներկայացուցիչները գործադուլ էին իրականացնում (ինչի մասին նախապես հայտարարվել էր, սակայն, այնուամենայնիվ, նիստը նշանակվել էր հենց այդ օրը), ԲԴԽ-ում կայացել է նիստը, որին դատավորը ներկայացել էր միայնակ, ապա, ԲԴԽ կողմից կիրառված սանկցիայով հեռացվել դահլիճից։ Դավիթ Հարությունյանը լրագրողների հետ զրույցում նշել էր, որ միջնորդել էր գոնե մեկ օրով հետաձգել նիստը կամ հնարավորություն տալ մեկ այլ փաստաբանի ներգրավմանը, սակայն այդ միջնորդությունները մերժվել են։

«Հարցադրումները մասնավորապես այս վարույթի առանցքային մասնակիցների՝ ԲԴԽ նախագահի և Գրիգոր Մինասյանի ֆինանսական հարաբերություններին էին վերաբերում, որոնք առերևույթ վարույթի օրինականության հետ կապ ունեին։ Մասնավորապես նշեմ, որ ներկայացված ապացույցներով իրենց իսկ կողմից ստորագրված փաստաթղթերով հաստատված է, փաստարկված է ու նույնիսկ նախարարության ներկայացուցիչներն էլ չեն կարող հերքել, որ վերջիններիս միջև առկա է ֆինանսական կապ։ Այսինքն բացարկի ենթակա անձիք են, ինչն էլ ենթադրում է, որ նրանք չեն կարող շարունակել իրականացնել միևնույն վարույթում դատավարական գործառույթներ»,-մանրամասնել էր Դավիթ Հարությունյանը՝ նշելով, որ նույնիսկ, եթե բուն հարցերին պատասխանելու հնարավորություն չի տրվել՝ Կարեն Անդրեասյանի ուղղորդմամբ նախարարության ներկայացուցիչը նշել է, որ հրաժարվում է ընդհանրապես որևէ հարցի պատասխանել, իսկ հարցերը բազմաթիվ էին։ Մերժվել է նաև փաստաթղթերի ընդունումը։ Դատավորի՝ նիստերի դահլիճից հեռացվելուց հետո 5-7 րոպեի ընթացքում փաստաբանները փորձել են բարձրանալ և մասնակցել նիստին, սակայն տեղեկացվել են, որ գործի քննությունն ավարտվել է։ Հատկանշական է, որ ԲԴԽ-ում քննությանը զուգահեռ ՀՀ ԱՆ նախարար Գրիգոր Մինասյանը և ԲԴԽ նախագահ Կարեն Անդրեասյանը հանդիպում են ունեցել։

Հեղինակ՝ Իզաբել Սահակյան

Աղբյուր` Փաստինֆո